2 Amanyanapụ Sịkị Mịẹaye Ma 21 - Kịrịkẹnị Baịbụl

¹ Jẹhoshafat ḅe ọ̀ fịmẹ se ini ò se Devid opuama ḅie, amanyanapụ iḍupuma nyọ ḍipimẹ, se oria owutọkụ Jẹhoram ḅe, amanyanaḅọ ḅaraḅụ oria kiri ọkịmẹ.

Juda Amanyanaḅọ Jẹhoram

² Jẹhoram, Amanyanaḅọ Jẹhoshafat tọkụ ḅe sonio owuapụ mịnapụ ọ̀ nwọ nyanamẹ: Azaraịya ḅe na, Jihaịẹl ḅe na, Zẹkaraya ḅe na, Azaraịahu ḅe na Maịkịẹl ḅe na, pịkị Shẹfataịya ḅe na.

³ Inia ḍaḅe ọ̀ ḅakama goli na seleḅa na pịkị jịn-a yela ngọ na nwọse inia ḅụ gbọrịḅọ gbọrịḅọ pịrịmẹ, Juda apụma ọmụaye nama mịẹkụrọma opuama ḅie, gbọrịḅọ gbọrịḅọ ọ̀ nwọse tịḅịdaḅọ mịẹ gbọrị ama gbọrị ama pịrịmẹ. Ọkụma Jẹhoram ḅe inia ḅie sẹnịḅọ gose, Jẹhoshafat ḅe ori ò se oria kiri ḍinmamẹ.

⁴ Jẹhoram ḅe ḅo sẹ mịmgba ḍikiḍiki sịkị, ori oria mịnapụ mamgba ḅaafamamẹ, ọ̀ pịkị da Izrẹl fịrịnwẹngịapụ se chụaḅamẹ.

⁵ Jẹhoram ḅe soi maịn kụra fịnjị ọ̀ tịḅị ḅọrọ se ò ḅo amanyanaḅọ sọmẹ se nine-a kụra ọ̀ nwọse amadamẹ Jerusalẹm ḅie.

⁶ Ori Ehab ḅe na jịn Izrẹl amanyanapụ na sitịḅị-a mịẹmịẹyema ḍikimamẹ, anịatịḅị Ehab eremeni awọma ḅụ gbọrịḅọ ọ̀ nwọ simemẹ. Ò siye mịẹmẹ Nyanaḅọ Ḅe tọrụkuḅu,,

⁷ ọkụma Nyanaḅọ Ḅe ò ḅikẹ ò Devid amanyana furo mị kan, anịatịḅị ò Devid ḅe na ọḅọkụ fịsam se ḅerenisam na oria furo ḅie koroḅo apụ anị sịkịmamgba amada ma munḅịaye-ẹ.

⁸ Jẹhoram amada ḅụọ ḅụ, Idọm mị ḅereni nyanaka Juda mị pịrị se ḅo ngẹrị tịḅị nyana sẹ nwọ sọmẹ.

⁹ Mị ḅụ anị Jẹhoram ḅe na oria fịrịnwẹngịapụma na kporokporo ọmụarụ pakụma mun Idọm gbẹịnmachịẹye-ẹ. Anịnyọ, Idọm owunima ini kelemamẹ, ọkụma ḍin ḅie ini ḅụkụrọma pịọrụ somẹ.

¹⁰ Anịsịkị ngịsị, Idọm mị Juda ḅụ pọkọso ḅo ngẹrị tịḅị nyanamẹ. Mị gbọrị sịkịḅụ Libna opuama mị sọ ḅerenika nyanamẹ anịatịḅị Jẹhoram ḅe, ọ̀ Nyanaḅọ, oria ḅieju-aḍapụma Tamụnọ Ḅe, sịkịsam.

¹¹ Ọ̀ pịkị Juda gele-anyọ ma ọgọnọ tẹkẹ-anyọ nama oruḅẹrẹ nemiapụ ma pịrịmẹ se mịẹmẹ Juda na Jerusalẹm apụma na mịẹse ini Nyanaḅọ Ḅe ḅụ simịẹmẹ.

¹² Ịkịankoro Ịlaịja ḅe ḍiri se Jẹhoram ḅe sẹịnmamẹ, se nwọ ḅẹmẹ: “Nyanaḅọ, ị́ya ḅieju-ḍaḅọ Devid Tamụnọ Ḅe ọ̀ ḅarị ị́ se yeḅụchụa kịẹnkẹ, anịatịḅị ị́ ḍa, Amanyanaḅọ Jẹhoshafat ḅe na pịkị ị́ya opu ḍaḅọ Amanyanaḅọ Esa ḅe na mịẹ iḅiaye ma ị́ àrị ḍikima mịẹkẹ.

¹³ Anịnakaraka Izrẹl amanyanapụma mịẹ ọkụ ị́ nwọ ḍikima mịẹsam se Juda na Jerusalẹm na tomonima ị́ nwọse mun kuḅie se Tamụnọ Ḅe ḅụ gbanakapụ mịẹsam, anị Ehab ḅe na oria kiri ọkị apụma na Izrẹl mị telima mun kuḅie se Tamụnọ Ḅe ḅụ gbanakapụ mịẹ ḅara mị. Ị́ya mịnapụ owuapụma sọnị ị́ ini ninimẹ anị iḅi ị́ nẹngị owuapụma.

¹⁴ Anị ḅụ, Nyanaḅọ Ḅe ori iku fomuḅara se ị́ya tomonima pịrịḅịa, ị́ya awọma na pịkị ị́ya erema na, se ọ̀ pịkị ị́rị́ nyanaye goyegoye simaḅịa.

¹⁵ Ị́rị́ na mịnaḅụ na, oju akụma ḅụlọḅie ịla obi eneḅeneḅene sẹnịarị obi ḅe tọrụsiọrị ị́ nwọ kọnḅịa.”

¹⁶ Da Filistia apụ na Arab apụ na tọrụ aka ḅụ da Sudan apụ anga nyọ ḅụ ini na kpekima angamẹ. Nyanaḅọ Ḅe ini mịẹmẹ ini owu se Jẹhoram ḅe pakamẹ.

¹⁷ Ini Juda gbẹịnmachịẹmẹ, amanyanaḅọ odo mị ini kanmẹ, se ikoliapụ ḅaraḅụ amanyanaḅọ ere mamgba na oria owuapụ awọma na dekisomẹ, Ehaziya, oria bokatẹịn owutọkụ ḅe sikima.

¹⁸ Maye mamgba ḅọrọso sịkị Nyanaḅọ Ḅe gbọrị oju-akụma-ḅụlọḅie-ịla obi se amanyanaḅọ ḅe pịrịmẹ.

¹⁹ Anị ọ̀ ḅụ ḅie sẹnị mun ineda mama kụra lamẹ sitẹịn ḅaraḅụ, se kuḅiesi ḅụ anịḅe kuluma, amanyanaḅọ ḅe ọ̀ fịmẹ. Oria tomonima, ini opu-fịnị-tọnọ se ò ḍinkẹ, ini mịẹ oria ḅieju-aḍapụma pịrịpịrị ḅara mị.

²⁰ Kụra soi maịn kụra fịnjị mị Jẹhoram ḅe ọ̀ la se ò ḅo nine-akụra se Jerusalẹm ḅie amadaye-ẹ. Gbọrịḅọ sọ kururukẹ ọ̀ fị sịkị. Devid opuama ḅie ini ò ḍipimẹ, ọkụma amanyana furo iḍupuma ḅiekẹ.