2 Amanyanapụ Sịkị Mịẹaye Ma 20 - Kịrịkẹnị Baịbụl

Ini Se Idọm Paka Ọmụ Mị

¹ Sịkị kele ḅọrọ sịkị, Moab na Amọn na owunima na, pịkị ini na iniaḅụ sọ jịn ọmụ nị ma na, Meụnịm apụma na, Juda mị gbẹịnmachịẹmẹ.

² Da okunwẹngịapụ ḅo ḍuko Amanyanaḅọ Jẹhoshafat ḅe pịrịmẹ: “Idọm ḅie ḅo gbọrị opu owuni, Fị Tọrụ mị ḅụ, ísí saḅamanga wẹrịḅo owu seni ị́ paka-ẹḅoaḅẹ. Ini tatarị Hazazọn Tema mị ọkịsam.” (Mị anị ini se Ẹngẹdaị mị chịn jịn ẹrẹ-ẹ.)

³ Jẹhoshafat ḅe ọ̀ ḅalafamẹ, se ọ̀ Nyanaḅọ Ḅe tẹkẹmẹ ḅarachụa ọ̀ pịrị gose. Anị ọ̀ tọn sẹ mị mgba pịrịye-ẹ na inimgba ini ḅurukụmaḅịa.

⁴ Juda opuamama ḅie sime tomoniḅọ goyegoye be so Jerusalẹm mun Nyanaḅọ Ḅe tẹkẹmẹ na,

⁵ ọ̀ ḅarachụa ini pịrị-ẹ, se ini na Jerusalẹm opu ma na mun koḅiriamẹ Oputẹkẹwarị ịwọ opu odo mị ḅie. Amanyanaḅọ Jẹhoshafat ḅe mun inia tọrọkọ chịẹ

⁶ se oloku tẹkẹmẹ, “Yei Nyanaḅọ, mịna ḅieju-aḍapụma Tamụnọ, ị́ soḅie sime se ḅẹrẹtọn sẹkiri ḅie sime-a sẹ mamgba pịrịmẹ. Ị́ kụrọmẹ ị́ pịkị ḍụḅamẹ, pịkị ineda ị́ daḅịa gbọrịḅọ sọnị ofori-ẹ.

⁷ Ị́rị́ mịna Tamụnọ-ẹ. Ị́ya tomoni, Izrẹlapụma mị ama mị ḅo sịkị, ị́rị́ anị mịọ anga simeapụma desin se ama mị se inikio Ebraham-ḅe-ḅụ-koroḅoapụ ma pịrịye-ẹ, na anị sime ini pịrị gbaso.

⁸ Ini mịanga angasam pịkị Oputẹkẹwarị namasam se ị́ osi, nemi na

⁹ siye nemikase ini dapakamẹ nwọ ḅẹḅẹ—owu anịkanịka fin-fin obi, anịkanịka ḅuruḅa—anịkanịka ini ineda mị Oputẹkẹwarị tọrọkọ ḅo chịẹḅịa, ini ị́ tẹkẹtẹkẹ nyọ mị. Ini ineda inia ḅụfụka ma ḅie ị́ tẹkẹḅịa, se ị́ ini naa se ini ḍụaḅịa.

¹⁰ “Mịọkụ Amọn apụma na Moab apụma na pịkị Idọm apụma na, ini owu se wa pakasam. Mịna ḅieju-aḍapụma Ijipt ḅie pakaḅo sịkị, ị́ ḅereni ini pịrịkẹ ini arịa amama ḅie sọ, anịẹrẹchị mịna ḅieju-aḍapụma nwẹngị ini kelemamẹ ḅara se ini lamaka ḅaraḅụ.

¹¹ Mị mịọkụ ini gbẹịnye se wa pịrị ọkụ-ẹ—ị́rị́ se wa pịrị ama mị ḅie ini ḅo wa desin aḅẹ.

¹² Ị́rị́ mịna Tamụnọ-ẹ! Fomuḅara se ini pịrị, anịatịḅị mị nwọ ḅo owu se wa paka-ẹḅoarị ḅaka owunima daḅịa ḅarachụaḅọ wa nyanakẹ. Wa mịẹḅịa ọkụ wa nemikẹ, ọkụma wa ị́ ḍikisam ḅarachụa gose.”

¹³ Juda owuapụ mamgba na, inia erema na, awọma na, anịnyọ Oputẹkẹwarị mị anga sịkị ini chịẹ waraḅẹ.

¹⁴ Nyanaḅọ Ḅe tẹmẹ mị ḅo nweni ogbo mị ḅie sime gbọrị Livaịḅọ ọgọnọ gbanamẹ. Oria ẹrẹ anị Jahazịẹl, Zẹkaraya ḅe oria owutọkụ-ẹ; ori anị Esaf sẹ mị ḅieḅọ-ẹ pịkị Matanaya na Jeaịẹl na Bẹnaya na ḅụ ḅọrọ Esaf ḅe ḅụ koroḅoḅọ-ẹ.

¹⁵ Jahazịẹl ḅe ọkọ ḅẹmẹ, “Ị́ya Amanyanaḅọ opu, pịkị ómine Juda na Jerusalẹm na a tomoni mamgba na, Nyanaḅọ Ḅe ọkọ ḅẹmẹ na ọ́mịna kuḅie lọkọma, anịkanịka ọ́ ḅalafama tọrụse mị opu owuni kụlọ mị daḅụ. Tamụnọ Ḅe ọgọnọ anị owu mị sẹrẹrẹye-ẹ, ọ́mịna ọgọnọkẹ.

¹⁶ Ḅa ini ḅo Ziz kpapụ ateli mị ḅie ḅọrọḅịa sịkị ómine owu seni ini paka. Ómine ini na bịamaḅịa pẹsịkiri nyọ ḅe kuluma, ḅọrọ Jeruẹl piri ele ḅie munyọ ḅụ.

¹⁷ Ọ́ ḅụ ḅaa mị owu mị sọ ẹkẹ. Ómine ọ́mịna kirima ọkị se chịẹ koru; ómine ọrịḅịa na Nyanaḅọ Ḅe ori ọmụḅaraiḅi se ọ́ pịrịḅịa. Juda na Jerusalẹm-a tomoni, ọ́ ḅarị kuḅie-se-maịnmaịn tọn anịkanịka ḅalafama. Ọ́ paka owu mun, Nyanaḅọ Ḅe pịkị ómine na simeḅịa!”

¹⁸ Anị Amanyanaḅọ Jẹhoshafat ḅe tu ọ̀ tọrụ se kiri lamaye-ẹ, se tomoni mamgba ọ̀ ḅụ sọ ori na tu se ini Nyanaḅọ Ḅe tẹkẹmẹ.

¹⁹ Livaị sẹ ḅie Kohat na Kora na tomonima chịẹ se gele oloku pụkọ ḅụ, Nyanaḅọ, Izrẹl Tamụnọ Ḅe tokonimẹ.

²⁰ Jịn eneḅa dede ḅie tomonima paka Tẹkoa na kpeki piri ele mun ye-ẹ. Ini sịsẹ sakị mun-ẹtọn àrị ogbo anị Jẹhoshafat ḅe mà ọkwẹịn ma kọn ini pịrịye-ẹ: “Juda na Jerusalẹm na owuapụ! Ómine ọ́mịna ḅereni se Nyanaḅọ, ọ́mịna Tamụnọ Ḅe ḅụ gbana, ọ́ pịkị ọ́mịna kiri ḅụ chịẹḅịa. Oria ịkịankoroapụma ḍukoarịaye ma ọ́ nwọ ḅereni, se ye ómine na deinḅịa.”

²¹ Ò tomonima na ḅịpị se ogbosọ so sịkị, anị amanyanaḅọ ḅe kụrọ se da yefarịapụ pịrịye-ẹ na ini osiḅụ sime mịẹmịẹye nyana sịkị ini chụachụa opu-aḅụchụaye ma ini nwọ chụa se owunima tọrọkọ ịsụn nwẹngị se nime chu: “Ọ́ Nyanaḅọ Ḅe tokoni! Oria ḅẹlẹma mị sime gbasomẹ!”

²² Ini nime mị sakị chuarị sịkịḅụ, ḅo owu paka-ẹḅoarị owunima ḅie, Nyanaḅọ Ḅe ọ̀ ḅalafa se chumẹ.

²³ Amọnaị apụma na Moab apụma na, Idọm owuni kụlọ gbẹịnmachịẹ se okorona okorona anị famamẹ, anịeso mị ininini tọrụ pịkị jịn apụ jịn apụ da se galagala owusọye-ẹ.

²⁴ Juda owukụlọ mị mun onwun ele ḅie sime gbọrị sokopi warị la se anị tanjị ḅie sọ tarakapụma ḍikiọkụma, ini ọrịmẹ na inimgba kiri ọgọnọ fịsara waraḅẹ. Gbọrịḅọ sọ sokẹ.

²⁵ Jẹhoshafat ḅe na oria owunima na nwẹngị mun owu-ḅie-siaye ma tan-ẹmunmẹ, se ini tọn aye ọrịmẹ, nambulo na, fịaye na, ḅụchụaye na, tọn-a yela ngọ na. Tẹrẹ-a ene ini nwọse mayema koḅirimẹ, ọkụma yema opuma ḅaka ẹrẹchị ini ineda àrị koḅiri sokẹ.

²⁶ Inein karama ene ini Bẹraka Pẹsịkiri ḅie koḅiria se Nyanaḅọ Ḅe tokonimẹ ọ̀ mịẹsaye mamgba gose. Anị ini gose “Bẹraka” se pẹsịkiri mị chịnye-ẹ.

²⁷ Jẹhoshafat ḅe oria owunima ḅọrọma mun Jerusalẹm ḅie chumẹ ọmụḅaraiḅi ḅụ, anịatịḅị Nyanaḅọ Ḅe ori inina-tarakapụma inumasam.

²⁸ Ini mun opuama mị lasịkị, ini nwẹngị mun Oputẹkẹwarị ḅie sọmẹ ọbọ ma na oḍu ma na farịaye ma na ḅie.

²⁹ Sẹ goyegoye naa na Nyanaḅọ Ḅe ori Izrẹl na tarakapụma inumasam nwọḅẹ sịkị inia ḅalafamẹ,

³⁰ anịḅụ Jẹhoshafat ḅe ò dein ḅaraḅụ sẹ mị damẹ, pịkị Tamụnọ Ḅe ḅọkọḅọkọ ḅụ koko ḅara se ọ̀ pịrịmẹ.

Jẹhoshafat Sẹda Mị Ḅe Kuluma

³¹ Jẹhoshafat ò ḅo kụra soi na sọnọ-a kụra lasịkị anị ò ḅo Juda amanyanaḅọ sọye-ẹ, se sisọnọ-a kụra fịnjị ọ̀ nwọse Jerusalẹm mị ḅie ḅụ sime ḅẹrẹtọnmẹ. Nyọngọrọ ma anị Azụba, Shilhaị ḅe ḅarọ ma-ẹ.

³² Ḍawu Esa ḅe mịẹ ḅara mị, ọ̀ Nyanaḅọ Ḅe ḅụḅẹlẹye mịẹmẹ;

³³ ọkụma oruḅẹrẹ nemiapụma inia tẹkẹ-a nyọma ori àrị kankẹ. Tomonima ini inia ịnyọ mgba se inia ḅieju-aḍapụma Tamụnọ Ḅe fịrịnwẹngị ọ̀ pịrịkẹ.

³⁴ Jẹhoshafat ḅe mịẹ jịn aye goyegoye sakị ḅụ mun kuluma la, Hananị ya Jẹhu ḅe Ḅụaḅẹrẹ ḍiri mị ḅie gịẹịn waraḅẹ, anị sọnị Izrẹl amanyanapụma ḅụ ḅẹrẹma ḅe gbọrị pẹkẹrẹ-ẹ.

³⁵ Gbọrị sịkị ḅụ Juda Amanyanaḅọ Jẹhoshafat ḅe na Izrẹl Amanyanaḅọ Ehaziya anị opuma siaye mịẹmịẹḅọ ḅe na ḅo ḅịpị ogbosọ ḅụ gbolomamẹ.

³⁶ Iziọngiba pọkụ ḅie ini abaji sọḅịa opu onwoin arụ nwọ ịkasịmẹ.

³⁷ Ọkụma Ẹleaza Dodavahu ya Marẹshaḅọ ḅe Jẹhoshafat ḅe ḅerijinemẹ, “Ị́ Ehaziya ḅe na ḅịpịogbosọ ḅụ gbolomasa ẹrẹchị, Nyanaḅọ Ḅe ómine ịkasị arụ ma, ori àrị simaḅịa.” Se onwoin arụ ma, àrị ḅilemẹ, àrị pịkị ḅarị tọrụ pakakẹ.