2 Amanyanapụ Sịkị Mịẹaye Ma 2 - Kịrịkẹnị Baịbụl

Ḅụkarakarama Oputẹkẹwarị Nama Mị Pịrị

¹ Amanyanaḅọ Sọlọmọn ḅe ọ̀ tọnsam na ini sime Nyanaḅọ Ḅe tẹkẹtẹkẹḅịa Oputẹkẹwarị ọ̀ nwọ namaḅịa, ọ̀ pịkị amanyanaḅọ warị nama ọ̀ ḅụ pịrịḅịa.

² Fịrịnwẹngịaye sẹịn iwo na ideri na fịrị mị, kịnị nine-a poku na jie ẹndẹ ọ̀ nwọse anị wẹrịmamẹ, anịsịkị chịngị ọgọnọ sẹ ḅie ḍụparị pu fịrị mị kịnị oyi-a poku ọ̀ nwọse koroma anị pịrịmẹ. Fịrịtịḅịnị ḅụ tọrụkweinma fịrị mị ḍikiḍikiarị apụ anị kịnị esenie-a ẹndẹ-ẹ.

³ Sọlọmọn ḅe oku seni Amanyanaḅọ Hiram, Taya ḅọ ḅẹ fịrịmamẹ se nwọse ọ̀ ḅẹmẹ: “Ị́ ị̀ ḍa Amanyanaḅọ Devid ḅe na tuḅo kọn gboloma ḅara mị nwọse ị̀rị̀ na tuḅo kọn gboloma, anị ori oria amanyanaḅọ warị mị nama sịkị ḅụ, ị́ se ọ̀ dẹrị awụ chịnma ḅara mị.

⁴ Osi seni ị̀ Nyana Tamụnọ Ḅe pịrịḅịa Oputẹkẹwarị à nwọ namaḅẹ. Anị ị̀ya tomonima na ị̀rị̀ na wa ọ̀ tẹkẹtẹkẹḅịa osi nyana nyọ anị nwọ sọḅịa, anịju ḅụ à pịkị kụnụ insẹnsị dọkịma ọ̀ pịrịḅịa àrị ọ̀ tẹkẹarị sịkịḅụ, wa pịkị sịkịmamgba anịju osiḅụ sime fịturu nwọse ḍiepịrịaye agba mịẹ ọ̀ pịrịpịrịḅịa, wa pịkị anị nyọ ḅụ dede na saso na goyegoye ḅụ dọkịma agbamịẹ ọ̀ pịrịpịrịḅịa, pịkị Ịnyọsara Ene ma ḅie na, Ịwọ Akalụ Alalị ma na, pịkị jịn osiḅụ sime enema na seni osi se Nyanaḅọ mịna Tamụnọ Ḅe pịrịḅịa. Ọ̀ tọn Izrẹl mị pịrịsam na ini mịn mị mịẹ gbaso.

⁵ À ḍụḅa Oputẹkẹwarị namaḅịa à nwọ tọnmẹ, anịatịḅị mịna Tamụnọ Ḅe ọ̀ ḍụḅa jịn oru goyegoye nẹngịmẹ.

⁶ Ọkụma ineda kọkọma Oputẹkẹwarị nama Tamụnọ Ḅe pịrịḅịa gbọrịḅọ sọnị ofori-ẹ, anịatịḅị so mị nwọ ḍụḅa la-ọkụ mị mgba sọnị ineda ọ̀ kara-ẹkẹ. Ị̀rị̀ tụḅọ se ḅo Oputẹkẹwarị nama Tamụnọ Ḅe pịrị ḅe? Àrị ineda insẹnsị dọkịma ọ̀ pịrịḅịa nyọ ngẹrị nwọ nama ọ̀ pịrịḅịa.

⁷ Mịọkụ iḅiọkụma goli na seleḅa na, alapẹlẹka, pịkị ikulele na ḅụ ye-kara-aka-kọn-ḍin gbọrị owuḅọ, pịkị bulu bulu tọrụ na awụwụ tọrụ na pịkị pulo-pulo tọrụ nyana ḅịtẹ na mịẹ ḍinḅọ nwọse ị̀ sẹịnma. Ò Juda na Jerusalẹm na ḅie ị̀ ḍa Devid ḅe sẹlẹkoroma ḅara fịrịnwẹngị apụma na gboloma fịrịnwẹngịḅịa.

⁸ Ị́ya chịn pẹlẹ apụma ini iḅiọkụma anị aka nemiọkụ à nemimẹ, anịẹrẹchị Lẹbanọn ḅieḅụ awụ chịn na, kuru chịn na, pịkị junipa nangwọ nangwọ ikiḅa chịnma na se ị̀ sẹịnma. À ḅụkarakaramamẹ ị̀ya tomonima se sẹịn ini mun ḅarachụa ị́ya tomonima pịrị

⁹ se ini ḅaka chịn ikiḅa karakaraḅịa ọkụ, anịatịḅị mị à namaḅịa Oputẹkẹwarị mị, anị ḍụḅa pịkị ḅụgbiripumaḅịa.

¹⁰ Ị́ya chịn pẹlẹapụ ma fịḅịa fịaye ọkụma, fịturu mịẹ ịpịamgba ḅụ, akpa oyimaịn poku fịnjị na oyi ẹndẹ, irumịẹ ịpịamgba pịkị akpa oyimaịn poku fịnjị na oyi ẹndẹ, ere iru ḅụ galọnị-a oyigbọrị poku fịnjị na sọnọ-a ẹndẹ, oliv pulo ḅụ pịkị galọnị-a oyigbọrị poku fịnjị na sọnọ-a ẹndẹ à nwọse ị́ sẹịnmaḅịa.”

¹¹ Anịḅụ Amanyanaḅọ Hiram ḅe ḍiri gịẹịn Sọlọmọn ḅe sẹịnma se nwọse ọ̀ pẹkẹrẹmẹ, “Nyanaḅọ Ḅe oria tomonima ḅẹlẹmamẹ nwọḅẹ ẹrẹchị, ori ị́ seni inia amanyanaḅọ nwọ mịẹmẹ.

¹² Ọ̀ pịkị nwọ ḅẹmẹ, Tokoni seni Nyanaḅọ Izrẹl Tamụnọ Ḅe pịrị, so na kiri na Tẹmẹḅọ Ḅe! Ò yenemi tọkụ seni Amanyanaḅọ Devid ḅe pịrịsam, yekaịnḅo na kpaịn nemi na ḅie ḅeinḅọ anị mịọkụ Oputẹkẹwarị nama Nyanaḅọ Ḅe pịrịḅịa ọkụ na pịkị amanyanaḅọ warị nama ọ̀ ḅụ pịrịḅịa ọkụ na nwọse ọrụtọn ḅọ ḅe.

¹³ Anịẹrẹchị yenemi pịkị ḅarafịrị aka nemisa yeḍieḅọ à nwọse ị́ sẹịnmaḅẹ, oria ẹrẹ anị Huram Abị.

¹⁴ Nyọngọrọ ma Danị sẹ mị ḅie ḅọ-ẹ se ḍawu ḅe Taya amaḅọ-ẹ. Goli na, seleḅa na, alapẹlẹka na, ikulele na, ḍụparị na, pịkị ḍụpọ na se yemịẹ ọkụ ọ̀ nwọ nemimẹ. Ori ineda bulu ḅịtẹ na, awụ ḅịtẹ na, pịkị pulo-pulo ḅịtẹ na se fịrịnwẹngịḅịa, pịkị lọkọ ḅịtẹ sọnị. Ḍụparị ḅụ soku gịẹịnḅịa kịrịkịrị ye mamgba ori ineda yeḅịa, pịkị seni ọ̀ ḅẹ na mịẹ nwọḅẹ ḅara goyegoye ori ineda anị mịẹḅịa. Ye ori ị́ nyana ḅarafịrịnwẹngịapụ ma na pịkị fịrịnwẹngị ị̀ nyanaḅọ ị́ ḍa Amanyanaḅọ Devid ḅe pịrị apụma ḅụ sọ gboloma fịrị mị nwẹngị.

¹⁵ Anịẹrẹchị ị̀ nyanaḅọ ị́ ḅereni wa pịrị fịturu mịẹ ịpịamgba ma na, irumịẹ ịpịamgba ma na, iru ma na, pịkị oliv pulo ma na seni wa sẹịnma.

¹⁶ Mine ọkụma Lẹbanọn tụndụma ọgọnọ ḅụ, wa ị́ ḅi awụ chịn mamgba pẹlẹ gbin se àrị kpọ gboloma se àrị na tẹịnmaḅo Jọpa tọrụ mị ḅie ḅụ tolupakaḅoḅịa. Anịju ḅụ ị́ ineda àrị ọkịso Jerusalẹm munḅịa.”

Oputẹkẹwarị Mị Nama Mị Sakịsam

¹⁷ Anị Amanyanaḅọ Sọlọmọn ḅe Izrẹl sẹma ḅie anga igoniapụ mamgba inia kịẹnḅịpị ọ̀ nwọ ọkịmẹ, ḍawu Devid ḅe nweni ma kịẹn ḅara kịkẹma ḅara. Igoniapụ ḅụ gbọrịyefa si poku na kịnị inein ẹndẹ na simemẹ.

¹⁸ Inia ḅie ḅụ nine-a poku na kịnị-a jie ẹndẹ na ọ̀ nwọ tọn warị namaye sẹịnḅo fịrị mị pịrịmẹ se kịnị oyi-a poku sime tụndụma ọgọnọ ḅụ ḍụparịma pu fịrị mị pịrịmẹ, se tọrụ se fịrịnwẹngịapụma ḅụ wẹrị na, pịkị fịrịdatekerema ḅụ na kịnị esenie-a ẹndẹ ọ̀ nwọ tọnmẹ.