2 Amanyanapụ Sịkị Mịẹaye Ma 19 - Kịrịkẹnị Baịbụl

Gbọrị Ịkịankoroḅọ Jẹhoshafat Ḅe Ḅerijinemẹ

¹ Juda Amanyanaḅọ Jẹhoshafat ḅe dein ḅaraḅụ pịkịmaḅo oria amanyanaḅọ odo sọmẹ Jerusalẹm ḅie.

² Gbọrị ịkịankoroḅọ, Hananị owutọkụ, Jẹhu ḅe mun amanyanaḅọ ḅe la se ọ̀ ḅẹmẹ, “Ị́ chịn ḅara anị karakara, ḅarachụa sitịḅị nyanapụ pịrị mị pịkịna Nyanaḅọ Ḅe ḍikiḅụnwọnwọ apụma na gbọrịju-sọ? Ị́ mịẹye, Nyanaḅọ Ḅe ịganị ọkịḅo ị́ pịrịsam.

³ Ọkụma anịsọ, iḅi pa ị́ ḅụ omi-ẹ. Ị́ Ashera eremeni oru anị tomonima tẹkẹarịye mị na gboloma elekimaye mamgba ị́ dekisinsam, ị́ pịkị ḅụkụrọma Tamụnọ Ḅe ḅiarịyema ḍukonwẹngịsam.”

Jẹhoshafat Ḅe Pịkị Tẹlịma Iḅimaye Ma

⁴ Amanyanaḅọ Jẹhoshafat ḅe Jerusalẹm ḅie ori angamẹ nwọḅẹ sọ, ori iḅiọkụma sịkịmamgba tomonima ḅie munmun jịnyọ jịnyọ lalamẹ, chukuju sime Biashiba ḅụ, ò so ọgọnọju tụndụ sẹ ịkọlị ḅie sime Ifrem lamẹ, mịẹso sịkị ò tomonima chịn pịkị Nyanaḅọ Ḅe, inia ḅieju-aḍapụma Tamụnọ Ḅe pịrịḅịa ọkụ.

⁵ Ini iḅiọkụma mịẹkụrọma Juda opuamama goyegoye ḅie, ọ̀ ḅẹrẹkọn apụ tọn àrị pịrịmẹ

⁶ se tọn ini pịrịmẹ: “Ọ́ tọrụkweinma ḅẹrẹkọn kọn; ó tomoni kụrọ ḅụ yemịẹkẹ, ọkụma Nyanaḅọ Ḅe kụrọ ḅụ-ẹ, ọ̀ pịkị ómine na omi-ẹ ọ́ ḅẹrẹ pẹlẹḅịa sịkị.

⁷ Ọ́ Nyanaḅọ Ḅe osi se ómine ọ́mịna ḅụ ọbị mịẹmịẹye ḅụ, anịatịḅị, Nyanaḅọ mịna Tamụnọ Ḅe, ọ̀ ḅarasin opele-sọye, anịkanịka tọrụkụn, anịkanịka ọḅụfị pịrịpịrịkẹ.”

⁸ Jerusalẹm ḅie Jẹhoshafat ḅe ò Livaị apụ na agbamịẹapụ na pịkị da tọrụnyana amatịḅịnị na nwọse ḅẹrẹkọn apụ mịẹmẹ, ini sime Nyanaḅọ Ḅe oria Oloko koro ḅẹrẹ anịkanịka amapụ ma na gboloma oloko-a ḅẹrẹ nwọ pịrị.

⁹ Ọ̀ mayema ḍuko seni ini pịrịmẹ: “Ómine ọ́mịna fịrịma nwẹngị Nyanaḅọ Ḅe ḍikiḅalafa ḅụ, ó ye àrịye goyegoye ḅụ kuḅie-se-ọ̀ ḅụgbana ḅara ọ́ nwọse ọ̀ ḅịpị poki.

¹⁰ Ọ́mịna juo amapụ ma opuamama ḅie, ḅonyọ ḅonyọ, ọ́ tọrọkọ nweni ḅaa ḅẹrẹ, anịkanịka oloko koro ḅẹrẹ, anịkanịka mịẹgbẹịnkaye nwọse ḅoḅo, ómine iḅiọkụma tọrụkweinma ḍuko ini telima ini ḅara-wẹrịma iniaḅụ wẹrịḅịa ọkụ ḅẹrẹkọnḅịa sịkị, mịẹso sịkị ini Nyanaḅọ Ḅe ḅụ si se ọ̀ mịẹ ḅe-ḅẹrẹsi nyana ẹka ọkụ. Ọ́ mị mịẹka, ómine na ọ́mịna juo amapụ ma na, Nyanaḅọ Ḅe ịganị mị ḅe kụrọ nwọ nyanaḅịa. Ọkụma ó nemikase ọ́mịna fịrịma nwẹngịmẹ nwọ ḅẹḅẹ, ọ́ ḅẹrẹsi nyana ẹkẹ.

¹¹ Amaraya, Gele Agbamịẹḅọ ḅe, anị kuluma ḅẹrẹpẹlẹ kụrọ nyanaye-ẹ, tẹmẹ anga na gboloma ḅẹrẹ goyegoye mamgba ḅụ, pịkịna Zẹbadaya, Ishmẹl owutọkụ, Juda gọvịna ḅe, anị kuluma ḅẹrẹkọn mị nyanaye-ẹ papa ḅẹrẹ goyegoye mamgba ḅụ. Livaị apụma ḅẹrẹkọn-a warịma kọn-aḅẹrẹ ma ḍukoaye ma deki nwẹngị fịrị nyanamẹ. Ọ́ kụrọkuḅie nyana se ma ḍukoaye ma deki nwẹngị, se ye Nyanaḅọ Ḅe karakaraye mịẹapụ ma ḅụ sime.”