2 Amanyanapụ Sịkị Mịẹaye Ma 16 - Kịrịkẹnị Baịbụl

Izrẹl Ḅie Sime Ḅụfụka

¹ Juda Amanyanaḅọ Esa ḅe amanyanaḅọ sọ inein-a kụra ofori kụra mesi karama kụra mị ḅie anị Izrẹl Amanyanaḅọ Beasha ḅe ḅo Juda mị gbẹịnmachịẹye-ẹ, se ọ̀ sakị Rema mị se kụrọ owuni ama mịẹmẹ, ọ̀ pịkị ateli ma kikimẹ mịẹso sịkị nweni ḅarị Juda mị ḅie nwẹngị paka pịkị sọ ẹka ḅara.

² Anị gose Esa ḅe ori Oputẹkẹwarị mị ḅie ngọ koko warị ḅie na pịkị amanyanaḅọ warị mị ḅie na seleḅa na goli na nwọ ọkị se àrị se Damaskọs, Siria Amanyanaḅọ Bẹnhadad ḅe sẹịnmamẹ, se mị oku mị se ọ̀ fịrịmamẹ:

³ “Ye wa mịna ḍapụma ḅịpịse-ogbosọkụ wa ọkọse ḅịpị se ogbosọ. Mà seleḅa ma na goli ma na ị́ya ḍiepịrịaye-ẹ. Mịọkụ ị́rị́ na Izrẹl Amanyanaḅọ Beasha ḅe na ọ́ nyana ḅịpịse-ogbosọ mị kan, mịẹso sịkị oria owunima ị̀ya eke ḅụ ọ̀ nwọ sinḅịa ọkụ.”

⁴ Bẹnhadad ḅe Esa ḅe seni ọ̀ tọrọkọ koroma ọkwẹịn mị ò ḅereni ọkịmẹ se oria ọmụtịḅịda apụma na inia owunima na fịrịmamẹ na ini owu seni Izrẹl ḅie sime opuamama paka-ẹ. Ijọn na, Danị na, Ebẹl Bẹl Meaka na pịkị Naftalaị ḅie sime opuama mamgba anị inia ngọ koko-a warịma sime ama mị.

⁵ Amanyanaḅọ Beasha ḅe pakarịye mị naa sịkị, Rema mị se kụrọ owuni ama mịẹ mị ḅụ ọ̀ dachịẹmẹ se ọ̀ fịrị mị wẹrịsomẹ.

⁶ Anị Amanyanaḅọ Esa ḅe Juda mị ḅie sime owuapụ goyegoye mamgba nwọ koḅiriye-ẹ se nwọse ini ḅẹmẹ na Beasha ḅe seni Rema ḅụ fịrịnwẹngị sime-a ḍụparịma na chịn goyegoye mamgba ini mun deki sin, se ini ḅo anị seni Giba na Mizpa amama nwọ mịẹ kụrọmamẹ.

Ịkịankoro Hananị Ḅe

⁷ Anịsịkị mị ḅụ anị ịkịankoro Hananị ḅe so Amanyanaḅọ Esa ḅe damamunye-ẹ se nwọ ḅẹmẹ, “Nyanaḅọ ị́ Tamụnọ Ḅe ḅụ ị́ sẹrẹrẹ nakaraka, Siria amanyanaḅọ ḅe ḅụ re mị ị́ sẹrẹrẹye-ẹ, Izrẹl amanyanaḅọ ḅe oria owunima ini ị́ ḅarapẹlẹma mangịsosam.

⁸ Sudan apụma na Libya apụma na, ini kọkọ ḅakama owuni na owuni kporokporo na pịkị asụn ọgọnọ owuni nyana ḅakama? Ọkụma ị́ Nyanaḅọ Ḅe ḅụ sẹrẹrẹmẹ gose, ori anị mịẹ sarasarama ị́ pịrịmẹ se ini nẹngịmamẹ.

⁹ Nyanaḅọ Ḅe ò kwein tọrụ seni bebe tomonikiri mị ḍikiaḅẹ, kuḅie ḅụ ò ḅereni apụma ori ịnyọ se ini pịrịḅịa. Oḅoriḅọ ḅara ị́ nwọse yemịẹsam, anịẹrẹchị mịọkụ ọkị tọrọkọ mun sịkịmamgba ị́ ọmụgbinḅịa.”

¹⁰ Mịn mị mịẹso sịkị Esa ḅe ori ịganị nyana ịkịankoroḅọ ḅe pịrịmẹ, se ori ò kun se ikoli se ori ịkasịmẹ. Mị gbọrị sịkị mị ḅụ anị Esa ḅe sakị si ḍumo se da tomoni na angaye-ẹ.

Esa Ḅe Oria Kuluma Amada Mị

¹¹ Esa ḅe oria amanyana mị ḅụ pakaye mamgba sakị ḅụ ọkịmun kuluma mị la àrị gịẹịn koroma waraḅẹ Izrẹl na Juda na Amanyanapụ ḅụa ḅẹrẹ ḍiri ma ḅie.

¹² Esa ḅe, ori amanyanaḅọ sọ gbọrị kụra fa kụra mesi karama kụra mị ḅie, ḅụfụkama ḅụọ obi ọ̀ lamẹ, se ọ̀ ḅụọma fịmẹ; ọkụma anịẹḅẹ sọnị, ọ̀ tọrụ pịkị Nyanaḅọ Ḅe da se ọ̀ ḅara ḅarachụa ḅikẹ, ọkụma ḅịrịapụ re mị ọ̀ tọrụ pịkịdaye-ẹ.

¹³ Mama kụra lasịkị ọ̀ fịmẹ

¹⁴ se ọ̀ kara ọ̀ ḅụ pịrị ịkụ iḍupu mị ḅie ini ò ḍipimẹ Devid opuama ḅie. Sarasarama ḍụẹịn ḅụrụmakaye na kụnụ olo na ini gwa gboloma se oria oju mị ọmbị se ini ò ḍipimẹ, ini amaogbo opu fịnị tọnọmẹ seni se oria fị ḅụ ò kururumẹ.