2 Amanyanapụ Sịkị Mịẹaye Ma 15 - Kịrịkẹnị Baịbụl

Esa Ḅe Pịkị Tẹlịma Iḅimaye Ma

¹ Tamụnọ fịafịa tẹmẹ Azaraịya Odẹd yaḅe ḅụ gbanamẹ,

² anị ọ̀ paka so Amanyanaḅọ Esa ḅe damamunye-ẹ. Ori ọ̀ chịn se nwọ ḅẹmẹ, “Ị̀ poki, Amanyanaḅọ Esa, pịkị Juda na Bẹnjamin na ḅie sime apụ mamgba na! Nyanaḅọ Ḅe ori ómine na omi-ẹ, ómine ọ̀ ḅụ omi-ẹ nwọ ḅẹsịkị goyegoye. Ọ́ nemikase ọ̀ ḍọkị ọkụma, ọ̀ mịẹḅịa ómine ori ọrịḅịa, ọkụma ọ́ ḅọrọ nemikase ọ̀ ḅụ sikimamẹ ḅẹḅẹ, ori ó seni gbin koromaḅịa.

³ Ḅọlọsa sịkịḅụ Izrẹlapụma karakara Tamụnọ Ḅe nyanaka ḅaraḅụ ini simemẹ, yese ini ḍieḅịa agbamịẹapụ ofori-ẹ, ini pịkịna oloko nyanakẹ.

⁴ Ọkụma ḅụfụka ini damaḅo sịkị ini Nyanaḅọ Izrẹl Tamụnọ Ḅe damaḅomẹ. Ini ọ̀ ḍọkị se ini pịkị ori ọrịmẹ.

⁵ Àrị enema ḅie gbọrịḅọ sọnị ofori-ẹ ineda sọḅo se ye nụḅọ lakaḅaraḅụ pakasoḅịa ḅọ, anịatịḅị ḅụfụka na ḅịpịogbosọka na amama ḅie mgba omi-ẹ.

⁶ Gbọrị sẹ ísí sẹ mị pụnụmamẹ, pịkịna gbọrị opuama ísí opuama mị pụnụmamẹ, anịatịḅị Tamụnọ Ḅe, ḅụfụka na ḅụḅalaḅala na nwọse ḅo inia ḅie chuaḅẹ.

⁷ Ọkụma ọ́ kụrọma chịẹ se pịkị kuḅie lọkọ nyanama. Ọ́ nwẹngịarị fịrịma ḅe gbẹịnye ọ́ nwọ nyanaḅịa.”

⁸ Esa ḅe, ịkịankoro Azaraịya Odẹd yaḅe ḍukoarịaye ma naa sịkị, ò kuḅie kụrọmẹ. Juda sẹ mị na Bẹnjamin sẹ mị na ḅie sime oru mamgba ò dekigbin wokumamẹ, pịkị ori owuḅie ọkị Ifrem chịngị sẹma oru ma na. Oputẹkẹwarị odo ḅie chịẹsime Nyanaḅọ Ḅe oria agbamịẹ ẹbẹ mị sọnị ori anị tẹlịmamẹ.

⁹ Tọn apụ Ifrem na, Manasẹ na, pịkịna Simiọnị na ḅie ḅụ sime apụma na saḅa ḅo Esa ḅe anga sọmẹ, ini oria sẹ mị ḅie angamẹ, anịatịḅị ini ọrịmẹ na Nyanaḅọ Ḅe ori ori na omi-ẹ. Esa ḅe, Juda na pịkị Bẹnjamin ḅie sime apụ mamgba na chịn koḅirimẹ.

¹⁰ Ini Jerusalẹm ḅie koḅiriamẹ anị Esa ḅe ḅo amanyanaḅọ sọ jie karama kụra mị ḅụ tẹrẹ karama akalụ mị ḅie.

¹¹ Anị ene mị ḅie ini agba mịẹ Nyanaḅọ Ḅe pịrịmẹ ini ọmụ ḅie ini ọkịḅo ayema ḅụ: ikpoki nambulo ḅụ ẹndẹ jieasi fịnjị na anana oyimẹndẹ fịnjị na.

¹² Ini ọḅọkụ fịmẹ ḅịpị ogbosọ ḅụ na Nyanaḅọ Ḅe anị ini tẹkẹḅịaye-ẹ, inia olomu-aḍapụma Tamụnọ Ḅe, inia kuḅie na inia tẹmẹ mgba na.

¹³ Nweniḅọ goyegoye, anị ḅọrọ kalatọkụ, anịkanịka sẹnịḅọ, owuḅọ, anịkanịka eremeniḅọ, se Nyanaḅọ Ḅe tẹkẹkaḅọ nụḅọ ḅaa ḅụsọḅịa.

¹⁴ Oloku pụkọḅụ ini Nyanaḅọ Ḅe ẹrẹḅụ yekarịfịmẹ, na ọḅọkụ mị ini anị kokoḅịa, se oloku so sịkị ini ḅo oḍu ma ofuromẹ.

¹⁵ Juda apụ mamgba ini ḅieḅẹlẹmẹ anịatịḅị ini inia kuḅiemgbọlụ mgba se ọḅọkụ mị fịmẹ. Nyanaḅọ Ḅe tẹkẹ mị inia ḅụḅẹlẹye sọmẹ, ori sọnị ori ini ọkịmẹ seni dein se ini pịrịmẹ nyọ mamgba ḅụ.

¹⁶ Amanyanaḅọ Esa ḅe oria opunyengiḅọ Meaka ma árịa kiriḅụ ori á sin koromamẹ, anị amanyanaḅọ nyengi kiri mị ḅụ, anịatịḅị Ashera eremeni oru mị á nwọ kara koromamẹ na àrị mị fịaye pakụmarịye-ẹ. Esa ḅe oru mị ori anị pẹlẹgbin se anị gbogbo kọsịma, pịkịna anịaḅụ kọsịaye ma seni Kidrọn Pẹsịkiri mị ḅie ḍọkịma famamẹ.

¹⁷ Esa ḅe ama mamgba ḅie sime oru tẹkẹ-a nyọma ọ̀ nwọ kansinkẹ nwọḅẹ sọnị, ò kuḅiemgbọlụ se ḅụgbana na iḅiḅọ sọ Nyanaḅọ Ḅe pịrịmẹ oria ḍumo ene mamgba ḅụ.

¹⁸ Ḍawu Abaịja ḅe se osiḅụ wẹrị Tamụnọ Ḅe pịrịaye mamgba ori àrị se mun Oputẹkẹwarị ḅie koromamẹ, ori na mịnaḅụ na se osiḅụ wẹrị Tamụnọ Ḅe pịrị goli ma na, seleḅa mamgba na sọnị.

¹⁹ Owu ḅarị koroka ọkịmun ori amada kụra soi sọnọ-a kụra fịnjịma nwọ lamẹ.