BaEfesi 2 - Biblia Umwikemo 1996

Ukufụma mbufwe ukwịngila mbūmị

¹ Umwe ịjolo mwafwịle panōngwa ja ngịlanịo nubutulanōngwa bwinụ.

² Pakabalilo kala aka ịjolo mụlinkwenda ukulukōnga ulwendo ulubị̄bị ulwa nkị̄su iki, mụlinkuntị̄la unndagilị gwa maka ga mụmpālānga, mbepo uju lilino nndagilị gwa bāndu aba batịkuntị̄la Kyala.

³ Nanụswe twesa twafwene nabo; tulinkwenda mfịnyonyo fya mịbili gyitu, tulinkubōmba isya bwịgane bwa mmbili nubwa nyịnogono; kangi nkajīlo kītu, tulinkuja bāna ba ngalalisị ukufwana nabāngi bōsa.

⁴ Umwene Kyala lolị gwa lupākisyo ulwịngị. Alinkutugana nulugano ulukīndilisị,

⁵ napapo uswe twali bafwe panōngwa ja ngịlanịo syitu, ātupelịle būmị lumo na Kilisịtị. Mo mụ mwịpyana lya Kyala mụno umwe mụbwagị̄le ubupokị.

⁶ Bo tuli pamopēne na Kilisịtị Jesụ, Kyala ātusyusị̄sye lumo nagwe, ukuti tukajege balagilị pamopēne nagwe kumwanya.

⁷ Alinkubōmba sịsịsị ukuti ntubalilo utu twịsakwịsaga, ịse atunāngisyege ubwịngị bwa ịpyana lyake ilịkīndilisị, mbōlōlo bwake kumyitu mwa Kilisịtị Jesụ.

⁸ Namanga mo mwịpyana mụno mụbwagị̄le ubupokị. Isyene sịsịsị sịkafụma namaka gīnụ, himma, fyo fyabupe fya Kyala.

⁹ Kangi sịkafụma mụmbōmbo syinụ, ukuti najumo angị̄tụ̄fyaga.

¹⁰ Namanga uswe tuli fịbūmbịgwa fyake, tupēlị̄gwe mwa Kilisịtị Jesụ ukuti tubōmbēge imbōmbo īnụnụ, twe Kyala atutendekekịsye ngānị ukuti mo twendege.

Ukuja jumojwene mwa Kilisịtị

¹¹ Bunobuno lelo mụkūmbukege ukuti ịjolo mwali bāpānja ịtolo ummbili, mwe mụkujobị̄gwa ukuja basịtakubụ̄tịgwa nāba babūtị̄gwa, ububụ̄tịgwa ubu bụkubōmbịgwa mụmmbili namaboko,

¹² nukuti nkabalilo kala mụkāli na Kilisịtị, mwali bahēsya ịtolo kukikolo kya banya Ịsịlaelị, mwali bā kūnja kunyị̄tikano sya lufị̄ngo, mwali basịtalusūbilo, kangi mụkāli na Kyala nkị̄su iki.

¹³ Lolị lilino mwa Kilisịtị Jesụ, umwe mwe mwali kubutalị ịjolo, mụsegelesị̄gwe niịlopa lya Kilisịtị.

¹⁴ Namanga umwene Kilisịtị jo lutēngāno lwitu, atukamandēnịe twe twali pabili Abajụ̄ta na abapānja twịpelịle ukuja jumojwene, apāngwịle ilịmato ilya bulugu, ili lyatutapulēnịe.

¹⁵ Ālyomwịle ululagilo lwa Bajụ̄ta pamopēne ningomēlesyo syabo nutulagilo twabo, ukuti mmyake abapelege abāndu babili ukuja mụ̄ndu jumojwene umpya, bunobuno lelo alinkupela ulutēngāno.

¹⁶ Mụmmbili gwake Kilisịtị, alinkukigoga ikilugu kyabo mụ nkikohekano; bo babīli alinkubasajanịa na Kyala.

¹⁷ Po papo lelo Kilisịtị bo ịsịle, alinkubafụmụkisya īndumị inụnụ ija lutēngāno mwesa, kuli mwe bāpānja, mwe mwali kubutalị na Kyala na ku Bajụ̄ta aba bāli pabupị̄pị na Kyala.

¹⁸ Namanga kunjila jake uswe twesa, Abajụ̄ta nabāndu aba fịkolo ifị̄ngị, tubagị̄le ukusegelela kwa Tāta mwa Mbepo jumojwene.

¹⁹ Po papo lelo mụlekịle ukuja bāndu ba kūnja nukuja bahēsya, lolị mụli bajēnganịsị nabị̄kemo, mụli bāndu ba nnyụ̄mba ja Kyala.

²⁰ Mụjēngị̄gwe palwalo lwa batumịgwa nabakụ̄ngụlụka, umwene Kilisịtị Jesụ jo ịpelịle ịbwe lya pāngụto ilịkulūmba.

²¹ Mmyake mo mụno īnyụ̄mba jōsa jị̄lūngisēnịe, ịkujikusya jịkwenda nukwịpela nyụ̄mba ja NTWA īnyị̄kemo.

²² Nkwịkūngịsanịa nagwe, nanụmwe mụjēngị̄gwe pamopēne mwesa, mwịpelege bo butugalo bwa Kyala mwa Mbepo.