PROVERBS 25 - Navajo Bible

Aheełt'éii índa ał'ąą át'éii áádóó t'áá ákogi át'éego bee na'nitinii

¹ Júdah dine'é aláahgo binanit'a'í Heziikáíyah éí diné bá nidaashnishii díí ałdó' saad bee dahodoodząąłii Sálaman yee ak'e'ashchínígíí yééda'iidlaa.

² Diyin God t'áadoo le'é neinił'inii bee baa ha'niih, nidi aláahgo naat'áanii danilíinii t'áadoo le'é nideiiłkaahii bee baa daha'niih.

³ Yádiłhił ánízádígi át'éego áádóó nahasdzáán íídéetą́'ígi át'éego t'áá ákót'éego ałdó' aláahgo naat'áanii danilíinii dabijéí doo bééjółkááh ádaat'ée da.

⁴ Béésh łigaii bąąh hahidiłhį́hígíí nahjį' kónílééh, áko atsidii éí beedí ayóó ánóolninii íidoolííł.

⁵ Aláahgo naat'áanii bá diné doo yá'ádaashóonii nahjį' kónílééh, áko t'áá ákogi át'éego nant'áa doo.

⁶ Aláahgo naat'áanii binááł náás í'dóólt'e' lágo, áádóó diné aghádahideezíinii bitsásk'ehgi t'áadoo na'ádiyíltéhí.

⁷ Naat'áanii yiniłtsánígíí binááł t'ą́ą́' anáni'doolt'e'jí doo yá'át'éeh da. Hágo kodi hasínááh, ni'doo'niidgo éí agháago yá'át'ééh.

⁸ T'áadoo le'é deiłtse'ígíí t'áadoo tsxį́įłgo aa dahwiinít'į́įjį' bił náhidiilyeedí, doodaii' bił kééhót'íinii t'óó baa yáhásinígi ániilaago t'áadoo baa nináánáodza'í da dooleeł.

⁹ Nidi biniinaanii éí bił kééhót'íinii t'áá bí bił nabik'íyádííłtih, áádóó diné náánáła' neinił'inii t'áadoo bits'ą́ą́' baa nahólne'í.

¹⁰ Éí doodaii' yidiizts'ą́ą'ii biniinaa naatįįh nádáahgo naa yáhodoosįįł, áádóó t'óó nichǫ́'ógo bee naa hóóne'ígíí ts'ídá doo ná baa hodiyoo'nah da.

¹¹ Saad beełt'éego bee ha'oodzíi'ii éí béésh łigaii nidaneez'áago óola bee bilasáana bida'alyaii bídadiilyį́į'ii nidahalin.

¹² Diné hóyáanii éí diné ak'eh hół'íinii yich'ahashkéii éí óola jaatł'óół nahalin, áádóó óola nídoolyį́į'ii bee ił dah nátį́hí ályaaígíí nahalin.

¹³ Da'agizhgo yas taah yijaa'go dayoodlą́ą'go yee hwiih daazlį́į́'; t'áá éigi át'éego ba'ahódlíigo hane' nei'áii binanit'a'í danilíinii bííł'aadii yik'éé dahwiiłtaad.

¹⁴ Diné díí aa deeshłééł níigo yee ádaa ha'niihii, nidi doo aa yíléégóó éí k'os níłtsą́ bąąh ádingo t'óó bił nídiiyołígíí nahojílin.

¹⁵ Naat'áanii bich'į' ha'jólníigo bíni' bá áhozhdoolííł, áádóó hazhó'ó bich'į' hadziidziihgo dooda yee yistee' yę́ę lą́ adoohłeeł.

¹⁶ Da' tsés'ná bitł'izh bik'ííníyá? Doo bénínánílkoh da dooleełígíí biniyé t'áadoo áde nánídį́hí; t'áá bee hwiih nánídleehíjį' niyą́.

¹⁷ Bił kééhót'íinii doo ádandidoohłaał da, áko doo nádoolnih da doo biniyé łáhída bił yah anánídááh.

¹⁸ Diné yił kééhat'íinii t'áá ádzaagóó yaa táhodilníihii éí na'abaahjí tsihał áádóó diltłish índa k'aa' deeníinii nahojílin.

¹⁹ Hach'į' hodiiznáa'go diné doo bazhdí'nóodlíí' át'éii beijólíigo éí hawoo' k'é'éltǫ'ígíí bił aheełt'é áádóó hakee' hááwodígíí nahalin.

²⁰ Diné t'áá íiyisí yínííł nilíinii sin bee bá hojitaałgo éí ayóó íídéesk'aazgo ha'éé' hazdiiltsoozígíí nahalin, áádóó ch'il na'atł'o'ii bitoo' dík'ǫ́zhígíí bił é'él'íní iiłtsxóohii bił tanjizhgizhígíí nahalin.

²¹ Ni'ana'í dichin nilį́įgo bááh yidooyį́łígíí baa díí'ááł, áádóó dibáá' nilį́įgo tó yidoodlį́łígíí baa dííkááł.

²² Háálá ákwíindzaago bitsiit'áagi tsííd yéinitsih nahalingo ádíílííł, áádóó Bóhólníihii nich'į' ni'doolééł.

²³ Náhookǫsdę́ę́' diyołígíí níłtsą́ hayé'ésoł, áádóó nák'ee'ąądę́ę́' na'íyáłti'ii éí diné báhóóchįįd noolningo áyiił'įįh.

²⁴ Asdzání saad biiłhéii hótsaa góne' bił haghanjí doo yá'át'éeh da; kin bighą́ą'di bee nástł'ahdi t'áá sáhí haghanjí agháago yá'át'ééh.

²⁵ Kéyah nízaadę́ę́' hane' yá'át'éehii haa yít'ánígíí éí t'áá íiyisí dibáá' dzizlį́į'go tó sik'azii joodlą́'ígíí nahalin.

²⁶ Diné t'áá ákogi ááníiłii diné doo yá'áshóonii t'óó yich'į' lą́ oohłeełii éí tó háálį́įgo tááchxąą'ígíí áádóó tóhahadleeh góyaa tó yíchǫ'ii nahalin.

²⁷ Tsés'ná bitł'izh t'óó ahayóí jiyą́ągo doo yá'át'éeh da; t'áá ákót'éego ałdó' diné t'áá bí bee baa dahodoo'nihii hadeintáhígíí éí doo aa ha'niihii át'ée da.

²⁸ Diné doo ádaa áhályáanii éí kin haal'áago atílyaadóó doo binaa ahééda'astł'in da nít'é'ígíí nahalin.