PROVERBS 23 - Navajo Bible

¹ Naat'áanii bił adííyį́į́ł biniyé bił dah níkeehgo nidááhgóó naazkáanii hanisíidgo hazhó'ó baa nitsíníkees doo.

² Ayóogo íyą́ągo nizágí bich'į' béésh dah yí'áałgo íyánígíí t'ą́ą́' kwíínísin.

³ Ch'iyáán yee ni'dileehígíí bąą bich'iyą' ałtaaskąądí t'áadoo bídin nílíní.

⁴ Adíít'įįłígíí t'áadoo baa naanish niiłhéhí; t'áadoo t'áá éí t'éí baa nanináhí.

⁵ T'áadoo nánídlíiniísh hadínííltsééł? Háálá yót'áahdi atsá naat'a'ígíí nahalingo dajit'íinii bit'a' ádayiił'įįhgo yóó'adahat'ah.

⁶ Bił hatsxohii bibááh t'áadoo niyání, áádóó ałtaaskąądii yiyánígíí t'áadoo bídin nílíní.

⁷ Háálá t'áá ádíyi'ídi nitsíkeesígi át'éego t'áá ákót'éego hiná. Íyą́ áádóó ídlą́, niłní, nidi bijéí biyi'dóó doo hánígo naa nitsíkees da.

⁸ Ch'iyáán yíníyą́ą́' yę́ę béédíílkoh áádóó nizaad daalkanii t'áadoo biniyéhí da doo.

⁹ Doo áhályáanii t'áadoo bich'į' yáníłti'í, háálá saad bee hódzáanii bee yáníłti'ígíí yidoo'įįł.

¹⁰ T'áá náshiinídą́'ídi kéyah bee bééhózin biniyé tsé adaastsih yę́ę doo nahjį' kódadíílíił da. Áłchíní bizhé'é ádaadinii dabikéyah t'áadoo bee ádíhwíínílníhí,

¹¹ háálá Náádabidiyoołnihii ts'ídá t'áadoo bee bóodziilí da; ádéíníł'įįdii biniinaa naa nídóot'įįł.

¹² Bí na'niltinii nijéí baa diní'aah áádóó saad bee ił ééhózinii yísíníłts'ą́ą́'.

¹³ Áłchíní bee hasht'e'nehedlóosii t'áadoo bits'ąą síníłtání, háálá náníníłhaalgo doo dadootsaał da.

¹⁴ T'áá bí tsin bee nídínííłhał, áko hool'áágóó ti'hoo'nííh bił haz'ą́ bits'ą́ąjį' bii' sizíinii yisdádííłtééł.

¹⁵ Shiye' nílíinii, nijéí hóyą́ągo shijéí bił hózhǫ́ǫ dooleeł, t'áá shí shijéí bił nihoozhǫǫh doo.

¹⁶ Jó, t'áá ákogi át'éego yáníłti'go shijéí bił nihoozhǫǫh doo.

¹⁷ Ádił nida'iilzíihii t'áadoo nijéí bee yiníłch'į́dí, nidi t'áá áłahjį' Bóhólníihii díínísin.

¹⁸ Háálá t'áá aaníí náás ná honít'i' doo, áádóó nił chohoo'íinii doo nits'ą́ą́' k'éé'doolchǫǫł da.

¹⁹ Íísíníłts'ą́ą'go honíyą́, shiye', áádóó yínááłgóó nijéí baa áhólyą́.

²⁰ T'áá áłahjį' wáin adeisłíinii t'áadoo bitahgi nanináhí, áádóó ayóogo da'alghałii t'áadoo bitahgi nanináhí.

²¹ Háálá da'adláanii áádóó ayóogo da'alghałii té'é'į́ bidi'nóoghą́ą́ł, índa bił t'éí yaa naagháii bi'éé' anilí t'éí dooleeł.

²² Nizhé'é nishchíinii yísíníłts'ą́ą́', áádóó nimá haastihgo t'áadoo ni'íní.

²³ T'áá aaníinii nahíłniih; t'ááká éí naa nahóniih lágo; hódzą́ áádóó bína'niltinii índa bee ak'idi'yiitįįh ałdó' nahíłniih.

²⁴ Diné t'áá ákogi ááníiłii bizhé'é baa bił nihoozhǫǫh doo, áádóó haye' há yizhchíinii hóyą́ągo nooséełii baa hoł hózhǫ́ǫ doo.

²⁵ Háni'dii nizhé'é áádóó nimá bił hózhǫ́, áádóó nishchínígíí háni'dii naa bił nihoozhǫǫh.

²⁶ Shiye' nílíinii, nijéí shaa diní'aah áádóó ánísht'éii hazhó'ó hanisíid le'.

²⁷ Háálá kin yąąh sizíní éí wóyahgo tó bá ígeedígíí nahalin índa adiléii éí ahoodzą́ągo bidáa'jį' heets'ózígíí nahalin.

²⁸ Agha'ii'níiłii nahalingo aa háasdáa łeh, áádóó diné bida'asdzą́ą́ yinda'alo'go ádeile'go k'ee'ąą yilzhish.

²⁹ Háísh yíiyá ní? Háísh yínííł nilį́? Háísh saad hółǫ́? Háísh saad biiłhé? Háísh t'áadoo biniinaanígóó tídááná? Háísh bináá' łichxíí'?

³⁰ Nízaadgóó da'adláanii lą́ą; wáin ałtaa nínádeidzi'ii haintáii lą́ą.

³¹ Wáin bighá jíchii'go t'áadoo baa nánít'íní; bee adlání bee siką́ągo bizhéé' ha'niłhoshgo ayi' góyaa ahidinaadgo t'áadoo baa nánít'íní.

³² Bílátah dahalzhishgo tł'iish nahalingo adiłhash, áádóó tł'iish ánínígíí nahalingo adiłhash.

³³ Doo béédahózinii nił át'į́į doo, áádóó nijéí biyi'dóó nahagizgo ádaat'éii bee yáníłti' doo.

³⁴ T'áá aaníí tónteel biyi'di dah nani'eeł nahonílin doo, doodaii' tsinaa'eeł ałníi'gi tsin dego yaa'áa łeígíí bílátahgi binahizhdíłtį́ nahonílin doo.

³⁵ Nídashideests'in, nidi t'áadoo haada yisdzaa da, diníi dooleeł. Nídashineesxaal, nidi t'áadoo baa ákoniizį́į' da. Hahgo lá ch'éédeesdził lá? Ła' hanáádínéeshtaał, diníi dooleeł.