PROVERBS 22 - Navajo Bible

¹ Jit'íinii ayóó ánéelą́'ígíí biláahgo yízhí yá'át'éehii nideet'aahjígo yá'át'ééh, áádóó béésh łigaii índa óola biláahgo ach'oha'né nideet'aahjígo yá'át'ééh.

² Da'at'íinii áádóó badahojoobá'íii ałtaaldeeh, háálá t'áá ádzíłtso Bóhólníihii áhoolaa.

³ Diné hóyáanii doo yá'át'éehii yiyiiłtséehgo yits'ąą nídít'į́į́h, nidi diné doo hóyáanii éí doo yá'át' éehii yich'į' t'áá háoghááh, áádóó yik'ee ti'hoonih.

⁴ Bóhólníihii yidósinii áádóó yich'į' a'ohgo ádaa nitsíkeesii éí jit'íinii áádóó bee ił ídlį́ índa iiná bee dahólǫ́.

⁵ Diné nahagizii doo nahjį' niidó'ááł át'éégóó hináanii éí hosh índa łoh bá hólǫ́, nidi diné hwii' sizíinii baa áhojilyáanii éí ákót'éii nízaadi bits'ą́ądi hojílǫ́.

⁶ Áłchíní hináa dooleeł góne' bínabiníłtin, áko nininísą́ągo éí doo yits'ádoogáał da.

⁷ Diné at'íinii éí diné badahojoobá'íii yinant'á, áádóó diné ba'ílyáii ha'níláhígíí bá nijil'a'.

⁸ Doo ákwii át'éii k'izhdííláhígíí éí t'áadoo dabiniyéhíii áłah ázhdoolííł, áádóó háháchį'go nazhnit'áhígíí nidoot'ih.

⁹ Diné bił hadlee'ii bik'ihojidlíi doo, háálá badahojoobá'íii ya'ałtso'.

¹⁰ Diné ánahałt'i'ii ch'íhiníłhango ahináá'diiltłi'ii doo át'ée da doo, áádóó saad náhoodleeł índa ił ni'ít'įįh ádin doo.

¹¹ Diné bijéí a'át'e' bii' ádingo ayóó áyó'níinii éí jooba'go yáłti'ígíí aláahgo naat'áanii hak'is dooleeł.

¹² Bóhólníihii éí ił ééhózin yik'i déez'į́į'go yaa áhályą́, nidi diné nináda'dii'aahii bizaad doo ílį́į́góó áyoolííł.

¹³ Bił hóyée'ii kóní, Tł'óo'di náshdóítsoh bitsiijį' ditł'ooígíí naaghá; kintah da'nítiingóó shidiyoołhééł sha'shin.

¹⁴ Asdzání doo bééhózinii dabizéé' éí a'áán nízaadgóó ahoodzą́ nidahalin, áko Bóhólníihii t'óó haa'ih nízinii éí áajį' azajiikááh.

¹⁵ Doo áháyą' éí áłchíní bijéí bii'di hólǫ́, nidi tsin bee áłchíní nánílghałgo bee hasht'e'nehedlóosii éí doo áháyą' yę́ę nízaadgóó ayízdínóołhał.

¹⁶ T'áá háiida binaalye'é bá bilááh dooleeł biniyé badahojoobá'íii yide áhósinii áádóó at'íinii ya'iiníiłii éí t'áá aaníí hahojoobá'íii jidooleeł.

Bik'ehgo oodáałii áádóó bee ida'iisnii'ii

¹⁷ Diné hóyáanii bizaad yíníłts'ą́ą'go bíká nijaa' dííníł'á, áádóó shił bééhózinígíí nii' hólǫ́ǫgo íínísin.

¹⁸ Háálá éí nijéí bii' hólǫ́ǫgo nił nizhóní dooleeł, áko bee hadíídzihígíí bee hasht'e'ádíínílzin doo.

¹⁹ Bóhólníihii baa dzíínílíi dooleeł biniyé díí jį́ nich'į' bééhózingo íishłaa; éí t'áá ni nich'į' bééhózingo íishłaa.

²⁰ Da' doósh na'nitin áádóó ił ééhózin ayóó ádanóolninii bee nich'į' ak'e'shíł chį́į da?

²¹ Áko adanis'a'ii saad t'áá aaníinii bee bił náhodíílnih biniyé saad t'áá aaníinii doo naaki nilį́į́góó nił bééhodeesįįł.

²² Diné bahojoobá'íii éí t'óó bahojoobá'íígíí biniinaa t'áadoo łínícházhí, áádóó bich'į' nidahwii'náanii dáń'dítį́įhgi t'áadoo bide áhwíínísiní.

²³ Háálá Bóhólníihii bá atídoot'įįł, áádóó baa nahozdeeskaii éí Bóhólníihii áhodoołdįįł.

²⁴ Diné bíní si'áanii doo bił ałch'odíí'niił da áádóó diné bánáháchįįhii t'áadoo béédiilwo'í.

²⁵ Áko yee át'éii doo bíhwiidííł'áał da índa nii' sizíinii doo łoh biih díníí'ah da.

²⁶ Diné bąąh háá'áago niná'doodlééł biniyé yá bízhi' ádeił'íinii índa yee ahíláłk'ee nídadilnihii t'áadoo bee anítahí.

²⁷ T'áadoo nináódléłígóogo ha'át'íishą' biniyé nitsásk'eh niyaa hai'aah doo?

²⁸ Danizhé'é yę́ę kéyah bee béédahózin dooleeł biniyé t'áá náshiinídą́'ídi tsé adeiztsih yę́ę doo nahjį' kódadíílíił da.

²⁹ Diné naanish yiyiichįįhiísh ła' yíní'į́? Éí aláahgo naat'áanii danilíinii yidááhdóó néídzįįh doo; diné t'áá bita'ígi ádaat'éii doo yidááhdóó néidzįįh da doo.