PROVERBS 20 - Navajo Bible

¹ Wáin éí ánahałt'i'; tó tsi'na'iiłáii éí tsi'na'iiłá, áko t'áá háiida díí bee ádinjidlo'go doo hojíyą́ą da.

² Aláahgo naat'áanii bee bik'e'íyée'ii éí náshdóítsoh bitsiijį' ditł'ooígíí biyi' nahodi'ni'go ánínígíí bił ałk'eh; t'áá háiida aláahgo naat'áanii báhojííłchįįdígíí t'áá hó hwe'iina' atínízhdoodlííł.

³ Diné ahiní'diiltłáád yąąh ádít'íinii éí diné baa ha'niih, nidi diné doo ádahalyáanii éí saad dahółǫ́ǫ doo.

⁴ Hak'az biniinaa bił hóyée'ii doo nihwiiłdlaad da; éí bąą da'agizhjį' ahalzhishgo azhdókeed łeh, nidi t'áadoo hailyéhí da.

⁵ Diné bijéí biyi'dę́ę́' yá'át'éehgo na'nitinii éí níléí wóyahdę́ę́' tó yá'át'éehii hahadleehígíí nahalin, nidi diné bee ak'i'diitįįh bee hólóonii éí hayiileeh.

⁶ Diné k'asdą́ą́' t'áá ałtso t'ááłá'í nítínígo dajooba'ígíí yaa dahalne', nidi diné ba'ahódlíii bídin hóyéé'.

⁷ Diné t'áá ákogi át'éii doo bina'adlo'góó naagháii bikéédę́ę́' háánoot'áanii bik'idahojidlíi doo.

⁸ Aláahgo naat'áanii t'áá ákogi át'éii bibikáá'dóó nahat'áii yikáá' dah sidáago ha'asídígíí yee doo yá'ádaat'éehii ałtso nahjį' kóyiił'įįh.

⁹ Baa'ihii shijéí bii' ádingo áshłaa; ádił ni'iidzííh shąąh ádingo yá'ánísht'ééh. Háishą' ákódidooniiłgo yíneel'ą́?

¹⁰ Bóhólníihii éí béésh nídaazbąsii bik'ehgo dah adiyiidleehígíí binda'adlo'ii índa bee ída'neel'ąąhí bee ha'iikaahii bina'adlo'ii éí t'áá áłah doo yíłdin da.

¹¹ Azhą́ áłchíní nidi, áyoolíłígíí bee bééhózin; binaanish daats'í yá'át'ééh, índa binaanish daats'í t'áá da'áko.

¹² Ajaa' adiits'a'ii índa anáá' oo'íinii éí t'áá áłah Bóhólníihii ábiilaa.

¹³ Doo té'é'į́ nidí'nóołhéłígíí biniyé bił t' áadoo nił łikaní, ch'éénídzííd, áko bááh bee hwiih nílį́į doo.

¹⁴ Na'iiłniihí ání, Ayóo ílínéii, ayóo ílínéii, áko baa na'iinihdóó bik'ijį' nílááhgóó iigháahgo yee ádaa ha'niih łeh.

¹⁵ Óola hólǫ́, áádóó nitł'iz ałtaas'éí da'ílíinii t'óó ahayóí, nidi bił éédahózingo yádaałti'ii éí naadeełí ílíinii nidahalin.

¹⁶ Ayóní bá sézį́į dooleeł níigo naaltsoos bikáá' bízhi' áyiilaii ííshją́ą́ bi'éétsoh nídidííłtsos, áádóó ałjiłnii bá ákódziidzaago bee nihozhní'ánígíí binahjį' hwíínítą' doo.

¹⁷ Na'adlo' bee bááh shóot'eehii diné bił łikan, nidi áádóó bik'ijį' bizéé' góne' tsézéí hadeezbin nahalin łeh.

¹⁸ Nahat'á baa hwiinít'į́įgo hazhó'ó hasht'edaalne', áádóó kót'éego nidi'níigo anaa' áníł'į́.

¹⁹ Diné ła' aseezį́ nidzinii nidanil'inii nidi yaa halne' łeh; éí bąą ákót'éego bina'adlo'go yáłti'ii t'áadoo béédiilwo'í.

²⁰ T'áá háiida bizhé'é, doodaii' bimá yiyíídzíi'go éí bee hool'iní nitsisgo chahałhiłígíí nahalingo hwe'iina' nidoolt'ih.

²¹ Ch'óóshdą́ądi naalye'é íí' dooleełii tsxį́įłgo shóot'eeh, nidi nihoolzhíishdi doo bee ak'ihwiizhdoodliił da.

²² Shich'į' doo ákǫ́ǫ́ ájíít'įįdii k'ééhodideeshdlííł, t'áadoo diníní, nidi Bóhólníihii biba' ánít'é, háálá t'áá bí yisdándoołtééł.

²³ Bóhólníihii éí béésh nídaazbąsii bik'ehgo dah adiyiidleehígíí binda'adlo'ii doo yíłdin da, índa dah na'alo'í biyooch'íidii doo yá'át'éeh da.

²⁴ Diné joogáłígíí éí Bóhólníihii bee bóhólnííh. Ákoshą' ha'át'éego diné t'áá hó bik'ehgo joogáłígíí bik'izhdi'dootį́į́ł?

²⁵ Díí dólzinii át'é, jiníigo t'áadoo tsíhodeeskézí ádee hadzoodzíi'go áádóó bikéédę́ę́' t'áá hó niná' ízhdílkid, T'áá daats'í ákǫ́ǫ́ ásdzaa, jinínígíí bee tsistł'ajiyá.

²⁶ Aláahgo naat'áanii hóyáanii éí doo yá'ádaashóonii ąąh yoołch'ííh, áádóó tsinaabąąs bijáád bee ha'é'él'éés nahalingo hayé'éł'éés.

²⁷ Diné níłch'i bii' sizíinii éí Bóhólníihii bibee hool'iní át'éego diné bii' nahazt'i'gi t'áá ałtso haisííd.

²⁸ Aa a'ááh hasin índa t'áá aaníinii bee aláahgo naat'áanii nehedzííh, áádóó bee bóhólníihii aa a'ááh hwiindzin yee bidziil.

²⁹ Dinééh danilíinii yee dabidziilii yee ayóó ádaat'é, áádóó hastóí bitsii' deiba'ígíí bee baa dadzólní.

³⁰ Náhodi'niltsxisgo hak'i nidzisk'ą́ągo é'éł'ínígíí áádóó náhodi'niltsxisgo ayi' góne' baa ahiłch'iihígíí éí doo yá'áshóonii ałtso nahjį' kwííł'į́.