Zizieziziewɔlɩa Zozii pala 'lɛ Zaan na 'la ‑afluwaa 5 - Le Nouveau Testament en langue Dida

'Bhlabhlɩcoa ya ‑afluwaa ‑a ‑kpaslɩlɩɔ 'lɛ na kalɩ

¹ Na, n ya ɔmɔa ‑ɔ ‑kʋ 'lɛ ‑kwlekpoa 'kʋ sa na, 'la 'lipasɔ sɔa nɩkplaan ‑afluwaa bhlo 'lɩ. Ala 'kʋtaan ɩya ala nɩkplaan ‑zieo 'nyɩ ma ya 'lɛ ‑buziinyu 'ma, ma ya 'lɛ dɩ ‑ngbɔɔsɔ mɛ.

² 'Nyɩ n ya 'lɛ 'tɛtɩkalɩ ‑bhlaandlee* bhlo 'lɩ, ɔ ‑gaa nɩkplaan 'nyɩ ɔ claa lebhe: «Ncaasaa ‑ɔ ‑cɩ kaa 'lɛ ‑buziinyua ‑afluwaa cɩ ‑sa ɩya ɔ kaa 'lɛ kalɩlɩɛ mino bha?»

³ ‑Ma ‑laagɔɔn, ‑dʋdʋa 'kʋ ‑aana ‑gluuo, nclɔɔ ‑ylɛylɛ 'ta 'wlʋ ɩya ɔ 'ka ‑afluwaa kalɩlɩɛ mino ɩya ɔ 'kaa nɩkplaan kope.

⁴ Na, n ya ‑gbɔɔn 'tu, ‑ofɩ lebhe nclɔɔ ‑ylɛylɛ 'ta ‑lɩɔ ‑ɔya ‑afluwaa 'la kalɩlɩɛa ɩya ala nɩkplaan kopeliea ‑fata 'lɛ na.

⁵ ‑Ma ncaakpasɩa sidiin, bhlo yaan 'cla lebhe: «‑Naa 'tua! ‑Ma 'lɩka Zuda 'la 'lɔkpaa 'kʋ 'la ‑bhedia, Daviti 'la 'cʋa ya ‑sɩa. Ɔ cɩ 'ka 'la ‑buziinyua ‑afluwaa 'kʋ ‑sa ɩya ɔ 'kaa kalɩ.»

⁶ Na, n ya ‑kwlekpoa, mlaa ‑nmɔɔnaa ɩya ncaakpasɩa sidiin, 'bhlabhlɩco 'nylugoda 'lɩ, ɛ ‑kʋa le saa ma yɛɛ 'lɛ ‑blɩɩn 'dɩ na. Ɛ ‑kaa 'gwɩ ‑ngbɔɔsɔ ɩya 'ci ‑ngbɔɔsɔ ‑ɩ ‑glɩ 'lɛ Laagɔ 'la 'wugwia ‑ngbɔɔsɔa ɔ lobhu 'lɛ ‑dʋdʋa 'kʋ ‑daa ‑tɛtɛa na.

⁷ 'Bhlabhlɩcoa ya ɔmɔa ‑ɔ ‑kʋ 'lɛ ‑kwlekpoa 'kʋ sa na, 'bɩɩn mʋnʋ le ɔ 'kɛɛ ‑afluwaa ‑a ‑kʋ 'lɛ ɔla 'lipasɔ sɔa nɩkplaan 'nyɩnɩ.

⁸ Na, daa ɔ 'nyɩnɩɛ 'lɛ ‑afluwaa na, mlaa ‑nmɔɔnaa ɩya ncaakpasɩa ‑glʋʋ ɩya ‑nmɔɔnaa ya 'bhlabhlɩcoa ‑deliin ‑kukoonkplii sasla. Nclɔɔ nclɔɔ ‑kaa gbagbalʋʋ ɩya ‑asɩkɛkɔbhʋ ‑ɩ yee 'lɛ donyi 'kʋ na. Ɩmɩ ‑ɩ ‑glɩ 'lɛ ‑kplɔkplɔnyaa 'la bhibhiea.

⁹ Ma bhlɩa lalelu, ʋ claa lebhe: «‑N ‑ya ‑afluwaa 'la 'malɩɛa ɩya ala ‑buziinyua 'la 'kʋ ‑salɩɛa ‑fata, sa ma ya ‑mɔɔ 'bhlaa 'nyɩ ‑n ya 'lɛ ‑naa ‑dolua 'ma, ‑n ya 'lɛ 'lɔkpʋa ‑tɛtɛa 'kʋ 'la ncɛlɩ, 'bhlɩwɔlɩa ‑tɛtɛa 'la nyɩtɛnya, 'lɔlɩa ‑tɛtɛa ɩya 'bhlɩ 'bhlɩ 'kʋ 'la ncɛlɩ nɩkplaankplɩ le ‑n ka Laagɔ 'nyɩ.

¹⁰ N ya maa ‑ala Laagɔ 'la Nyɩbhɛlɩdua* nɩkplaan blee 'nyɩ ‑n ya 'lɛ maa ‑teyiyinya ple, le ‑dʋdʋa 'kʋ, ma 'ka ‑kwle.»

¹¹ 'Nyɩ n ya ‑awlɛ 'bhlaandleecɩ ‑bhutukpa 'lɩ, ma ‑didioa ‑kwlekpoa, mlaa ɩya ncaakpasɩa. Ma 'taa ne ‑ka. N ya mala ‑blɩɩzɔn 'nu,

¹² ma ‑gaa nɩkplaan 'nyɩ ma claa lebhe: «'Bhlabhlɩcoa ma 'bhla 'lɛ na, ɛya ‑kwlelie, leyli, dɩgalɩ, 'tɛtɩ, 'ŋwleenfalɩlɩɛ, 'klʋagba, ɩya ‑evliwolɩɛ ‑fata.»

¹³ Nʋnʋlɩɩa ‑tɛtɛa ‑ɩ ‑kʋ 'lɛ ‑laagɔɔn, ‑dʋdʋa 'kʋ, ‑gluu ɩya gea nɩkplaan na, n yɩɩ neen 'nu, 'nyɩ ɩ claa 'lɛ lebhe: «‑Evliwolɩɛ, 'ŋwleenfalɩlɩɛ, 'klʋagba ɩya ‑kwlelie 'plɩ ɔmɔa ‑ɔ ‑kʋ 'lɛ ‑kwlekpoa 'kʋ sa na, ɩya 'bhlabhlɩcoa 'la da 'lʋkʋlʋkʋ ɩya 'lʋkʋlʋkʋ.»

¹⁴ Mlaa ‑nmɔɔnaa ya 'claa lebhe: «Ɩ kʋ sɛɛ!» 'Nyɩ ncaakpasɩa ya 'lɛ ‑kukoonkplii sasla, 'nyɩ ma ya 'lɛ gʋgwla.