Zizieziziewɔlɩa Zozii pala 'lɛ Zaan na 'la ‑afluwaa 2 - Le Nouveau Testament en langue Dida

Efɛzɩdua 'kʋ 'la ‑laagɔnɩkplaa 'la ‑afluwa

¹ Zie Efɛzɩdua 'kʋ 'la -laagɔnɩkplaa 'la 'bhlaandleea* ɩya ‑n 'clɔɔ lebhe: 'Lɩka saa ɔmɔa ‑ɔ ‑ka 'lɛ ‑zɔlʋa ‑ngbɔɔsɔa ɔla 'lipasɔsɔa nɩkplaan, 'nyɩ ɔ namʋnʋ 'lɛ ‑asɩkɛ ‑buziigɩlɩɩa ‑ngbɔɔsɔa sidiin na, nyɩtɛ 'lɛ na:

² N ‑ci ‑naa nʋnʋgbɩa, ‑naa sɛsʋa ɩya ‑naa pɔɔklalɩɛa. 'Nyɩ ‑n ‑ci lebhe ‑n mino 'ta ɩya ‑n ‑ya ‑abhɔlɛnya 'ka 'kʋkʋkʋlʋ. ‑N ‑ya maa ‑ɔ la 'lɛ macɩ lobhulobhunya* 'nyɩ ‑ɔ 'ta 'lɛ maa ‑glɩ ‑ma na 'gbuzu ‑zɔn 'pa 'nyɩ ‑n ya 'lɩ lebhe ma ‑glɩ yodizʋnya.

³ ‑N ‑ci pɔɔklasa: ‑N ya 'na 'ŋlɩa 'la gbʋ sɛ 'nyɩ 'nyɛkɛ 'tɔɔ 'kɔtɔ.

⁴ ‑Ma, ‑n ‑ka wɔlɩ bhlo, ɩ 'taan 'tʋ ‑ka. Ɩmɩ ‑ɩ ‑glɩ 'lɛ lebhe: ‑N 'tanɩɩn ‑wa le saa ‑n ‑wa ‑amʋa 'lɛ ‑bɛkadaa na.

⁵ Na 'maa luoli daa ‑n 'wlʋlʋ 'lɛ 'nyɩ ‑n ya 'lɛ bhli na! Cala kwla ɩya ‑n nʋ ‑naa ‑godogodo -nʋnʋgbɩa. ‑N 'ta sɛɛ na, n cɩ 'kɔɔ 'bhlɩ ci ɩya n 'ka ‑naa ‑buziigɩlʋʋa ʋla daa ‑sa.

⁶ ‑Ma, cee ‑naa 'kʋ, n ‑yɔɔsɔ ‑plɔ. ‑Amʋ 'bhisa, Nikolaa 'la ‑kandinyaa 'la nʋnʋgbɩa 'tɔɔ 'tʋ ‑ka.

⁷ Ɔmɔa ‑ɔ ‑ka 'lɛ 'nyukwli na, 'naa ɔ 'nu ɩmɩa 'Wugoa solu 'lɛ -laagɔnɩkplaa 'la -kandia na. Ɔmɔa ‑ɔ -cɩ ka 'lɛ ‑sɩa na, n cɩ 'kɔɔ jabhʋa 'la sua ‑ʋ ‑kʋ 'lɛ Laagɔ 'la 'kɔkuoa nɩkplaan na 'la 'caa lida 'nyɩ.»

Siminidua 'kʋ 'la ‑laagɔnɩkplaa 'la ‑afluwa

⁸ Zie Siminidua 'kʋ 'la ‑laagɔnɩkplaa 'la 'bhlaandleea* ɩya ‑n 'clɔɔ lebhe: 'Lɩka saa ɔmɔa ‑ɔ ‑glɩ 'lɛ ‑bɛka -naanɔa ɩya bhɩalɩ -naanɔa, ‑ɔ 'ku 'lɛ 'nyɩ ‑ɔ ‑bho 'lɛ 'kwɩɩn 'kʋ na, nyɩtɛ 'lɛ na:

⁹ N ‑ci ‑naa sɛsʋa ɩya ‑naa ŋaazɩa, 'bhlɩmɔɔn ‑n ‑lio 'bhɛlɩ! N ‑ci wɔɔnyinyia maa ‑ɔ la 'lɛ macɩ Zifʋnya* 'nyɩ ‑ɔ 'ta 'lɛ maa ‑glɩ ‑ma na, nyɩtɛlɩɔ 'lɛ cɩ na. Sataan* 'la ‑kandinya ma ‑glɩ 'lɛ!

¹⁰ 'Kwlɩa ‑ɩ ‑cɩ kɔɔ 'lɛ bhɩa na, 'la ŋanɔ 'la 'bhlɔɔ. 'Lɩka, gɔzɛ cɩ 'ka ala sidiin 'la ncɛlɩ ‑palʋʋn 'pa, le ɛ 'ka anyɩ gbɩɩncla ɩya 'kwlɩ 'ka anyɩ bhɩa ‑aan clɩɩ 'kʋgba. ‑Ma kalɩ 'na pɔɔtɛtɛ ‑aan ‑naa 'kuda ɩya n 'ka jabhʋa 'ma n 'kɔɔ dlu ‑plʋ.

¹¹ Ɔmɔa ‑ɔ ‑ka 'lɛ 'nyukwli na, 'naa ɔ 'nu ɩmɩa 'Wugoa solu 'lɛ ‑laagɔnɩkplaa 'la -kandia na. Ɔmɔa ‑ɔ ‑cɩ ka 'lɛ ‑sɩa na, ɔ cɩ 'ta ‑mɔsɔkwɩa 'ku.

Pɛlɩgamʋdua 'kʋ 'la ‑laagɔnɩkplaa 'la ‑afluwa

¹² Zie Pɛlɩgamʋdua 'kʋ 'la -laagɔnɩkplaa 'la 'bhlaandleea* ɩya ‑n 'clɔɔ lebhe: 'Lɩka 'saa ɔmɔa ‑ɔ ‑ka 'lɛ ‑baandua ‑ʋla nia ‑mɔsɔa nɛ 'lɛ na, nyɩtɛ 'lɛ na:

¹³ N ‑ci ‑naa sakʋdaa da. Dɩpɩa Sataan* 'la ‑kwlekpoa ‑kʋ 'lɛ. ‑Ma ‑mɔ, ‑n ‑kʋlʋ ka ‑azla 'na 'ŋlɩa nɩkplaan, 'nyɩ Antipasɩ 'na ‑gɩga ‑danʋfʋɛlɩnyɔa ma 'bhlalɩwa 'lɛ a 'bhlɩdua nɩkplaan, daa Sataan 'la sakʋdaa ‑kʋ 'lɛ na, 'la 'bhlɛsʋa nɩkplaan 'titio, ‑n 'ta pɔɔtɛtɛa ‑n ‑zʋɔ 'lɛ 'kʋ na ‑blɔ.

¹⁴ ‑Ma ‑n ‑ka wɔɔcɩ ‑zlʋsaasa, ‑ɩ 'taan 'lɛ 'tʋ ‑ka na, ɩmɩ ‑ɩ ‑glɩ lebhe: N ‑ka 'yɛpɩ ncɛlɩ ‑ɔ gɩlɩ 'lɛ Balamʋ 'la cacawɔlɩa na. Balamʋ ‑naa ‑ɔ caa 'lɛ Balakɩ saa ɔ cɩ 'kaa 'lɛ Izlayɛlɩcuoa* 'gbuzu ‑zɔn 'papalɩ ɩya ɔ 'ka gba ma 'kaa ‑zliigʋgwlamla li ɩya ma 'kaa ‑badaaglu li na.

¹⁵ ‑Anʋa ‑kʋa ‑awlɛɔ 'yɛpɩ 'bhlɩ ‑ɔ gɩlɩ Nikola 'la ‑kandinyaa 'la cacawɔlɩa na.

¹⁶ Na, 'maa calakwla. ‑N 'ta sɛɛ na, n cio 'yɛpɩ 'bhlɩ, clɩɩ ‑klipɛ nɩkplaan ɩya n 'ka 'na neen 'la ‑baandua 'ma ɩya n -ya maasɔ 'ka tʋ vʋ.

¹⁷ Ɔmɔa ‑ɔ ‑ka 'lɛ 'nyukwli na, 'naa ɔ 'nu ɩmɩa 'Wugoa solu 'lɛ -laagɔnɩkplaa 'la -kandia na. Ɔmɔa ‑ɔ -cɩ ka 'lɛ ‑sɩa na, n cɩ 'kɔɔ ‑laagɔɔn 'la nyɩa ‑ɩ ‑zizieo 'lɛ na 'nyɩ ɩya n 'kɔɔ cokwie 'pɔpʋɛ, 'ŋlɩ ‑leli ‑zieo 'lɛ 'kʋ na 'nyɩ. Nclɔɔ bhlogbɩɩ 'tɩɩ ‑ci ‑n 'ta le ɔmɔa ‑tɛɛa ma nyɩɛ 'lɛ naa.

Tiatilidua 'kʋ 'la ‑laagɔnɩkplaa 'la ‑afluwa

¹⁸ Zie Tiatilidua 'kʋ 'la -laagɔnɩkplaa 'la 'bhlaandleea* ɩya n 'clɔɔ lebhe: 'Lɩka saa Laagɔ 'la 'Cʋa, ɔmɔa ɔla 'cia ‑kʋ 'lɛ le ‑kosugbagbalu 'nyɩ ɔla bhɩa ‑kʋ 'lɛ le 'pɛlʋtɛtʋ ‑jawie na, nyɩtɛ 'lɛ na:

¹⁹ N ‑ci ‑naa nʋnʋgbɩa, ‑naa ‑walʋa, ‑naa pɔɔtɛtɛa, ‑naa lobholia ɩya ‑naa pɔɔklalɩɛa. ‑Naa leenbhɩalɩ ‑lobholia ‑zu 'nyɩ ɩ zi ‑bɛka -naanɩa 'kʋ.

²⁰ ‑Ma ɩmɩa ‑ɩ 'taan 'lɛ 'tʋ ‑ka ‑naa gbazɔ na, ɩmɩ ‑ɩ ‑glɩ lebhe: -N te Zezabɛlɩ ne, 'ŋlɔ ‑naa ‑ɔ la 'lɛ ɔcɩ Laagɔnekʋnyɩtɛŋlɔ*, 'nyɩ ɔ 'nyiglili 'lɛ 'na lobhocuoa 'nyɩ ɔ ca 'lɛ maa ‑badaaglu ɩya ‑zliigʋgwlamla 'la lilie na.

²¹ N yɔɔ clɩɩ 'nyɩ le ɔ 'ka kwlacala, ‑ma ɔ 'ta ‑wa le ɔ 'ka ɔla ‑badaaglua bɩ 'kʋ 'wlʋ.

²² 'Lɩka, ‑ɩ ‑ka ‑kʋ le ma 'ta ɔla nʋnʋgbɩa bɩ 'kʋ 'wlʋ na, n cɩ 'ka ɔya maa ‑ɔ li 'lɛ ‑badaaglua na 'kusi 'kʋ pʋa ɩya 'kwlɩkadɩ 'ka maa bhɩa.

²³ N cɩ 'ka ɔla 'cuoa 'bhla ɩya -laagɔnɩkplaa 'la -kandia 'fɩan 'ka sɛɛ cibhlili lebhe ‑amʋ ‑ɔ ‑glɩ 'lɛ ɔmɔa ‑ɔ ‑ci 'lɛ ncɛlɩ 'la wɔɔgugwie ɩya ɩmɩa ‑ɩ ‑kʋ 'lɛ maa pɔlɛɛn na. N cɩ 'ka nclɔɔ nclɔɔ ɔla nʋnʋgbɩa 'la dluuplʋlɩɛa 'nyɩ.

²⁴ ‑Ma anyɩa ‑ɔ ‑kʋ 'lɛ Tiatilidua nɩkplaan, ‑ɔ 'ta 'lɛ cacawɔlɩ ‑naa gɩlɩmʋ 'nyɩ ‑ɔ 'ta 'lɛ ɩmɩa ma na ma la 'lɛ Sataan* 'la «zizieziziewɔlɩa» na, cibhlili na, n ‑slo 'ta anyɩ ‑buun ‑gbaakʋ.

²⁵ ‑Ma ɩmɩa a ‑ka 'lɛ na, ɩmɩ ‑tɛɛ 'nyɩ a kla kpaan ‑aan ɩya n 'ka ci.

²⁶ Ɔmɔa ‑ɔ -cɩ ka 'lɛ ‑sɩa na, ɔmɔa ‑ɔ -cɩ ka 'lɛ 'na nʋnʋgbɩa kalɩ ‑aan bhɩalɩdaa na, n cɩ 'kɔɔ 'bhlɩa 'fɩan ‑kwleda 'nyɩ

²⁷ ɩya ɔ 'ka letiepɛ 'ma, ɔ 'kɩɩ ‑kwle le saa ma wla 'lɛ mamɛnyidi na.

²⁸ Saa ‑tɛɛa ‑amʋ ‑ma, n To 'nyɩ 'lɛ ‑kwleliea na, n cɩ 'kɔɔ ‑zʋkpazoliea 'nyɩ.

²⁹ Ɔmɔa ‑ɔ ‑ka 'lɛ 'nyukwli na, 'naa ɔ 'nu ɩmɩa 'Wugoa solu 'lɛ -laagɔnɩkplaa 'la -kandia na.