Zozi Klisi 'la Dɩnanɩa Matie zie 'lɛ na 4 - Le Nouveau Testament en langue Dida

Gɔzɛ ya Zozii gbɩɩncla

¹ ‑Kplɔkplɔ ‑Wugoa* ya Zozii 'pʋpʋa nɩkplaan fa le Gɔzɛ 'kɔɔ gbɩɩncla.

² Zozii ya ‑zelizlo clɩɩ ‑gwlɩ ‑mɔsɔ nɩkplaan, zezezeliin ɩya bhlibhliylʋʋn, 'nyɩ ŋɔmʋ yɔɔ kla.

³ Na, gbɩɩnclanyɔa ‑ɔ ‑glɩ 'lɛ Gɔzɛ na, yɔɔ cɩ mɛ 'nyɩ ɔ yɔɔ 'cla lebhe: «‑Mɔ ‑ka Laagɔ 'la 'Cʋa ‑glɩ na, gba ɩya cɔkʋ ‑naa kaci 'flawi.»

⁴ ‑Ma Zozii yɔɔ 'cla lebhe: «Ɩ ‑zieo lebhe: ‑N 'ta 'flawo ‑tɛɛ nclɔɔ cɩ 'ta 'lɛ li ɩya ɔ 'ka kʋ, ‑ma wɔɔnyɩtʋa ‑tɛtɛa ‑ʋ 'wlʋlʋ 'lɛ Laagɔ neen na, ʋ cɩ gba ɔ cɩ kʋ.»

⁵ Gɔzɛ yɔɔ ‑kplɔkplɔdua ‑ʋ ‑glɩ 'lɛ Zolizalɛmʋ na, nɩkplaan fa, ɛ yɔɔ Laagɔpaakadiea* 'wlu ‑gbɛ

⁶ 'nyɩ ɛ yɔɔ 'cla lebhe: «‑Mɔ ‑ka Laagɔ 'la 'Cʋa ‑glɩ na, ‑bluu, sa ɩ ‑zieo lebhe: Ɔ cɩ 'ka ɔla 'bhlaandleecɩa* 'cla lebhe ma bhlio mala wlɩa nɩkplaan 'kʋ, ɩya ‑naa kplea 'la ka sɛ cokwie gozo.»

⁷ Zozii yɛɛ 'cla lebhe: «Ɩ ‑zieomʋ lebhe: 'N cɩ 'ta ‑Kwlenyɔ, ‑naa Laagɔ, gbɩɩncla.»

⁸ Gɔzɛ ya ‑awlɛɔ 'kikikadie bhlo 'wlu famʋ, ɛ yɔɔ ‑laagɔzɔn 'la nyɩbhɛlɩdia ‑tɛtɛa ɩya ɩla 'klʋagba pala

⁹ 'nyɩ ɛ yɔɔ 'cla lebhe: «N cɩ 'kɔɔ ɩmɩ ‑naa ‑tɛtɛa 'nyɩ, ɩ ‑ka ‑kʋ le n ‑kaan ‑deliin ‑kukoonkplii sasla 'nyɩ ‑n ‑kaan gʋgwla na.»

¹⁰ Zozii yɛɛ 'cla lebhe: «Sataan*, 'wlʋlʋʋn cɩɩn! Sa ɩ ‑zieo lebhe: ‑Kwlenyɔ, ‑naa Laagɔ bhlo ‑n cɩ ka 'lɛ gʋgwla ɩya ‑n ka ɔmɔ bhlogbɩɩ lobho.»

¹¹ Gɔzɛ yɔɔ cɩɩnwlʋlʋ 'nyɩ 'kplookʋ 'bhlaandleecɩ yɔɔ cɩ mɛ 'nyɩ ma lobhoa 'mɔɔ.

Zozii ya Galileebhlɩa 'kʋ cɔlɔ

¹² Zozii ya 'nu lebhe ma ya Zaan ‑palʋʋn 'pa. Na, ɔ ya Galileebhlɩa 'kʋ mʋ.

¹³ Ɔ 'tanɩ Nazalɛtɩ sakʋ, ‑ma ɔ ya 'plɩ 'nyɩ ɔ ya Kapɛnayumʋ sakʋkan mʋ, gea cɩ, Zabilɔɔn ɩya Nɛftaliidʋdʋa 'kʋ.

¹⁴ ‑Sa ɩmɩa Laagɔnekʋnyɩtɛnyɔ* Izayii 'bhlia 'lɛ 'kʋ na, ɩ -glalɩ 'lɛ 'kʋ, daa ɔ claa 'lɛ lebhe:

¹⁵ «Zabilɔɔn 'la ‑dʋdʋ, Nɛftalii 'la ‑dʋdʋ, ‑mɔɔa ‑ɔ 'manɩ 'lɛ 'nyɩa cɩ ‑aan Zludɛɛnnyidɔlʋa leen na, Galileedʋdʋ, Lowie 'la ‑dʋdʋ!

¹⁶ 'Lɔlʋa ‑ʋ ‑kʋa 'lɛ 'tutua nɩkplaan na, ʋ ya zezezeli 'kadie 'ciinlɩ, maa ‑ɔ ‑kʋa 'lɛ 'kwɩ 'la 'bhlɩa 'kʋ na, zezezeli cɩ 'ka maa 'kʋ ŋeni.»

¹⁷ ‑Ɩ bhɔlʋ 'lɛ 'dɛ na, Zozii ya Dɩnanɩa* ‑salɩɛ bhɔ, ɔ claa lebhe: «A cala kwla, sa ‑laagɔɔn 'la Nyɩbhɛlɩdua* ya cɩmɛ.»

Zozii ya ɔla ‑bɛkagɩlɩnyaa la

¹⁸ Daa Zozii ‑kʋa 'lɛ Galilee 'la 'nyia cɩ namʋnʋda na, ɔ ya bholiecɩ ‑mɔsɔ 'lɩ, Simɔɔn, ma la 'lɛ Pɩɛlɩ na ɩya ɔ bholi Andlee, ma paa ‑dada, sa ma ‑glɩa ‑zliibhlanya na.

¹⁹ Ɔ ya maa 'cla lebhe: «A gɩlɩɩn ɩya n 'kanɩ anyɩ ncɛlɩ 'la jlinya ple.»

²⁰ 'Kplookʋ, ma ya mala ‑dadɩa cɩɩnwlʋlʋ 'nyɩ ma yɔɔ gɩlɩ.

²¹ Zozii mʋ 'lɛ 'pɛpɛ 'kʋklʋʋn na, ɔ ya ‑awlɛ bholiecɩ ‑mɔsɔ 'lɩ, Zebedee ‑yowli Zakɩ ɩya ɔ bholi Zaan, maya ma to Zebedee ‑kʋa mala gɔlʋa nɩkplaan 'nyɩ ma tʋndʋa mala ‑dadɩa. Ɔ ya maa la.

²² Dɩpɩa bhlogbɩɩ ma ya ma to ɩya mala gɔlʋa cɩɩnwlʋlʋ 'nyɩ ma yɔɔ gɩlɩ.

Zozii ca 'nyɩ ɔ jabha ncɛlɩ

²³ Zozii 'plɩlɩa Galileebhlɩa ‑tɛtɛa 'kʋ, ɔ caa Zifʋnyaa* 'la bhibhiepalɩa* ‑zɔn, ɔ saa ‑laagɔɔn 'la Nyɩbhɛlɩdua* 'la Dɩnanɩa* 'nyɩ ncɛlɩa sidiin ɔ jabhaa gu ɩya 'bhlɛa ‑tɛtɛa.

²⁴ Ɔla 'ŋlɩ ya Siliibhlɩa ‑tɛtɛa 'kʋ dlolu 'nyɩ ma yɔɔ maa 'fɩan 'kwlɩ bhɩa 'lɛ, gu ‑mizimizi bhla 'lɛ 'nyɩ pɔlɛ ‑mlɔmlɔnʋɔ 'lɛ cɩ na, ‑la. Maa 'wugwi ‑nyinyi bhɩa 'lɛ 'kwlɩ, ‑ɔkukplabhlanya ɩya bhubhubhubhunya, 'nyɩ ɔ ya maa jabha.

²⁵ Ncaabhutukpa yɔɔ gɩlɩ, ma 'wlʋlʋa Galileebhlɩa, Dekapɔlʋbhlɩa, Zolizalɛmʋ, Zudeebhlɩa ɩya 'dia ‑tɛtɛa ‑ɩ ‑kʋ 'lɛ Zludɛɛnnyidɔlʋa leen na 'kʋ.