Zozi Klisi 'la Dɩnanɩa Matie zie 'lɛ na 3 - Le Nouveau Testament en langue Dida

'Nyuwluzʋnyɔ Zaan plici

¹ 'Dɛ 'la clɩɩa nɩkplaan, 'Nyuwluzʋnyɔ Zaan ya ‑zɔnwlʋ, ɔ plicia Zudee 'la 'pʋpʋa nɩkplaan

² 'nyɩ ɔ claa lebhe: «A cala kwla, ‑laagɔɔn 'la Nyɩbhɛlɩdua* ya cɩ mɛ.»

³ Ɔmɔ Laagɔnekʋnyɩtɛnyɔ* Izayii saa 'lɛ, daa ɔ claa 'lɛ lebhe: ‑Blɩɩzɔn bhlo ‑gaan 'pʋpʋa nɩkplaan, ʋ cla lebhe: A bhɔsʋa ‑Kwlenyɔ 'la ‑gugwiea. A ‑sɔɔ ‑gugoa ‑ɩ 'nylugolu 'lɛ 'kʋ na!

⁴ Zaan ‑plaa ‑samoo 'la cɩa 'nyɩa 'la lokwi nɩkplaan 'nyɩ mlakubɛtʋ ‑pɩaa 'lɛ ɔla kɔa. 'Kuolɛglɩbholinya ɩya 'kɔnʋngʋ ‑glɩa 'lɛ ɔla lilinyɩ.

⁵ Na, Zolizalɛmʋnyaa, Zudeenyaa 'fɩan ɩya Zludɛɛnnyidɔlʋa 'la cɩa 'dia ‑tɛtɛa 'kʋ 'la ncɛlɩa 'fɩan, ma mʋa 'mɔɔ 'bhlɩ.

⁶ Ma wlaa mala nyinyia ‑zɔn 'nyɩ Zaan zʋa 'lɛ maa 'nyu 'wlu, Zludɛɛnnyidɔlʋa nɩkplaan.

Falizɩɛnnya ɩya Saduseyɛɛnnya ya Zaan 'bhlɩ ci

⁷ Zaan ya 'lɩ lebhe Falizɩɛnnya* ɩya Saduseyɛnnya* ‑bhutukpa cia 'mɔɔ 'bhlɩ le ɔ 'kaa maa 'nyuwluzʋ. Ɔ ya maa 'cla lebhe: «Kpaclɩlɔlʋnyanyɩ! ‑Ɔ caa 'lɛ anyɩ le a 'gulua Laagɔ 'la dɔgbɛa ‑ɛ ci 'lɛ 'yɛpɩ na bha?

⁸ A tlʋnɩ 'caa ‑a pala 'lɛ lebhe a ya kaci na.

⁹ Ɩya a 'la gugua lebhe a cɩ acɩ 'cla lebhe: ‑Anyɩ ‑a too ‑glɩ 'lɛ Ablaamʋ. Sa, n solu anyɩ lebhe cɔkʋa a ‑jlɛ 'lɛ ‑da na, Laagɔ cɩ mino 'nyɩ ɔ cɩɩ Ablaamʋ 'la 'cuo ple.

¹⁰ ‑Dɔbhɛa ‑nɛɔ tooto le ɛ 'ka sia 'la ‑sikpliia 'dɩ. Su 'tʋtʋʋntʋa ‑ʋ cɩ 'ta 'lɛ 'ca 'nana tlʋ na, ʋ cɩ 'ka ‑dɩɔ ɩya ʋ 'ka ‑kosuun ‑pɔɔ.»

Zaan nyɩtɛ ɔla 'nyuwluzʋlɩɛa 'la cɩa wɔlɩ

¹¹ Zaan ya ‑awlɛ maa 'cla lebhe: «‑Amʋ, 'nyu nɩkplaan n zʋlʋ 'lɛ anyɩ 'nyu 'wlu ɩya a 'ka kwlacala. ‑Ma ɔmɔa ‑ɔ ciin 'lɛ leen na, ɔ ‑ka 'tɛtɩ ɔ ziin 'kʋ. N 'ta 'kʋŋwa le n ‑sɔɔ ɔla ‑gbanbʋɩa. Ɔmɔ -ɔ -cɩ ka 'lɛ anyɩ ‑Kplɔkplɔ ‑Wugoa* ɩya ‑kosu nɩkplaan 'nyuwluzʋlʋ.

¹² Ɔ ‑ka ɔla bʋtɛa wlɩɩn, ɔ cɩ 'ka ɔla gologololɩɩa ma 'dɩ 'lɛ na nɩkplaan gbazlɩlɩ, ɔ 'ka 'caa ‑gbogbu 'kʋ zʋ ɩya ɔ 'ka fɩfɩa ‑kosua ‑ʋ ŋomu 'ta 'lɛ na nɩkplaan 'pa.»

Zaan ya Zozii 'nyuwluzʋ

¹³ Na, Zozii ya Galileebhlɩa 'kʋ 'wlʋ 'nyɩ ɔ ya Zludɛɛnnyidɔlʋa cɩ ŋeni le Zaan 'kɔɔ 'nyu 'wlu zʋ.

¹⁴ Zaan 'tɩɩ 'kʋ ŋonu 'nyɩ ɔ yɔɔ 'cla lebhe: «‑Amʋ ɩ ‑fata 'lɛ lebhe ‑n zʋ 'nyu 'wlu 'nyɩ ‑mɔɔ ‑n ciin 'bhlɩ bha?»

¹⁵ ‑Ma Zozii yɔɔ 'cla lebhe: «'Talɩɩ sɛɛ 'ciin. Sa, sɛɛ ɩ ‑fata 'lɛ lebhe ‑a ‑glalɩ ɩmɩ Laagɔ 'clalɩ 'lɛ na 'kʋ.» Zaan ya ŋonu.

¹⁶ Na, daa ɔ zʋ 'lɛ Zozii 'nyu 'wlu na, Zozii ya ‑zɔn 'wlʋ. 'Kplookʋ ‑laagɔɔn ya 'gbokalɩ, Zozii ya Laagɔ 'la 'Wugoa 'lɩ, ʋ kwlia 'dablee 'bhisa 'nyɩ ʋ cilia 'mɔɔ 'kʋ.

¹⁷ 'Nyɩ ‑blɩɩzɔn bhlo ya ‑laagɔɔn 'wlʋlʋ ʋ claa lebhe: «Ɔmɔ ‑naa, ɔmɔ ‑ɔ ‑glɩ 'lɛ 'na ‑wawacoa, ɔmɔ nɩkplaan n ‑zʋɔ 'lɛ 'na pɔlɛkʋmɛnɔa ‑tɛtɛa.»