Zozi Klisi 'la Dɩnanɩa Matie zie 'lɛ na 2 - Le Nouveau Testament en langue Dida

‑Zɔlʋkopenya ya Zozii kopekan mʋ

¹ Daa ma valɩ 'lɛ Zozii Bɛtɩlɛmʋ, Zudeebhlɩa 'kʋ, nyɩbhɛlʋ Ewlɔdʋ 'la 'bhlɛsʋa nɩkplaan na, ‑zɔlʋkopenya ya gbazɩa 'ylʋbhuoa bholu 'lɛ 'kʋ na, 'wlʋlʋ 'nyɩ ma ya Zolizalɛmʋ ci.

² Ma ya neencla lebhe: «'Ndagbazɩ Zifʋnyaa* 'la nyɩbhɛlʋa ma wlʋ 'lɛ valɩda na, ‑kʋa 'lɛ bha? ‑A ya ɔla ‑zoliea 'lɩ, dɛ ‑a ci 'lɛ le ‑a kɔɔ gʋgwla.»

³ Nyɩbhɛlʋ Ewlɔdʋ 'nu 'lɛ wɔlɩ ‑naa na, 'wugo yɔɔ 'wlu 'wlʋ, ɔya Zolizalɛmʋnyaa 'fɩan.

⁴ Ɔ ya Izlayɛlɩlɔlʋ* 'la ‑teyiyinyaa tocɩa 'fɩan ɩya ‑jlɩmaazienyaa* 'wluwlalɩ 'nyɩ ɔ ya maa neencla le ma palɔɔ daa 'titia ma cɩ 'kaa 'lɛ Laagɔ 'la ‑Sasanyɔa* valɩlɩ na.

⁵ Ma yɔɔ 'cla lebhe: «Bɛtɩlɛmʋ, Zudeebhlɩa 'kʋ. Sa 'lɩka ɩmɩa Laagɔnekʋnyɩtɛnyɔa* zie 'lɛ na:

⁶ ‑Mɔ Bɛtɩlɛmʋ, Zuda 'la ‑dʋdʋ, ‑n ‑kʋmʋ ‑nʋawlɛɛsa Zuda 'la dikadɩa nɩkplaan. Sa, ‑mɔ nɩkplaan ‑kwletoa ‑ɔ -cɩ ka 'lɛ Izlayɛlɩ, 'na 'lɔlʋa, kpa na, cɩ 'ka 'lɛ 'wlʋlʋ.»

⁷ Na, Ewlɔdʋ ya gba, ma ya ‑zɔlʋkopenyaa ziziekoteen lalɩ 'nyɩ ma yɔɔ ‑zoliea 'la 'wlʋclɩɩa pala.

⁸ Ɔ ya maa Bɛtɩlɛmʋ lobhu, ɔ ya maa 'cla lebhe: «A mʋ a 'cla 'cileea 'la da bɩkʋ 'nanɩ, ɩya a ‑kɔɔ 'lɩ na, a gba n cibhlili sɛɛ ɩya ‑amʋ ‑ma, n 'ka mʋ, n 'kɔɔ gʋgwla.»

⁹ Nyɩbhɛlʋa ‑bhle 'lɛ na, ma ya ‑gugwie 'ma 'nyɩ ‑zoliea ma 'lɩa 'lɛ 'ylʋbhuoa 'la 'wlʋlʋdaa na, ‑kʋa maa 'kʋklʋʋn, ɛ ya mʋ ‑aan 'nyɩ ɛ ya daa 'cileea ‑kʋa 'lɛ na 'nylugo.

¹⁰ Ma 'lɩɛ 'lɛ na, ɩ ya ma pɔlɛkʋmɛnɔ 'kadie 'nʋ.

¹¹ Ma ya ‑palʋa ‑zɔn ble, ma ya 'cileea ɩya ɔ nɔ Malii 'lɩ, ma ya ‑kukoonkplii sasla 'nyɩ ma yɔɔ gʋgwla. Ma ya mala bedia ‑blulu 'nyɩ ma yɔɔ ‑asɩkɛ, donyi ɩya ‑asʋnbanyɩa ma la 'lɛ 'mili na va.

¹² ‑Ma 'claawluun, Laagɔ ya maa flɩɩnzʋ le ma 'la cɔlɔanɩ Ewlɔdʋ 'bhlɩ. Na, ma ya ‑buun ‑gugwie 'ma 'nyɩ ma ya 'lɛ ma 'bhlɩ cɔlɔ.

Zozɛfʋ ya Ejibhitibhlɩa 'kʋ mʋ

¹³ Daa ‑zɔlʋkopenyaa mʋ 'lɛ na, ‑Kwlenyɔ 'la 'bhlaandleea* ya Zozɛfʋ 'claawluun 'cla lebhe: «‑Bho 'kʋ, 'ma 'cʋa ɩya ɔ 'nɔ ɩya ‑n 'gu ‑n mʋ Ejibhitibhlɩa 'kʋ. Kʋ 'yɛpɩ ‑aan ɩya n 'kɔɔ 'cla lebhe ‑n cɔlɔ, sa Ewlɔdʋ cɩ 'ka 'cileea 'matɩ le ɔ 'kɔɔ 'bhla.»

¹⁴ Zozɛfʋ ya dobhesa 'kʋ ‑bho, ɔ ya 'cʋa ɩya ɔ 'nɔ 'ma, 'nyɩ ma ya 'plɩ, ma ya Ejibhitibhlɩa 'kʋ mʋ.

¹⁵ Ɔ ‑kʋ 'yɛpɩ ‑aan 'nyɩ Ewlɔdʋ ya 'lɛ 'ku. ‑Sa ɩmɩa ‑Kwlenyɔa 'plɩlɩa 'lɛ ɔla nekʋnyɩtɛnyɔa 'kʋ 'nyɩ ɔ nyɩtɛa 'lɛ na, ɩ ‑glalɩ 'lɛ 'kʋ: Ejibhiti n lalɩ 'na 'cʋa le ɔ 'wlʋ ‑zɔn.

Ewlɔdʋ ya Bɛtɩlɛmʋdua 'kʋ 'la 'cuoa 'bhla

¹⁶ Daa Ewlɔdʋ 'lɩ 'lɛ lebhe ‑zɔlʋkopenyaa yɔɔ 'nyiglili na, ɔ ya dɔgbɛ 'kadie 'ma. Ɔ ya ncɛlɩ lobhu le ma 'bhla Bɛtɩlɛmʋdua ɩya ʋla cɩa 'dia 'la 'ciŋodicuoa 'fɩan, ‑ɔ -bhɔlʋɔ 'lɛ clɩɩbhlocuoa 'kʋ ‑aan 'nyɩ ‑ɔ ‑ŋenio 'lɛ liowlimɔsɔcuoa 'kʋ na. Sa, ‑zɔkpaa ‑naa aya ‑zoliea 'la 'wlʋclɩɩa, ɔ gba 'lɛ 'nyɩ ‑zɔlʋkopenyaa palaa 'mɔɔ 'lɛ na, bhlilia nebhlo na.

¹⁷ Na, Laagɔnekʋnyɩtɛnyɔ* Zelemii 'la niwɔlia ya 'kʋglalɩ:

¹⁸ Ma ya ‑blɩɩzɔn bhlo Ghlamaa 'nunu, 'nʋgbʋkasɛ ɩya bhʋtʋɛa ‑ɛ do 'taan 'lɛ na, Ghlasɛlɩ tu 'lɛ ɔla 'cuoa, 'nyɩ ɔ 'ta ‑wa lebhe ma zʋɔ pɔlɛɛn, sa ma 'tanɩ ‑kʋ na.

Zozɛfʋ ya Ejibhiti 'wlʋ

¹⁹ Daa Ewlɔdʋ 'ku 'lɛ na, ‑Kwlenyɔ 'la 'bhlaandleea* ya Zozɛfʋ 'yɛpɩ Ejibhitibhlɩa 'kʋ 'claawluun futolu.

²⁰ Ɔ yɔɔ 'cla lebhe: «‑Bho 'kʋ, 'ma 'cʋa ɩya ɔ 'nɔ ɩya ‑n 'ma Izlayɛlɩbhlɩa* 'kʋ 'la ‑gugwie. Sa, maa ‑ɔ 'matɩa 'lɛ 'cʋa 'la 'bhlada na, ma ya 'ku.»

²¹ Zozɛfʋ ya 'kʋbho, ɔ ya 'cileea ɩya ɔ 'nɔ 'ma 'nyɩ ma ya Izlayɛlɩbhlɩa 'kʋ cɔlɔ.

²² ‑Ma ɔ 'nu 'lɛ lebhe Akelayusu ‑ɔ ‑kʋanɩa 'lɛ ɔ to Ewlɔdʋ 'la 'jeen, Zudeebhlɩa 'kʋ na, 'yɛpɩ 'la mʋlɩɛa yɔɔ ŋanɔ ‑pla. Na 'claawluun, Laagɔ yɔɔ flɩɩnzʋ 'nyɩ ɔ ya 'plɩ ɔ ya Galileebhlɩa 'kʋ mʋ.

²³ Ɔ ya 'dua ma la 'lɛ Nazalɛtɩ na 'kʋ mʋ 'nyɩ ɔ ya sakʋ. ‑Sa ɩmɩa Laagɔnekʋnyɩtɛnyaa 'bhlia 'lɛ 'kʋ lebhe: Ma cɩ 'kɔɔ Nazalɛtɩnyɔ la na, ɩ -glalɩ 'lɛ 'kʋ.