Zakɩ 'la ‑afluwaa ɔ zie 'lɛ na 3 - Le Nouveau Testament en langue Dida

A kla ala mɩɔ 'kʋ

¹ N bholiecɩnyɩ, anyɩa ‑tɛtɛa 'la 'plɩa sɛɛ canya, sa a ‑ci sɛɛ lebhe 'tɩtɩa ma cɩ 'ka 'lɛ ‑anyɩ canyaa ‑pla na, ɩ cɩ 'ka 'tɛbhalɩ,

² saa 'titia ‑anyɩa 'fɩan ‑a mlɔ 'lɛ na ɩla gbʋ. Gbazɩ nclɔɔ ‑ka nyɩtɛda ‑kʋ, 'nyɩ ɔla ne 'ta ‑dla na, 'dɛndlana ɔ ‑glɩ nclɔɔa ‑ɔ ‑glalɩ 'lɛ 'kʋ, 'nyɩ ‑ɔ cɩ 'lɛ ɔla 'nyɛkɛa ‑tɛtɛa 'kʋklalɩɛ mino na.

³ ‑A zʋ 'lɛ ‑kpangwɩa 'la nia nɩkplaan 'bhli, le ɩla 'nyi 'ka ‑anyɩ yi na, dɛ ‑a mino 'lɛ 'nyɩ ‑a kalɩlɩ 'lɛ ɩla 'nyɛkɛ bhuoa -jioli 'kʋ.

⁴ A 'pa ‑awlɛ ‑kosugɔlɩa ‑ɩ 'plɩlɩ 'lɛ 'nyi 'kʋtaan na pɔlɛ. Saa 'fɩan ɩ cɩ 'lɛ 'ghlibholighlibholili, 'nyɩ ‑pupolua ‑ʋ famʋɩ 'lɛ na, ʋ cɩ 'lɛ nɩkplaan 'tɛbhalɩ na, -lʋʋ lɛɛ ʋla klʋlɩnyɔa didio 'lɛ, 'nyɩ ɔ falɩʋ 'lɛ daa ɔ ‑wa 'lɛ na.

⁵ 'Sɛtɛɛ bhlogbɩɩ, mɩɔ ‑glɩ 'lɛ 'nyɛkɛ 'la lʋʋco, 'nyɩ ʋ kpoli 'lɛ gbɩɩn le ʋ cɩ wɔɔkadɩ nʋlɩɛ mino na. A kope saa ‑kosuunpie gba 'lɛ 'nyɩ 'kɔkpʋkadie 'ma 'lɛ 'mle na.

⁶ Na, mɩɔ ‑ma, ʋ ‑glɩ ‑kosu, ʋ ‑glɩ ‑abhɔlɛ 'la ‑laagɔzɔan ‑ʋ 'slalɩɔ 'lɛ ala 'nyɛkɛa nɩkplaan, 'nyɩ ʋ nyumo 'lɛ ɛla ‑lɩɩbhuoa na. Ʋmʋ ‑ʋ zʋ 'lɛ ‑ala jabhʋa 'la ‑lɩɩbhuoa ‑kosu, 'nyɩ ‑kosu ‑naa, ‑kosua ‑ʋ ŋomu 'ta 'lɛ na nɩkplaan ʋ 'wlʋlʋ 'lɛ.

⁷ Mlaa ‑tɛtɛa sidiin, mlaanyinyi, libhli, ‑blɛblɛmla, ɩya ‑zlii, mlɛa nclɔɔ 'ta 'lɛ ‑kwle na, ɛ 'ta ‑kʋ.

⁸ ‑Ma mɩɔ, nclɔɔ bhlogbɩɩ mino 'ta ɩya ɔ 'kʋʋ 'kʋ kla. Ʋ ‑glɩ ‑lʋʋnyunyua ‑ʋ kʋ 'ta 'lɛ 'cɩɩ na, ʋ ‑yelio tɩtɔnyunyua ‑ʋ bhla 'lɛ na.

⁹ ‑A mʋʋ 'nyɩ ‑a bhɔlʋ -ala ‑Kwlenyɔ ɩya ‑a To, 'nyɩ ‑a ma ‑awlɛ 'lɛ ʋmʋ ‑sakasaka, 'nyɩ ‑a pa 'lɛ ncɛlɩa ɔ ya 'lɛ ɔcɩ 'bhisa 'kʋ nʋ na.

¹⁰ Nea bhlogbɩɩ nɩkplaan 'nyupalɩɛ ɩya 'palɩɛa 'wlʋlʋ 'lɛ. Na, bholiecɩnyɩ, ɩ 'ta ‑fata lebhe ɩ kʋ sɛɛ.

¹¹ 'Nyukobhua bhlogbɩɩ nyɩ mɛnɔmenɔnyu ɩya kalɔkalɔnyu bha?

¹² Bholiecɩnyɩ, 'figisu cɩ olivʋca tlʋlɩɛ mino bha? ‑Aana ‑ghlɛzɛɛnbhlukpo cɩ 'figica tlʋlɩɛ mino bha? 'Nyɩ 'nyukobhua ‑ʋ ‑ka 'lɛ ‑glii na, ʋ cɩ 'nyua ‑ʋ mɛnɩ 'lɛ na nɩkplaan kalɩ bha?

Dɩgalɩa ‑ɩ 'wlʋlʋ 'lɛ ‑laagɔɔn na

¹³ Wɔɔbhlilinyɔ ɩya dɩgalɩnyɔ ‑kʋ anyɩ sidiin bha? 'Naa ɔ palalɩɩ ɔla 'namʋ 'nanʋa nɩkplaan, 'naa ɔ palalɩ nʋnʋgbɩa ‑ɩ ‑pupuo 'lɛ na nɩkplaan lebhe ɔ ‑ci wɔlɩ.

¹⁴ ‑Ma ɩ ‑ka ‑kʋ lebhe woze ɩya cɩɩnkalɔ ‑ka ala pɔlɩa ‑yelio, 'nyɩ a ‑ka ‑lɩɩtɩtɔwugo ‑ka na, 'dɛndlana, a 'la kpolia gbɩɩn le a ‑ci wɔlɩ ɩya a 'la zʋlʋa ‑nʋawlɛa yodi kpʋkpʋʋn!

¹⁵ ‑Sa 'la wɔɔcibhlililie ‑naa 'wlʋlʋ 'ta ‑laagɔɔn, ‑dʋdʋ 'kʋ ‑naanɩ ɩ ‑glɩ 'lɛ, ncaanaanɩ, gɔzɩnaanɩ.

¹⁶ ‑Masa daa woze, ɩya ‑lɩɩtɩtɔwugo ‑kʋ 'lɛ na, ka ‑wuyawuya ɩya nʋnʋgbanyinyi kʋ 'lɛ 'dɛ.

¹⁷ ‑Ma wɔɔcibhlililiea ‑ɩ 'wlʋlʋ 'lɛ ‑laagɔɔn na, ‑bɛɛ ɩ ‑kplɔ, ɩ lamʋ pupue, pɔɔwɔtɛ, nebhloplɩlɩɛ, ŋaazɩɩnlɩlɩɛ 'nyɩ ɩ ‑yelio 'lɛ nʋnʋgbɩ 'nanɩ. 'Ɩ gbazlɩlɩ 'ta nɩkplaan, 'nyɩ ɩ 'ta ‑kplakpla ‑ka.

¹⁸ Maa ‑ɔ ‑wa 'lɛ pupue na, pupue ma moni 'lɛ macɩ cɩ, 'nyɩ 'caa ma sa 'lɛ na, ɩ ‑glɩ 'lɛ 'kʋnylugolunʋnʋgbɩ.