Zakɩ 'la ‑afluwaa ɔ zie 'lɛ na 2 - Le Nouveau Testament en langue Dida

A 'la gbazlɩlɩa nɩkplaan

¹ N bholiecɩnyɩ, ala pɔɔtɛtɛa a zʋ 'lɛ ‑ala ‑Kwlenyɔ Zozi Klisi, 'klʋagba ‑yelio 'lɛ na 'kʋ na, a 'la 'cakalɩa ɛya nɩkplaangbazlɩlɩlɩɛ.

² ‑Baasakpa, a ya 'wluwlalɩ 'nyɩ nclɔɔa ‑ɔ ‑zʋɔ 'lɛ ‑asɩkɛkpatlʋwʋ, 'nyɩ -ɔ ‑pla 'lɛ 'nanɩ nɩkplaan na, ya anyɩ sidiin ble, 'nyɩ ŋaazɩnyɔ ‑ma, ‑ɔ ‑pla 'lɛ lokuzɩ nɩkplaan na, ya ble.

³ Na, gbazɩ a ‑ka nclɔɔa ‑ɔ ‑pla 'lɛ loku 'nanɩa nɩkplaan na bu, 'nyɩ a ‑kɔɔ 'cla lebhe: «‑Mɔɔ, 'maa 'plɩ ‑gɩgada ‑naa ɩya ‑n kʋsa,» 'nyɩ a ‑ka ŋaazɩnyɔa 'claa lebhe: «‑Mɔ, 'nylugo ‑da,» ‑aana «‑wlɔlʋʋn ‑deliin sa» na,

⁴ ka a 'ta 'lɛ nɩkplaangbazlɩlɩ bha? ‑Kplakplatɩtɩ a 'ta 'lɛ ‑pla bha?

⁵ 'Na ‑wawabholiecɩnyɩ, a po 'nyukwliin. Maa ‑laagɔzɔan la 'lɛ ŋaazɩnya na, ‑n 'ta Laagɔ ‑ɔ 'ta 'lɛ maa de sla, le ɔ 'ka maa pɔɔtɛtɛ nɩkplaan nyɩbhɛlɩ ple, ɩya ma 'ka Nyɩbhɛlɩdua ɔ ta 'lɛ ‑ndanyɩ le ɔ cɩ maa ‑ɔ ‑wɔɔ 'lɛ na 'nyɩ na, ‑aja 'kʋ lili bha?

⁶ ‑Ma anyɩ, a bu 'ta ŋaazɩnyɔ. Nyɩbhɛlɩa, ‑n 'ta maa ‑ɔ ‑sa 'ta 'lɛ anyɩ gbaylɩ bha? ‑N 'ta ‑awlɛ maa ‑ɔ fa 'ta 'lɛ anyɩ 'tɩtɩplajliia nɩkplaan bha?

⁷ ‑N 'ta maa ‑ɔ nyumo 'ta 'lɛ 'ŋlɩ 'nanɩa Laagɔ zʋ 'lɛ anyɩ na bha?

⁸ Zieziewɔlɩa* cla lebhe: «Wabha ‑n 'yʋ le saa ‑mɔ 'titi ‑n ‑wa 'lɛ ‑ncɩ na.» Na, gbazɩ a ‑ka Nyɩbhɛlɩdua 'la ‑jlɩmaa 'kʋ 'plɩlɩ, saa Zieziewɔlɩa bhli 'lɛ na, 'nanɩ a nʋ 'lɛ.

⁹ ‑Ma gbazɩ a ‑ka nɩkplaan gbazlɩlɩ na, nyinyi a nʋ 'lɛ, 'nyɩ ‑jlɩmaa gʋa anyɩ, ‑ofi lebhe a yaa tʋ.

¹⁰ ‑Masa, nclɔɔ ‑ka ‑jlɩmaa ‑tɛtɛa 'kʋ 'plɩlɩ, 'nyɩ ɔ ‑ka bhlogbɩɩ 'titi te na, 'a 'fɩan ɔ ya 'lɛ tʋ.

¹¹ Sa ɔmɔa ‑ɔ 'cla 'lɛ lebhe: «‑Naa 'matɩa ‑n 'yʋ nʋŋlɔ» na, ɔmɔ ‑sakasaka ‑ɔ 'cla ‑awlɛ 'lɛ lebhe: «‑Naa 'bhlaa nclɔɔ.» 'Nyɩ, ka ‑n 'ta 'yʋ nʋŋlɔ 'matɩ, 'nyɩ ‑n ‑ka nclɔɔ 'bhla na, ‑jlɩmaa ‑n ya 'lɛ tʋ.

¹² Na, a nyɩtɛ ɩya a nʋ le ncɛlɩa ma cɩ 'ka 'lɛ ‑jlɩmaa ‑a nyɩ 'lɛ ‑ncɩkalɩɛ na 'kʋ 'plɩlɩ ɩya ma 'ka 'tɩtɩpla na.

¹³ ‑Masa ɔmɔa ‑ɔ 'ta 'lɛ ɔ 'yʋ ŋaazɩɩn 'lɩ na, 'tɩtɩplaclɩɩa 'kʋ Laagɔ cɩ 'tɔɔ ŋaazɩɩn 'lɩ, 'nyɩ ŋaazɩɩnlɩlɩɛ 'gulu 'ta 'tɩtɩplalɩɛ.

Pɔɔtɛtɛa nʋnʋgbɩ 'ta 'lɛ 'kʋ ‑gbɛ na ɛ ‑glɩ 'kpɔkpɔ

¹⁴ N bholiecɩnyɩ, ma 'ta nclɔɔ pɔɔtɛtɛ 'la nʋnʋgbɩ cɩ 'lɩlɩ na, 'lɩsaa 'la gbʋ ɔ cɩ 'kaa 'lɛ 'cla lebhe ɔ ‑ka pɔɔtɛtɛ bha? Ɔla 'dɛ 'la pɔɔtɛtɛa cɩɔ gbʋʋnsalɩɛ mino bha?

¹⁵ Gbazɩ bholi bhlo ‑aana, mɛnɔ bhlo ‑ka nɩkplaanplalʋʋ ‑aana lʋʋa ɔ cɩ 'ka 'lɛ zezezelia nɩkplaan li na ‑mie,

¹⁶ 'nyɩ anyɩ nɩkplaan, bhlo ‑kɔɔ 'cla lebhe: «Mʋnʋ pupueen, pla nɩkplaan, ɩya n li, ɩya ‑n lo,» 'nyɩ ɔ 'tɔɔ lʋʋa ɔ ‑mie 'lɛ na 'nyɩ na, 'lɩsaa ɩ cɩ 'kɔɔ 'lɛ nʋ bha?

¹⁷ 'Sɛtɛɛ bhlogbɩɩ, pɔɔtɛtɛa nʋnʋgbɩ 'ta 'lɛ 'kʋ ‑gbɛ na, ɛ ‑glɩ 'kpɔkpɔ.

¹⁸ Nclɔɔ bhlo cɩ 'ka 'cla lebhe: «‑Mɔɔ, ‑n ‑ka pɔɔtɛtɛ, ‑ma ‑amʋ nʋnʋgbɩa n ‑ka 'lɛ. Na, pala ka kaan ‑naa pɔɔtɛtɛa nʋnʋgbɩ 'ta 'lɛ 'kʋ ‑gbɛ na, ɩya ‑amʋ, n 'kɔɔ 'na nʋnʋgbɩa nɩkplaan 'na pɔɔtɛtɛa palalɩ.»

¹⁹ ‑N ‑ka pɔɔtɛtɛ lebhe Laagɔ ‑glɩ bhlo bha? ‑N ‑ka 'ge. ‑Ma 'wugwi ‑nyinyia ‑ma, ‑ka 'dɛ 'la pɔɔtɛtɛa, 'nyɩ ɩ tɩtɛlɩ.

²⁰ 'Tututunyɔ! Ka ‑n ‑wa 'lɛ lebhe ma palɔɔ lebhe pɔɔtɛtɛa nʋnʋgbɩ 'ta 'lɛ 'kʋ ‑gbɛ na, ɛ ‑glɩ 'kpɔkpɔ bha?

²¹ ‑A tokadɔ Ablaamʋ, daa ɔ ‑saa 'lɛ ɔ ‑yowli Izakɩ 'nyɩ ɔ zʋɔ 'lɛ gʋgwlagbatɩa 'kʋ na, nʋnʋgbɩ nɩkplaan ɔ 'ta 'lɛ 'kʋnylugolunyɔ 'plɩlɩ bha?

²² ‑N ‑jlɛ, ka ɔla pɔɔtɛtɛa ɩya ɔla nʋnʋgbɩa mʋnʋa 'lɛ cɩ. Ɔla nʋnʋgbɩa, ɩmɩ ‑ɩ ‑glalɩ 'lɛ ɔla pɔɔtɛtɛa 'kʋ.

²³ ‑Sa ɩmɩa Zieziewɔlɩa* bhli 'lɛ kʋ na, ɩ ‑glalɩ 'lɛ 'kʋ. Ɩ nabhe: «Ablaamʋ ya ɔla pɔɔtɛtɛa Laagɔ 'kʋ zʋ, 'nyɩ ɩmɩ ‑naa 'la gbʋ, Laagɔ yɔɔ 'ma le 'kʋnylugolunyɔ, 'nyɩ ɔ yɔɔ 'lɛ ɔ 'nagɔ la.»

²⁴ Anyɩ 'titi a lɩ lebhe nclɔɔ 'la nʋnʋgbɩ nɩkplaan ɔ 'plɩlɩ 'lɛ 'kʋylugolunyɔ, ‑ma ‑n 'ta ɔla pɔɔtɛtɛa bhlobhlo nɩkplaan.

²⁵ 'Sɛtɛɛ bhlogbɩɩ ɩ 'plɩa 'lɛ ‑badaagluliŋlɔa ma laa 'lɛ Ghlaabʋ na ‑ma ɔla gbazɔ. Daa ɔ kla dɩfanyaa, 'nyɩ ɔ gba 'lɛ ma 'ma 'lɛ ‑buun -gugwie, 'nyɩ ma mʋ 'lɛ na, ‑n 'ta nʋnʋgbɩ nɩkplaan ɔ 'ta 'lɛ 'kʋnylugoluŋlɔ 'plɩlɩ bha?

²⁶ Na, saa 'nyɛkɛ 'ta 'lɛ nyɔmʋ nɩkplaan ‑ka, 'nyɩ ɛ ‑kuo 'lɛ na, 'sɛtɛɛ bhlogbɩɩ pɔɔtɛtɛa nʋnʋgbɩ 'ta 'lɛ 'kʋ ‑gbɛ na, ɛ ‑glɩ 'lɛ 'kpɔkpɔ.