Efɛzɩnyaa 'la ‑afluwaa Pɔlʋ zie 'lɛ maa na 3 - Le Nouveau Testament en langue Dida

Pɔlʋ plici maa ‑ɔ 'ta 'lɛ Zifʋnya ‑glɩ na

¹ Ɩmɩ ‑naa 'la gbʋ, dɛ ‑amʋ Pɔlʋ, n ‑kʋ 'lɛ ‑palʋʋn, Zozi Klisi 'la 'ŋlɩa 'wluku, anyɩa ‑ɔ 'ta 'lɛ Zifʋnya* ‑glɩ na 'la gbʋ.

² A ya 'nanɩ 'kadiea Laagɔ bhɔsʋa 'lɛ 'nyɩ ɔ 'plɩlɩɩn 'lɛ 'kʋ le ɔ 'ka anyɩ nʋ na, ɩla wɔlɩa 'nu.

³ Saa palalɩɛ nɩkplaan, n cibhlili 'lɛ wɔlɩa ‑ɩ ‑zizieoa 'lɛ na, 'nyɩ n kla 'lɛ 'pɛ 'nyɩ n solu 'lɛ anyɩ na.

⁴ Na, a ‑ka ‑afluwaa ‑naa zɛlɩda ‑kʋ na, a cɩ 'ka 'lɩ lebhe n ‑ka Klisi 'la wɔlɩa ‑ɩ ‑zizieo 'lɛ na 'la dɩgalɩa wlɩɩn.

⁵ Wɔlɩ ‑naa ‑ɩ ‑zizieo 'lɛ na, Laagɔ 'tɩɩ ‑godogodonyaa pala, saa ‑pɔtɔnʋ, ɔ 'plɩlɩ 'lɛ 'Wugoa* 'kʋ, 'nyɩ palɩɩ 'lɛ ɔla ‑kplɔkplɔ lobhulobhunyaa* ɩya nekʋnyɩtɛnyaa* na:

⁶ Maa ‑ɔ 'ta 'lɛ Zifʋnya ‑glɩ na, maya Zifʋnyaa 'wlalɩnɩ ‑ajaa bhlogbɩɩ 'kʋ, ma ‑glɩnɩ 'nyɛkɛa bhlogbɩɩ 'nyɩ ma 'wlalɩnɩ ‑ndanyɩa bhlogbɩɩ 'kʋ, Zozi Klisi nɩkplaan, Dɩnanɩa* 'la gbʋ.

⁷ Na, Laagɔ 'la ‑dananɔa nɩkplaan, ɔ yaan Dɩnanɩa* 'la lobhoco ple, ɔla 'tɛtɩa 'la zɔnwlalɩɛ nɩkplaan.

⁸ ‑Amʋa ‑ɔ ‑glɩ 'lɛ ‑kplɔkplɔnyaa 'fɩan 'la leennaanʋa mala leenbhɩalɩ ‑naanɔ na, n ya 'nyupalɩɛ ‑naa 'lɩ le n ‑sa maa ‑ɔ 'ta 'lɛ Zifʋnya ‑glɩ na, Klisi 'la 'nanɩnʋlɩɛa ‑ɩ plɩ 'lɛ nclɔɔ 'la wɔɔgugwie cɩ na

⁹ ɩya n pala saa Laagɔ wlaawlalɩ 'lɛ wɔlɩa ‑ɩ plɩ 'lɛ nclɔɔ 'la wɔɔgugwie cɩ 'nyɩ ɔ -zizieo 'lɛ bhɔdaa tooto ɔcɩ nɩkplaan na ‑zɔn na, ɔmɔa ‑ɔ ‑glɩ 'lɛ ‑laagɔzɔn bhuoa 'la nʋnyɔ na.

¹⁰ Na, ‑pɔtɔnʋ, ‑laagɔnɩkplaa ‑bɔɔ na, ‑kwleliea ɩya ‑kwletɛtɩa ‑ɩ ‑kʋ 'lɛ ‑laagɔɔn na, cɩ 'kanɩ Laagɔ 'la dɩgalɩa ‑ɩ ‑kʋ 'lɛ 'ci 'ci na cibhlili.

¹¹ Ɩmɩa ɔ bhɔsʋa 'lɛ bhɔdaa tooto 'nyɩ ɔ ‑glalɩlɩ 'lɛ kʋ, ‑ala ‑Klwenyɔ Zozi Klisi nɩkplaan na.

¹² Na, Klisi nɩkplaan, ɔla pɔɔtɛtɛa nɩkplaan, ‑a kanɩ ‑jioli le ‑a ka Laagɔ cɩmɛ, ‑delikʋtɛlɔ nɩkplaan.

¹³ Ɩla gbʋ dɛ, n 'clalɩ anyɩ le a 'la 'talɩa acɩ 'ciin ɩya 'kwlɩa ‑ɩ bhɩaan 'lɛ ala gbʋ na, ɩ 'la 'kɔtɔa anyɩ 'nyɛkɛ. Ala 'klʋkpanzʋlɩɛ ɩ ‑glɩ 'lɛ.

¹⁴ Ɩla gbʋ, dɛ n sla 'lɛ Toa ‑deliin ‑kukoonkplii sa.

¹⁵ Ɔmɔ 'lɔlɩa ‑tɛtɛa ‑ɩ ‑kʋ 'lɛ ‑laagɔɔn ɩya ‑dʋdʋa 'kʋ na ‑kʋlʋ 'lɛ.

¹⁶ 'Naa ɔla 'klʋagbaa 'la 'ghlilo 'la gbʋ, ɔ ŋonu, ɔ 'plɩlɩ ɔla 'Wugoa 'kʋ, ɩya ɔ zʋ anyɩ 'tɛtɩɩn ɩya a 'ka nɩklpaan 'tɛbhalɩ.

¹⁷ 'Naa ɔ gba ɩya Klisi kʋ ala pɔlɩa nɩkplaan sa, pɔɔtɛtɛ nɩkplaan ɩya a zʋ ‑sikplii ɩya a 'slalɩ ‑walʋ nɩkplaan,

¹⁸ ɩya aya ‑kplɔkplɔnyaa 'fɩan 'ka mino ɩya 'ka Klisi 'la ‑walʋa 'la 'ghliloa, ʋla 'bhʋalɔa, ʋla 'kʋtoloa ɩya ʋla nɩkplaantlʋlɔa 'la ‑zɔn 'nu,

¹⁹ ɩya a 'ka Klisi 'la ‑walʋa, ‑ʋ plɩ 'lɛ wɔɔcibhlililiea ‑tɛtɛa cɩ na a cibhlili, ɩya Laagɔ 'la jabhʋa ‑tɛtɛa 'ka anyɩ yeli.

²⁰ Ɔmɔa ‑ɔ 'plɩlɩ 'lɛ ɔla 'tɛtɩa ‑ɩ ‑kʋ 'lɛ ‑anyɩ nɩkplaan na 'kʋ, ɔ mino 'lɛ ‑ɔ nʋ 'lɛ 'nyɩ ɔ zi 'lɛ ɩmɩa ‑a cɩɔ 'lɛ 'clalɩ ‑aana ‑a cɩ 'lɛ gugu na 'kʋ na,

²¹ 'naa 'klʋagba ŋenio ‑laagɔnɩkplaa ɩya Zozi Klisi nɩkplaan, ‑zɔkpʋa 'fɩan 'la gbʋ, 'lʋkʋlʋkʋ ɩya 'lʋkʋlʋkʋ. Ɩ kʋ sɛɛ.