Efɛzɩnyaa 'la ‑afluwaa Pɔlʋ zie 'lɛ maa na 2 - Le Nouveau Testament en langue Dida

'Kwɩɩn ‑a 'wlʋ 'lɛ 'nyɩ ‑a ya 'lɛ jabhʋa nɩkplaan ble

¹ Na, anyɩ, a ‑kuoa ala ‑ngasitʋlɩɛa ɩya ala nyinyia 'la gbʋ.

² Ɩmɩa nɩkplaan a ‑kʋa 'lɛ ‑bɛkadaa, daa a gɩlɩa 'lɛ ‑laagɔzɔan na, ‑kwletɛtɩa ‑ɩ ‑kʋ 'lɛ ‑taatea nɩkplaan na 'la ‑kwletoa, 'wugoa ‑ʋ ‑kʋ 'lɛ ‑pɔtɔnʋ maa ‑ɔ zʋ 'ta 'lɛ Laagɔ na nɩkplaan na.

³ ‑Anyɩ ‑ma, ‑a ‑kʋmʋa maa ‑naa sidiin, ‑anyɩa 'fɩan ‑bɛkadaa, ‑ɔ nʋa 'lɛ lɩɩa ‑ɩ ‑kaa 'lɛ ‑ala 'nyɛkɛa 'tʋ na: ‑A nʋa ɛla pɔɔsa, ‑a gɩlɩa ɛla wɔɔgugwiea 'nyɩ ala kʋkʋkʋlɩɛa gbaa na, a ‑kʋa maa 'bhisa, 'nyɩ ‑a ‑kʋa 'lɛ Laagɔ 'la dɔgbɛa ‑zɔn.

⁴ ‑Ma Laagɔ 'la ŋaazɩɩnlɩlɩɛa 'ghli. ‑Walʋ 'kadʋa ɔ ‑wabha 'lɛ ‑anyɩ na, ʋla gbʋ na,

⁵ daa ‑ala ‑ngasitʋlɩɛa 'la gbʋ, ‑a ‑kuoa 'lɛ na, ɔ ya ‑aya Klisi nebhlo jabhalɩ. Laagɔ 'la ‑danaanɔa nɩkplaan a 'lɩlɩ 'lɛ gbʋʋnsalɩɛ.

⁶ ‑Aya Zozi Klisi 'la nebhloplɩlɩɛa nɩkplaan, ɔ ya ‑a -yɔɔsɔ 'kwɩɩnkʋbho 'nyɩ ɔ ya ‑ayɔɔsɔ ‑laagɔɔn sakʋda zʋ.

⁷ ‑Sa, ɔla dananɔ ‑a 'lɩlɩ 'lɛ Zozi Klisi nɩkplaan na 'la gbʋ, ɔ wabha 'lɛ le ɔ 'ka 'bhlɛsʋa ‑ʋ cɩ ka 'lɛ ci na nɩkplaan, ɔla ‑wawʋa ‑ʋ 'ta 'lɛ 'mʋsʋ ‑ka na pala.

⁸ ‑Masa ɔla dananɔa nɩkplaan a 'lɩlɩ 'lɛ gbʋʋnsalɩɛ, pɔɔtɛtɛ nɩkplaan. 'Nyɩ 'ɩ 'wlʋlʋ 'ta anyɩ wlɩɩn, ‑ma ɩ ‑glɩ Laagɔ 'la vavalʋʋ.

⁹ Ɩmɩ ‑naa 'wlʋlʋ 'ta nclɔɔ 'la nʋnʋgbɩ nɩkplaan, ɩya nclɔɔ 'la kasɛ gbɩɩnkpoli.

¹⁰ Sa ɔla wlɩɩn na nʋnʋlobholi ‑a ‑glɩ 'lɛ. Laagɔ ya ‑anyɩ Zozi Klisi nɩkplaan nʋnʋ, le ‑a ka nʋnʋgbɩ 'nanɩa ɔ bhɔsʋa -ala gbʋ bhɔdaa tooto na 'kʋglalɩ.

Klisi nɩkplaan, ‑a ‑glɩnɩ bhlo

¹¹ Na, a luoli lebhe ‑bɛkadaa, anyɩa 'nyɛkɛa 'la 'sasʋʋn, ‑ɔ 'taa 'lɛ Zifʋnya* ‑glɩ na, anyɩ maa mala 'nyɛkɛa 'la 'kʋdɩlɩɛ 'la gbʋ, ‑ɔ cla 'lɛ macɩ lebhe ma ‑dɩɔ 'kʋ na, laa 'lɛ «ncɛlɩa ‑ɔ 'ta 'lɛ 'kʋdɩɔ» na.

¹² A luoli lebhe 'dɛ 'la daa, a 'ta ka kaa Klisi ‑ka, a 'taa Izlayɛlɩlɔlʋa* nɩkplaan ‑kʋmʋ, a 'taa mɛnʋa 'la ‑ndanyɩa nɩkplaan ‑kʋmʋ, a 'taa pɔlɛkʋtɛlɔ ‑ka, a 'ta Laagɔ ‑ka 'nyɩ a ‑kʋa 'lɛ ‑laagɔzɔan.

¹³ ‑Ma ‑pɔtɔnʋ, Zozi Klisi nɩkplaan, anyɩa ‑ɔ ‑kʋa 'lɛ ‑bɛkadaa 'koonko na, Klisi 'la ‑dolua ya gba na a ‑kʋnɩ ‑koko.

¹⁴ ‑Masa, ɔmɔ ‑ɔ nyɩ 'lɛ ‑anyɩ pupue na. Ɩmɩa ‑ɩ ‑sasalɩɔa 'lɛ cɩ na, ɔ yɩɩ bhlo ple. Ɔla 'kwɩa nɩkplaan, ɔ ya ‑gbudua ‑ʋ sasalɩa 'lɛ -anyɩ cɩ na gbɔlʋ. Ʋmʋ ‑ʋ ‑glɩ 'lɛ ‑zɔbhɛlɩzʋ.

¹⁵ Ɔ ya ‑jlɩmaa ɩya ala nɩkplaan 'la wɔlɩa 'dɛ ‑sa. Ɔ ya Zifʋnyɔ* ɩya ɔmɔa ‑ɔ 'ta 'lɛ Zifʋnyɔ ‑glɩ na ɔcɩ nɩkplaan bhlo pleli, ɩya pupue 'ka ci.

¹⁶ Ɔ ya dabhlalɩsua 'kʋ 'plɩlɩ, ɔ ya ncaacia ‑mɔsɔa nclɔɔ bhlo ple 'nyɩ ɔ ya maya Laagɔ cɩzʋlʋ: Dɩpɩa ɔ 'bhlalɩ 'lɛ ‑zɔbhɛlɩzʋ.

¹⁷ Ka ɔ ci 'lɛ le ɔ 'ka pupue 'la Dɩnanɩa* anyɩa ‑ɔ ‑kʋa 'lɛ 'koonko ɩya maa ‑ɔ ‑kʋa 'lɛ ‑koko na ‑sa.

¹⁸ Ɔmɔ ‑bɔɔ gba 'lɛ 'nyɩ ‑anʋaa ɩya ‑da -naanʋaa, 'Wugoa bhlogbɩɩ nɩkplaan, ‑a ŋeni 'lɛ Toa cɩ.

¹⁹ Na, a 'tanɩ lowie ‑glɩ, a 'tanɩ 'plɩplɩnya ‑glɩ, ‑ma a ‑glɩnɩ ‑kplɔkplɔnyaa 'bhlɩnyaa, a ‑glɩnɩ Laagɔ 'la 'lɔlʋnya.

²⁰ A ‑kʋmʋnɩ ‑palʋa lobhulobhunyaa* ɩya Laagɔnekʋnyɩtɛnyaa* zʋ 'lɛ ‑gluu 'nyɩ Zozi Klisi 'titi ‑glɩ 'lɛ cokwiea 'kʋa ʋ 'slalɩ na, 'la 'slalɩɛa nɩkplaan.

²¹ Ɔmɔ nɩkplaan ‑palʋa ‑tɛtɛa 'wlʋlʋ 'lɛ 'kʋ, ʋ ‑gblaa 'lɛ 'nyɩ ʋ ‑glɩ 'lɛ ‑Kwlenyɔa 'la ‑kplɔkplɔ ‑palʋ.

²² Na, ɔmɔ nɩkplaan, anyɩ ‑ma, ma zʋmʋ 'lɛ anyɩ nebhlo ‑palʋa 'la 'slalɩɛa nɩkplaan, ɩya ‑Kplɔkplɔ ‑Wugoa* 'la 'kʋplɩlɩlɩɛa nɩkplaan, a 'ka Laagɔ 'la sakʋda 'plɩ.