फिलीपियो 4 - परमेश्वर को पवित्र वचननीर्दोश 1 येका लिये हे मरा मसीह भैइ अरु बयहोन जेमे मरो जी लग्यो र्हेस हइ, जो मरा खुशी अरु मुकुट हुये, हे प्रिय भैइहोन, प्रभु मे यो प्रकार स्थिर र्हेनु. 2 मी यहूदीया का भी समझुस हइ अरु सुन्तुखे, भी कि वे प्रभु मे एक मन र्हेनु. 3 हे सच्चा सहकर्मी, मी तरा से भी प्रार्थना करुस हइ कि तू उन बयहोन की मदत कर, क्युकि उनने मरा साथ सुसमाचार फैलाना मे, क्लेमेस अरु मरा दुसरा सोप्तीहोन समेत काम कर्यो, जिनको नाम जिवन की किताब मे लिख्यो हुयो हइ. 4 प्रभु मे सदा खुश र्हेनु. मी फिर बोलुस हइ, खुश र्हेनु 5 तुम्हारी कोमलता सब इन्सानहोन पर प्रगट हुये प्रभु का पास हइ. 6 कोय भी बात कि चिन्ता मत करणू. पन हर एक बात मे तुम्हारो नीवेदन, प्रार्थना अरु प्रार्थना का वजेसे धन्यवाद का सात परमेश्वर का सामने उपस्थित कर्यो जाए 7 तब परमेश्वर खे शांती जो सब समझ परे हइ मन अरु तुम्हारा बिचारहोन को मसीह यीशु मे हिपाजत से रख्ये. 8 येका लिये मसीह भैइ जो जो बातहोन सच्ची हइ अरु जो जो बात आदरणीय हइ, अरु जो जो बात अच्छी हइ, अरु जो जो बात पवित्र हइ, अरु जो जो बात सुहावनी हइ, अरु जो जो बात मनभावनी हइ, मंनजे जो भी सदगुण अरु प्रशंसा की बात हइ उन पर ध्यान लगाया करणू. 9 जो बात तुम ने मरा से सीखी, अरु ग्रहन करी, अरु सुनी ,अरु मरा मे देखी, उनी को पालन कऱ्यो, जब परमेश्वर जो शांती को दूत हइ तुम्हारा साथ र्हीये. दान, लिये धन्यवाद 10 मी प्रभु मे भोत खुश हइ कि अब इत्ता दिनहोन का बाद तुम्हारी चिन्ता मरा बारे मे फिर जागृत हुइ हइ. नीश्चय तुमने सुर्वात मेभी येको बिचार थो, पर तुमखे मौको नी मील्यो. 11 यो नी कि मी अपना कमी करण यो बोलूस हइ. क्युकि मे ने यो सीख्यो हइ कि जे दशा मे हइ. ओका मे खुश कर्यु. 12 मी लीन होनु भी जानुस हइ अरु बडनो भी जानुस हइ. हर एक बात अरु सब दशाहोन मे मेने मगन होनु, भुको र्हेनू, अरु बढनो घटनो सीख्यो हइ. 13 जे मेखे शक्ति देस हइ ओमे मी सब कुछ करी सकुस हइ. 14 तेभी तुम ने भलो कर्यो कि मरो क्लेश मे मरा हिस्सेदार हुया. 15 हे फिलिप्पिहोन तुम भी जानस हइ कि सुसमाचार प्रचार को सुर्वात मे, जब मी मकिदुनी से बीदा हुयो तब तुमखे छोडी खे अरु फक्त मंडली ने लेनो देना का बारे मे मरी मद्दत नी करी. 16 यो प्रकार जब मी थिस्सलुनीखे, मे थो, तब भी तुम ने मरी कमी पूरी करण का लिये एक बार का क्युकी दो बार कुछ भेज्यो थो. 17 यो नी कि मी दान चाउस हइ पन मी असो फल चाउस हइ जो तुम्हारा लाभ का लिये बडतो जास. 18 मरा पास सब कुछ हइ, क्युकी भोत से भी हइ. जे चिजहोन तुम ने इपफ्रुदीतुस का हात से भेज्यो थो उनका मीलीखे मी मगम हूइ गयो हइ, उ तो सुखदायक सुगन्ध ग्रहन करणा योग्य बलिदान हइ जे परमेश्वर खे भास हइ. 19 मरो परमेश्वर भी अपना उ धन का जसो जे महिमा सहित मसीह यीशु मे हइ, तुम्हारा हर एक घटी खे पूरी कर्ये. 20 हमारो परमेश्वर अरु बाप की महिमा पिडमपिडि होती र्हिये. आमीन. आखरी नमस्कार 21 हर एक पवित्र झन खेजे प्रभु यीशु मसीहा मे हइ नमस्कार बोलनु. जे मसीह भैइ मरा साथ हइ, तुमखे नमस्कार बोलस हइ. 22 सब पवित्र इन्सान, विशेष करीखे जे कैसर का घराना का हइ, तुमके नमस्कार बोलस हइ. 23 हमारो प्रभु यीशु मसीह को अनुग्रह तुमारी आत्मा का साथ र्हिये. |
The New Testament in Gowlan Language ©The Word for the World International and Gawlan Translation Samiti, Telkhar, Maharashtra, India, 2024.