પ્રકટીકરણ 9 - परमेश्वरन सत्य वचन नवलो नियम

¹ जत्यार पाचवो सोरगदूत भीराक फुँकियों ती हाव सोरगदूत से धरती एक तारा क नेचो पड़तलो देखियों, आरू उको आंधारला कुण्डा चाबी दि गय।

² चो आंधारला कुण्डा क खोल दियो, आरू खाडा माईन मोटली भाट्टीन सारको धरतीड़ो उठियो, आरू खाडा क धरतीड़ा से दाहड़ो आरू वाहळो आंधारलो हुय गयो।

³ तिना धरतीड़ा माईन टिड्डिया निकळिया आरू उको विछान सारकी हक आपली हुती।

⁴ तिनुक कयो कि चे धरती पर नी ते खोड़ो क नुक्शानी करे नी ते नीळ्ळा पत्तान क आरू नी ते कोय झाड़को अन्याय नी पुन तेखेत काजे जिना माथा पर यहोवा भगवान क छापू नी होय,

⁵ आरू उन लोगहन क मार देने करीन नी पुन पाच मोहना तक जोबर काम पिड़ा आपने हुकुम दियो गयो हुतो, यी पीड़ा तसीत हुती, जसी विछान आहळ से हये,

⁶ तिनु दाहड़ा मा मानुस आपसी मोत क हेरसे पुन उको मोत नी जोड़े, त्या मोत क आस तो करसे पुन मोत हेका से दूर डास्से,

⁷ तिनु टिड्डियान क रूप लड़ाई क करता तियार करला घुल्लान क जसो हुतो, आरू तेखा मुनका पर असा मानो की सोनान मुकुट हुता; आरू तेखा मुय मानुस क जसा हुता

⁸ तिन्दरा झोटा बायरान झोटान तसा आरू तिन्दरा दात नाहरन दातोन जसा हुता,

⁹ चे लुहड़ान क जसी झिलम पेहरला हुता आरू तेखा पाखड़ा न अवाज असी हुती जसी घुड़ सवारी आरू घण सवटा घुल्ला लड़ाई मा दवड़ता होय।

¹⁰ तेखी छेमटी विछान आहळ क सारकी हुती आरू तेखी छेमटी मा मानुस क पाच महिन तक पीड़ा अन्याय नी करनो देनेन आधिकारी हुती,

¹¹ आंधारला कुण्डा क सोरगदूत उको पर राजा हुता, तेखो नाव इब्रानी मा अबद्दोन, आरू युनानी मा अबद्दोन, आरू युनानी मा अपुल्लयोन छे।

¹² पेहली पीड़ा वीत गय, अब ओको बाद मा दूय पीड़ा आरू आवने वाळी छे।

¹³ जत्यार छटवो सोरगदूत भीराक फुँकियो ती जो सोनान वेदी यहोवा भगवान क ओगळ छे तेखा सींगड़ा मा सी हाव असी अवाज सुन्यो,

¹⁴ असा मानो कोय छटवा सोरगदूत से जिनाक पास भीरो हुतो उको कय रयो, त्या चार सोरगदूत क जो मोटली नदी फरात क पास बांधायला छे खुल दे। जुगु, जो भीराक वाचाड़्यो हुतो, यो हुकुम हुतो,

¹⁵ हेरेन करीन आरू त्या चार सोरगदूत छुट गया, जो तिना समय आरू दाहड़े, आरू मोहना, आरू साल क करता मनुसो क एक भाग क मार न्हाखने क तियार हुया हुता।

¹⁶ ओकी सैनान गिनती वीस करोड़ हुती; हाव तेखी गिनती सुन्यो।

¹⁷ आरू मखे इना दर्शन मा घुल्ला आरू उका सवार असो देखाय पड़ियो, जेरो झिलम मा आगठो, धुम्रकान्त, आरू गन्धक क जसी हुती, आरू तेखा मुय से आगठो, धरतीड़ो, आरू गन्धक निकळतो हुतो।

¹⁸ इनी तीनु पीड़ा; आगठा, धरतीड़ा, गन्धक से जो उको मुय से निकळतो हुतो मानुस क एक भाग क मार न्हाखियो।

¹⁹ तिनु घुल्लान ताकत तिन्दरा मुय आरू छेमटा मा हुती; अतरान करीन तेखी छेमटी घड़सान जसी हुती, आरू त्या छेमटा क मुनका भी हुता आरू इनु से पीड़ा आरू अन्याय करता हुता।

²⁰ रहवला मानसे, जो उनी पीड़ा सी नी मरीया हुता, त्या आपसा हाथ क काम सी मन नी फिराया, बाकुन साहळा, आरू सोनान, चाँदी, पीतळ, दगड़ान, आरू लाकड़ान की मुरतीन पुजा नी करे, जो नी देखे, नी सुने, नी चाल सकती हुती।

²¹ आरू जो खुन, आरू टोना, व्यभिचार, आरू चोरियाँ, त्या करला हुता ओका सी मन नी फिराया।