હિબ્રૂ 5 - परमेश्वरन सत्य वचन नवलो नियम

¹ काहकि हर एक डाहला पुजारा मानुस मा छे लेता जाता छे आरू मानुस ही क करता, उन वात क विषय मा जो यहोवा–भगवान छे सम्बन्ध राखती छे, ठेराया जाता छे कि भेंट आरू पाप बलि चढ़ाया करे।

² वो विनअकलिया आरू भूले भटको क साथे नर्मी छे व्यवहार कर सकता छे, अतरान करीन कि वो आप भी निर्बलता छे घिरा छे।

³ अतरान करीन ओको जुवे कि जोसा मानसोन वोसो ही आपने करता भी पाप बलि चढ़ाया करू।

⁴ यो विजुत क पद काही आपने आप क छे नी लेता, जव तक कि हारून क समान यहोवा–भगवान की आरू छे ठराय नी जाय।

⁵ वोसो ही मसीह ने भी डाहला पुजारा बनने की बढ़ाई आपने आप छे नी लेदी, पर ओको तीनी ने देदी, जो ओका सी कयो हुता, “तु मारो पोर्‍य छे, आज हाव ही ने तुखे पैदा कर्‍या छे।”

⁶ इन प्रकार वो दीसरी धरती मा भी कयता छे, “तु मेलख़ीत्सेदेक की रीति पर सदान करता पुजारा छे।”

⁷ ईशु ने आपसी डील मा रोवने क दाहड़ा मा उंचा ओवाज छे आयड़ीन आरू आसा पाड़ीन ओका सी जो ओको मरला मारयन वाचड़ सकता हुता, प्रार्थना आरू रावन्या करी, आरू भक्ति क कारण ओकी सोमवाय गयी।

⁸ पोर्‍य हुयने पर भी त्यो दुःख उठाड़ हुकुम मान सखी।

⁹ आरू सिध्द बनीन, आपने सब हुकुम माननेवावा क करता अमरकाय काव क उध्दार क कारण होय गया।

¹⁰ आरू ओको यहोवा–भगवान की आरू छे मेलख़ीत्सेदेक की रीति पर डाहला पुजारा क पद मिव्य।

¹¹ अतरान करीन विषय मा घोणा सी वात कयनो छे, जिन्दरो समझने भी वातड़ो छे, अतरान करीन कि तुमू उंचा सोमवने लागे होय।

¹² टेहाव क विचार छे तो तुमूक गुरू होय जानो जुवे हुता, तौभी यो छाची होय गया छे कि काही तुमूक यहोवा–भगवानन वचन की शुरू शिक्षा पछु छे सिखाड़। तुमू तो ओसो होय गयो होय कि तुमूक अन क बदल हिमी तक दूध ही जुवे।

¹³ काहकि दूध पीनेवावा पोर्‍या क तो न्यायपन क वचन की उवख नी होयती, काहकि वो पोर्‍य छे।

¹⁴ पुन अन सयानो क करता छे, जिन्दरी ज्ञानेंद्रिया मेहनत करता भले बुरे मा भेद करने मा निपुन होय गयी छे।