હિબ્રૂ 4 - परमेश्वरन सत्य वचन नवलो नियम

यहोवा–भगवान क मानसे क विश्राम

¹ अतरान करीन जव कि ओका विश्राम मा भरायने करने की प्रतिज्ञा हिमी तक छे, तो हामु घाबरायने जूवे ओसो नी होय कि तुमू मा छे काही जन ओका सी वंचित रया जाय।

² काहकि हामु इन्दरी तरह खुश खबर सोमवाया गया छे, पर सोमवने होया वचन छे तीनुक काही लाभ नी होया; काहकि सोमवनेवावा क मन मा विश्वास क साथ नी बठ्या।

³ पुन हामु जे विश्वास कर्‍या छे, ओको विश्राम मा भरायने करता छे; जोसो त्यो कयो, “हाव ने आपने रीस मा शपथ खादी कि वो मारे विश्राम मा भरायने करने नी देखछे।” यदि धरती की उबजनो क टेहाव छे तेरो काम पूरो होय त्योक्यो होतो।

⁴ काहकि सातवु दाहडु क विषय मा त्यो कयी यो कयो छे, “यहोवा–भगवान ने सातवे दाहड़े आपसा सब कामक निपटा करीन विश्राम कर्‍या।”

⁵ आरू इनीये धरती पछु यो कयता छे, “वो मारे विश्राम मा भरायने नी करने देखछे।”

⁶ तो जव यो वात बाकी छे कि कोतरा आरू छे जो ओको विश्राम मा भरायने करे, आरू जे तेरो खुश खबर पेहल सोमवाय गया तीनुक हुकुम नी माननेन कारण इनुमा भरायने नी कर्‍या।

⁷ अतरान करीन वो काही विशेष दाहड़ा ठेरावीन ओतरा दाहड़ान बाद दाऊद की किताब मा ओको “आज क दाहडु क कयता छे। जोसो पेहल कयो गया यदि आज तुमू ओको ओवाज सोमवीन, तो आपनो मन क वातड़ो नी करो।”

⁸ काहकि यदि यहोशू तीनुक विश्राम मा भरायने कराय लेता, तो तेरे बाद दिसरे दाहड़े की चर्चा नी होयती।

⁹ शेवली कावा जान लेवु कि यहोवा–भगवान क मानसे क करता आरामन दाहडान विश्राम बाकी छे।

¹⁰ काहकि जु तेरो विश्राम मा भरायने कर्‍या छे, त्यो भी यहोवा–भगवानन समान आपसा काम क पूरो करीन विश्राम कर्‍या छे।

¹¹ शेवली कावा हामु ओको विश्राम मा भरायने करने क कोशिष करे, ओसो नी होय कि काही जन उन क समान हुकुम नी मानीन पड़ गया।

¹² काहकि यहोवा–भगवान क वचन जीवतो, आरू मजबुत, आरू एक दुधारी तलवार छे भी चोखा छे; आरू जीव आरू आत्मान, आरू गाठ–गाठ आरू गूदा–गूदा क अलग करीन आरू पार छेदता छे आरू मन की भावना आरू विचार क हेरता छे।

¹³ सृष्टि की काही समान इनु सी डुकाय नी छे वरना जिनुछे हामु काम छे, ओका डुवा क सामने सब चीज उघाड़ली आरू प्रगट छे।

मोटो डाहला पुजारा

¹⁴ अतरान जव आमरो ओसो मोटो डाहला पुजारा छे, जो सोरगदूतो छे हईन गया छे, मतलब यहोवा–भगवानन पोर्‍य ईशु, तो आवु, हामु आपने पछतायो क दृढता छे थाहाव रोवे।

¹⁵ काहकि आमरो ओसो डाहला पुजारा नी जो हामरी निर्बलता मा हामरे साथे दुःख नी होय सके; वरना वो सब वात मा हामरे समान पारखता तो गया, तौभी निष्पाप निकवता।

¹⁶ अतरान करीन आवु, हामु फोकटन दया क सिंहासन क निकट हियाव बांधीन चाले कि हामु पर दया होय, आरू वो फोकटन दया देखछे जो जरूरत क टेहाव हामरी मदत करे।