प्रेरितन 2 - परमेश्वरन सत्य वचन नवलो नियम

चुखली आत्मा न आवनो

¹ जव पेन्तेकुस्त न दाहड़ो आयो, ती त्या आखा एक धरती पर भेळा हुता।

² आरू एकदम छे सोरग छे मोटी आँधी क सारकु सन्नाटु आवनेन शब्द हुयो, आरू ओका सी सब घर वा त्या बोठ्या हुता, गुंज गयो।

³ आरू ओका आगठी सारकी जीप फाटली देखाय पड़ी आरू आखा पर आवीन उन लोगहन मा समाय गय।

⁴ आरू त्या आखा चुखली आत्मा से भराय गया, आरू जीने रीते आत्मा हेनको बुलने करिन शक्ति आपी, आरू त्या भाति–भातिन भाषा बुलने लाग्या।

⁵ आरू आकाश क नेचो आखी जाती मा सी यहूदि भगत यरूशलेम मा रहवता हुता।

⁶ जव त्यो बुली सोमळाय पड़ी, ती गर्दी लाग गय आरू लोगहन घाबराय गिया, काहकि आखा क यो सोमळाय पड़तो हुतो, की या आखा म्हारी बुली मा बुल रीया छे।

⁷ आरू त्या आखा बीहिन आरू घबराईन कयनो लाग्या, “देखु, यो जो बुल रया छे काय यो गलील वाळा नी हय?

⁸ ती ओवी काँ हामरे मा सी; आखा उन लोगहन क आपसी–आपसी पैदावारीन धरती परून भाषान बुली सोमवे?

⁹ हामु जो पारथी, मेदी, एलाम लोगहन, मेसोपोटामिया, यहूदि या, कप्पदुकिया, पुन्तुस आरू आसिया,

¹⁰ आरू फ्रूगिया आरू पंफूलिया आरू यूसुफ आरू मिस्र लीबिया देश जो कुरेन न धोड़वोड़ मा छे, इन आखा देश मा रहवने वाळा आरू रोमि वासी,

¹¹ मतलब काय यहूदि, आरू काय यहूदि रीति भातीन पाळन करने वाळा, क्रेते आरू आरबी भी छे, बाकुन आपसी–आपसी बुली मा ओका सी यहोवा भगवान क मोटा काम क बारा मा सोमळता छे।”

¹² आरू त्या आखा घाबराय गया, आरू घाबरायीन एक दिसरा सी कयनो लागिया, “यो काय हो रयो?”

¹³ पर दिसरा हिमत करीन कयो, “त्या ते नवलु मोंद पीन मोंदन नशिया मा छे।”

चुखली आत्मान दाहड़े पतरसन भाषण

¹⁴ पतरस तिनु गियारा क सात मा ऊबो हुयो आरू मोटा बुलो सी कयनो लाग्यो, “ए यहूदि या, आरू ए यरूशलेम क आखा रहवने वाळा, यो जान लेय आरू कान्टा लागाड़ ़ीन म्हारी वात समळी लेय।”

¹⁵ जोसो तुमू समझी रया यो नशिया मा नी हय काहकि अब ते तिसरो पहर ही चढ़लो छे,

¹⁶ पर यी वात सी जो योएल कागळीयान लारे कहवली छे:

¹⁷ यहोवा भगवान यो कहे, कि आखरी दाहड़ा मा असो होयछे, कि हाव मारी आत्मा आखा मनुसो पर रेड़ीस आरू तुमरा पोर्‍या आरू तुमरी पुरायोहन ओगळायती वात कहवसे, आरू तुमरा जुवान्या दर्शन देखसे आरू तुमरा डाहडा सपनो देखसे।

¹⁸ या तक हाव म्हारा दास आरू दासियाँ पर तिनु दाहड़ा मा म्हारी आत्मा रेड़ीस, आरू त्या ओगळायती वात करसे।

¹⁹ आरू हाव ऊपर सोरग मा मोटा काम, आरू नेड़ो धरती पर सोहलानी, आरू लुहूय, आरू आगठो आरू धुंवाड़ो क वादळो देखाड़ीस।

²⁰ पोरबु क डाहला आरू विजाळा दाहड़ा आवने सी पेहले दाहड़े आंधारो आरू चाँद लुहूय क सारको हुय जाछे।

²¹ आरू जो कोय पोरबुन नाव लेछे, ओकोत् छुटकारो जोड़से।

²² “ए इस्त्राएली यी वात सोमवु कि ईशु नासरी एक मानुस हुतो जिनाक यहोवा भगवानन तरफ सी हुयने न सोहलानी ओकी सामर्थ्यन काम आरू मोटा काम आरू सोहलानी सी देखाये, जो यहोवा भगवान तुमरे वीच मा ओका लारे देखाड़्यो जिनाक तुमू जानो।”

²³ ओको क, जव त्यो यहोवा–भगवानन टाकायली वात आरू गियानोन अनसारे धोराय गियो, ती तुमू अन्याय हात सी कुरूस पर चढ़ावीन मार न्हाखिया।

²⁴ पर ओको क यहोवा–भगवान मोत क बंधन सी छुड़ावीन जीवाड़्यो: काहकि यो नी हयने सारको हुतो कि उका हक मा रहवे।

²⁵ काहकि दाऊद उका बारा मा कहे: हाव पोरबु क जलोमकु म्हार सामने देखतो रयो काहकि त्यो मार जेवड़ा तरफ छे, कि हाव कमजोर नी हुय जाम।

²⁶ इना कारण सी म्हारो मन खुश हुयो, आरू म्हारी जीप खुश हई; बाकुन मारो डील भी आश मा बनलो रहवसे।

²⁷ काहकि तु म्हारा जीव क नरक मा नी छुड़े; आरू नी ते थारा चुखलो जन क सड़ने देय!

²⁸ तु मेखे जीवन न वाट देखाड़्लो छे; “तु मेखे थारा दर्शन क लारे खुशी सी भर देसे।”

²⁹ ए भाईस्यो, दाऊद हाव तिना वेगला डाहडा न बारा मा हाव तुमूक हेमोत न सात कय सकतलू कि त्यो मोर गयो आरू गाड़ ़ाय भी गयो आरू ओको बीड़ो आज तक आज काल मा छे।

³⁰ त्यो कागळीयो होतो, त्यो जानतो होतो कि यहोवा–भगवान तिना छे कसम लेदलो छे, हाव तारा ओवलियाद मा छे एक जन क तारी राजगाद्दी पर बोठाड़ीस।

³¹ त्यो हुयने वाळी वात क पेहेल देखो देखीन ईशु मसीहन जीवतो होयनेन बारा मा हुयने वाळी ओगळायती वात करियो कि नी ते ओको जीव नरक छुड़ी गयो, आरू नी ओको डील सोड़्यो।

³² इनात् ईशु क यहोवा–भगवान जीवाड़्यो, जिना हामु गवा सी।

³³ इने रीति छे यहोवा–भगवानन जेवड़ा हात छे मोटो पद लिन, आरू बास छे ची चुखली आत्मा लेय लिन जेरो प्रतिज्ञा करलो होतो, त्यो यो रेड़ दियो जो तुमू देखु आरू सोमळता होय।

³⁴ काहकि दाऊद ते सोरगदूत मा नी चढ़ियो; पर त्यो आपसु कयता छे, पोरबु मारो पोरबु छे कयो; मारे जेवड़ा बोठ,

³⁵ जव तक हाव तारा दुस्मन क तारा पायो तले न चौकी नी कर दो।

³⁶ हीमि इस्राएल न आखो घरानो सच जान लेय कि यहोवा–भगवान तिना ईशु क जिनाक तुमू कुरूस पर चढ़ावला, पोरबु भी बोनाया आरू मसीह भी।

³⁷ तुमरो सोमळने वाळान कालजो टुट गयो, आरू त्या पतरस आरू दिसरा प्रेरित छे पुछने लागिया, ए भाईस्यो, हामु काय कोरजे?

³⁸ पतरस ओको कयो, “मन न पछातावो करो, आरू तुमरे मा छे आखा जना आपसा–आपसा पापो न माफी जुगु ईशु मसीह नाव छे बपतिस्मा लेय; ती तुमूक चुखली आत्मा न दान जोड़से।

³⁹ काहकि यु वायदो तुमरे, आरू तुमरा पुरिया पारी, आरू तिनु आखा दूर–दूर वाला लोगहन क जुगु भी छे जिनाक पोरबु हामरू यहोवा–भगवान आपसे पास बुलावछे।”

⁴⁰ त्यो घण सोवटी आरू वात छे भी गवाय दी दीन समझाड़ियो कि आपसा क इनी टेढ़ी जाती छे वाचड़ो

⁴¹ इने रीते जोतरा वचन क मान लेदा त्या बपतिस्मा लेदा; आरू तिने दाहड़े तीन हजार मानसोन धोड़े वोड़ ओका मा भेवाय ज्या।

⁴² आरू त्या प्रेरित छे गियान लेने, आरू भेवा हुयने मा आरू खानो खाने मा आरू विनता करने लागला रया।

विश्वासिया न साजो

⁴³ आरू आखा लोगहन मा बीक भराय गय, आरू घोणा सोवटा मोटा–मोटा काम आरू सोहलानी नेळताळान लारे हुयसे हुता।

⁴⁴ आरू आखा विश्वास करने वाळा एखटा रहवता हुता, आरू हेनकी सारी चीज साजलाय मा होती।

⁴⁵ आरू त्या आपसी–आपसी सम्पत्ति आरू समान वेच–वेचीन जोसी जेरी जरूरत रहवतली होती त्या वाट दिया करता हुता।

⁴⁶ आरू त्या दाहड़ीन एक मन होईन मंडळी मा एखटा हुयसे हुता आरू घर–घर भेळा होईन खानो खातला खुशी छे आरू सुतरे मनन छे खानो खाया करता हुता।

⁴⁷ आरू यहोवा–भगवानन बढ़ाई करता हुता, आरू सब लोगहन हिन्दरा छे खुश हुयसे हुता; आरू जो छुटकारू लेता हुता, हेनको पोरबु दाहड़ीन भेळा कर देतो होतो।