2 કોરિંથી 2 - परमेश्वरन सत्य वचन नवलो नियम1 हाव ने आपने मन मा योही ठान लेदो होतो कि तुमरे साथे नराज करने नी आवु। 2 काहकि यदि हाव तुमू नराज करू, तो मखे खुशी देनेवावा कुन होयछे, केवल चो जिनाक हाव ने नराज कर्या? 3 आरू हाव ने योही वात तुमू एरकरीन लिख्यो कि काही ओसो नी होय कि मारे आवने पर जो मखे खुशी हाववनो जुवे हाव उनछे नराज हुयो; काहकि मखे तुमू सब पर इनीये वात क विश्वास छे कि जो मारो खुशी छे, चो तुमू सब क भी छे। 4 मोट तकलीद आरू मन क कष्ट छे हाव ने घोणा छे आसा वयाडीन तुमू लिख्या हुता, एरकरीन नी कि तुमू नराज होय पुन एरकरीन कि तुमू उना मोट मोंग क जान लेदो, जो मखे तुमू छे। गोवती करनेवावा क माफ 5 यदि काही ने नराज कर्या छे, तो मखे ही नी वरना कि ओका साथे घोणा कड़ाई नी करू काही तुमू सब क भी नराज कर्या छे। 6 ओसो जन क करता यो दण्ड जो भाईस मा छे घोणा ने दिदा घोणा छे। 7 एरकरीन इनासे भला यो छे कि ओको गुणेहगार माफ करू आरू शांती देवु नी होय कि ओसो मानुस घोणा उदासी मा डूब जाय। 8 इनीये कारण हाव तुमू छे रावन्या करता छे कि ओको आपने मोंग क प्रमाण देवु। 9 काहकि हाव ने एरकरीन भी लिख्यो होतो कि तुमू पारख लेछे कि तुमू मारी सब वात क मानने क करता तीयार होय कि नी। 10 जेरो तुमू काही माफ करता होय त्यो उको भी माफ करता छे, काहकि हाव ने भी जो काही माफ कर्या छे, यदि कर्या होय, तो तुमरे कारण मसीह कि जगमा हईन माफ कर्या छे। 11 कि शैतान क हामु कर दाळ नी चाले, काहकि हामु ओकी युक्ती अनजान नी। त्रोआस गाव मा पौलुस कि व्याकुलता 12 जव हाव मसीह क खुश खबर सोमवाने क त्रोआस शहर मा आयो, आरू पोरबु ने मारे करता एक झोपलो उघाड़ दिदो, 13 ते मारा मन क सुख नी जुड़यो, एरकरीन की हाव आपने भाईस तीतुस क नी देख्यो; एरकरीन त्यो जाईन हाव मकिदुनिया प्रदेश क चाल देदो। मसीह मा विजय तिवार 14 पुन यहोवा–भगवान क धन्यवाद होय जो मसीह मा सदा हामु क जय क तिवार मा करता पुगता छे, आरू आपने ज्ञान कि सुगन्ध हामरे व्दरा हर जगमा पुगता छे। 15 काहकि हामु यहोवा–भगवान क निकट उध्दार देखनेवावा आरू नाश हुयने वाला दुय क करता मसीह की सुगन्ध छे। 16 काही क करता तो मरना क निमित्त मरलो कि गन्ध, आरू कोतरा क करता जीवन क निमित्त जीवन की सुगन्ध। भला इन वात क योग्य कुन छे? 17 काहकि हामु उन घोणा क समान नी जो यहोवा–भगवान क वचन मा मिलावट करता छे; पुन मन की सच्चाई छे आरू यहोवा–भगवान की आरू छे यहोवा–भगवान क हजुर जानीन मसीह मा बुलता छे। |
The New Testament in Dhankavi Language © The Word for the World International and Dhankavi Mandli, Khargon, Raykhed, Nandurbar, Maharashtra 2020