2ทกวิ้ไน 9 - Northern Pwo Karen Thai Bible

กจุ้แฆว้ มืง ลู่ง เชบา เฌ๊ ไจ ซาโลโม อ โอ

¹ ท่อง กจุ้แฆว้ มืง ลู่ง เว่ง เชบา​แน่ฌ๊า​แบ​ซาโลโม​อ​เม้งลื้อ​แซท้อง​นอ อ เว๊ เฌ๊ ลู่ง เยรูซเลง พ้า, บี่ซุ้ ม แม้แคว่ดุ้ ซาโลโม ดี๊ ทแกทเฌ้ ล เม้ง แบ ล เม้ง, อ เว๊ เฌ๊ ดี๊ อเพล่อบาง แอฌี่งแอฌ้อง, เฌ๊ ดี๊ เอ้า ต้าง ทน๊าม๊า ดี๊ ท๊อง แอฌ้อง, โอ ดี๊ ทแมล่ ลู่ง อ ฆวี้แค้, ดี๊ ท่อง อ เฌ๊ ท้อง ซาโลโม อ โอ เย้า นอ, อ เว๊ โล้ล้าง ทกุ้เม้ง พี่ โอ อ ซ้ะ พ้า เอะ ซาโลโม

² ดี๊ ซาโลโม ไคล้ช๊า อ ทแกทเฌ้ กุ้ อ เม้ง เอะ-อ้ะ, ท ล โอ น่าง เม้ง แบ, พี่ โอคุ้ซูงคุ้บีง พะไฆวะ ซาโลโม, พี่ ม ไคล้ช๊า เอะ เว๊ ล ซี แบ

³ ท่อง กจุ้แฆว้ มืง เว่ง เชบา, แด แบ ซาโลโม อ ทโกงซีมองแบ, ดี๊ บลาง พี่ อ ไต้ทาง เว๊

⁴ เลา ดี๊ ทอาง ลู่ง อ คะ คู, ดี๊ กเย่ กดูกแซย่ อ ล่าง ชี๊น้าง, ดี๊ อ เพล่ดู คุ้ แม้ เอะ อ เท่อ, ดี๊ อฆ้าอโฆ่ พี่ ไต้ทาง อ ซ้ะ, เลา ดี๊ อ เพล่ เฌ๊ โชะ ทโอ้, ดี๊ อฆ้าอโฆ่ พี่ ไต้ทาง อ ซ้ะ, ดี๊ อ ทลื่งทาง เช้า ทพูแฆ่ น๊างดื้ง, พี่ อ เทว๊ เว๊ ลู่ง กแช่ยาเวอล่างโอ นอ, กจุ้แฆว้ มืง โท๊ โย๊ เว๊ เฆาะ ล้อ

⁵ อ เว๊ โล้ เอะ กจุ้แฆว้ ไจ้ะเว๊, “ทอไฌ่อกย้อง พี่ จ แน่ฌ๊า แบ-อ้ะ ลู่ง จ ค่าง พ้า, แบฆ้ะ ดี๊ น ทไพ้ะทแม้, ดี๊ น ทโกงซีมองแบ นอ, เก ทอเมะอโต้ เต้ๆ, ล้อ

⁶ แบเด้าะ จ ล นะ ทโล้ทละ นอ แบ, ท๊อง จ เฌ๊ฌูง แน้, จ แด ดี๊ จ กแช่ อ เมะ, ดี๊ แคว่เซ้อ, พี่ โพล้ง โล้ เอะ แย้ นอ, ล พุ้พ๊างทาง น ทโกงซีมองแบ ได้ะ แบ, น ซี น ฌี้เละ โพล้ง อ ทโล้โค, พี่ จ แน่ฌ๊า แบ-อ้ะ นอ ได้ะ

⁷ กเย่ โพล้ง นี๊ แด ลแพ นอ โอมึโอพ้า, กเย่ น กดูกแซย่ ลแพ อี้ง โอมึโอพ้า, เมะเว๊ โพล้ง พี่ อ โอ แม้เท่อไพ้ะเท่อ ลู่ง น เมะแซ พ้า, ดี๊ คุ้ช๊องแน น ทโกงซีมองแบ นอ โอมึช๊องพ้า

⁸ อางปฆ้าทาง กแช่ยาเว น กแช่แยว้, พี่ ทแบ อ ซ้ะ ดี๊ แน้, ดี๊ ต๊างทาง แน้ ลู่ง ทล่าง ชี๊น้าง คู, เก กจุ้แฆว้ ลู่ง กแช่ยาเว น กแช่แยว้ อ ฌ่าง, เมะเว๊ น กแช่แยว้ นอ เอ โพล้ง อีซลาเอง, ดี๊ ม ไต้ทางต๊างทาง อางกี เว๊ ล้างชู้ ล้างแกย, กแช่แยว้ ต๊างทาง แน้ ม๊า เก อ ซื๊งเว๊ อ กจุ้แฆว้, บี่ซุ้ น ม เกล๊าง ทอเกิ้งอแบ ดี๊ ทแบกแช่แยว้ อ ซ้ะ”

⁹ ฌ้อง กจุ้แฆว้ มืง ลู่ง เชบา, เทว๊ เอะ กจุ้แฆว้ อ ท๊อง ฆ๊า ลี่ง ม๊า กีโล, ดี๊ ทน๊าม๊า เด้าะ แอฌ้อง, ดี๊ ทแมล่ ลู่ง อลื่งดูฆวี้แค้, ทน๊าม๊า บี่ซุ้ดี๊ กจุ้แฆว้ เทว๊ เอะ ซาโลโม อี้ง ล โอ น่างชุ้ ได้ะ แบ

¹⁰ แอ นี่ อ นอ ได้ะ, ฮีราง อ กดูกแซย่, ดี๊ ซาโลโม อ กดูกแซย่ พี่ อ แม้นี่ ท๊อง ลู่ง โอฟี พ้า นอ, เฌ๊ไท้ โชะ เซง เก่อล้า ดี๊ ทแมล่ ลู่ง อลื่งดูฆวี้แค้ ปะ

¹¹ ฌ้อง กจุ้แฆว้ เจ่ เซง เก่อล้า นอ, ไต้ทางนี่ กแช่ยาเวอล่างโอ, ดี๊ อ กแช่ อ บลาง นอ อ ฆ๊าง ดี๊ ไต้ทางนี่ ทแน่พี่โอดี๊อโน้ง, ทแน่ พ้ะดู ลู่ง โพล้ง ซ้ะอวีง แท๊ นอ อ ฌ่าง, ลู่ง ที๊งล่างค่างพ้า ยูดา นอ ล แด แบ ทบี่อี้ง น่าง พ๊า ได้ะ แบ

¹² กจุ้แฆว้ ซาโลโม เกล๊าง เอะ กจุ้แฆว้ มืง ลู่ง ค่าง เชบา อ ทกุ้เม้ง, พี่ อ เว๊ แบซ้ะ อางท่าง เว๊ นอ, แอเละ เท่อ พี่ กจุ้แฆว้ มืง เฌ๊ เทว๊ เอะ-อ้ะ นอ ได้ะ, อ กย้อง บี่นอ, กจุ้แฆว้ มืง ไท้ๆ, ลู่ง อ กแช่ อ ที๊งล่างค่างพ้า, ล พ๊า ฆ่าง ดี๊ อ กดูกแซย่ ซีงลแพ นอ ล้อ

ซาโลโม อ ทโอเฌิ่งโอค๊า

¹³ ท๊อง พี่ เฌ๊ โชะ โซ๊ง เอะ ซาโลโม ล เนง พ้า นอ, ฆ๊า คี๊ง ไซ ซ๊า ม๊า กีโล

¹⁴ ท๊อง พี่ โพล้ง โพะเละแม้แค้ เท่อ, ดี๊ โพล้ง อางแช๊ เท่อ เฌ๊ โชะ เว๊, ดี๊ กจุ้แฆว้ ค่าง อาระเบีย กุ้ แฌ้ ดี๊ กเย่ โพล้งโพะคองเว่ง ลู่ง ที๊งล่างค่างพ้า เฌ๊ โชะ เอะ ซาโลโม อ ท๊อง, ดี๊ จี้ นอ โอเจ ได้ะ

¹⁵ กจุ้แฆว้ ซาโลโม เกม๊า แม้นี่ ท๊อง, ไน๊ เว๊ เก นางปด้าง พ้ะดู คี๊ง แย้ เบง, นางปด้าง ล เบง นอ เจ่ ท๊อง ฆ๊า เมาะ เนว๊ กีโล

¹⁶ ดี๊ อ เว๊ เกม๊า แม้นี่ ท๊อง, ไน๊-อ้ะ เก นางปด้าง ซ๊า แย้ เบง, นางปด้าง ล เบง นอ เจ่ ท๊อง ฆ๊า เมาะ ซ๊า กีโล คึ, ดี๊ กจุ้แฆว้ อางกี นางปด้าง นอ, ลู่ง อ ล่างโอไปว้ะชู๊ มแลแกล้ เลบาโนง พ้า

¹⁷ กจุ้แฆว้ แม้ทางนี่ อ ล่าง ชี๊น้าง ดี๊ กช๊าง เม พ้ะดู, ดี๊ กล้ะไบ้ะ เว๊ ดี๊ ท๊อง ลู่ง อ แย ฌี้

¹⁸ ทล่าง ชี๊น้าง นอ อ ฆ๊าง โอ ฆู๊ง แซว๊, ดี๊ คาง ไย่ ล่าง นอ แม้ เว๊ ดี๊ ท๊อง, พี่ โอ บึ้เบง ดี๊ อ ล่าง ชี๊น้าง, ดี๊ อ ล่าง ชี๊น้าง แพ้ล้อง คี๊ง โค๊ นอ โอ ดี๊ ทล่าง อางกีล้าง จูง, โอ ดี๊ คี๊ยื่ง อ ฌ้าง คี๊ง ดื้ง, ชี๊เทิง ลู่ง อ ล่าง อางกีล้าง จูง อ ฆ้อง คี๊ง โค๊ นอ

¹⁹ คี๊ยื่ง โอ ชี๊ง คี๊ง ดื้ง ได้ะ, ชี๊เทิง ลู่ง ฆ๊างแซว๊ ฆู๊ง แซว๊ นอ อ คู, ล แซว๊ๆ, นอ คี๊ง ดื้งๆ, มื่งบ้าง ล โอ น่าง จอง แบ เฆาะ, พี่ อ แม้ เท่อ บี่อี้ง

²⁰ ซาโลโม อ โท๊กีง เจเล กุ้เม้ง นอ ไต้ เว๊ ดี๊ ท๊อง, ดี๊ ทพ้าทล่าง กุ้เม้ง, ลู่ง อ ล่างโอไปว้ะชู๊ มแลแกล้ เลบาโนง พ้า นอ, ไต้ เว๊ ดี๊ ท๊อง ลู่ง อ ฌี้, ลู่ง ซาโลโม อ ชู้ แค๊ นอ, จี้ นอ เก เท่อ อลื่งอฆวี้ ล โอ แบ นอ ล้อ

²¹ เมะเว๊ กจุ้แฆว้ อ คลี๊ง นอ, ลี้ เท่อ ลู่ง ทาราชิ้ พ้า ล พ๊า ฆ่าง ดี๊ ฮีราง อ กดูกแซย่, คลี๊ง น๊างโป้ง ลู่ง ทาราชิ้ พ้า นอ เฌ๊ โชะ ท๊อง, จี้, กช๊าง เม, โพ๊ไล้ะ, ดี๊ ทูซยะ, ซ๊า เนง ล พ๊า

²² อ กย้อง บี่นอ, กจุ้แฆว้ ซาโลโม ดูเละโท๊เละ กจุ้แฆว้ อ แฌ้แพ, ลู่ง ฌางคูโคล๊งคู อี้ง, แบฆ้ะ ดี๊ คองแซย้ ดี๊ ทโกงซีมองแบ อ ไฌ่

²³ ดี๊ กจุ้แฆว้ เลาพะ ลู่ง ฌางคูโคล๊งคู อี้ง, อางฆื๊ง อช๊าอโท่ พี่ ม เฌ๊ โอ ซาโลโม, บี่ซุ้ ม คุ้ช๊องแน เว๊ อ ทโกงซีมองแบ, พี่ กแช่แยว้ เกล๊าง เอะ เว๊ โอ ลู่ง อ ซ้ะ พ้า นอ

²⁴ กุ้ แฌ้ นอ เฌ๊ โชะ อ ทแบเกล๊าง, เมะเว๊ ทพ้าทล่าง จี้ ดี๊ ทพ้าทล่าง ท๊อง, ไช๊ช้าง, นางดึ้นางชาง, ทน๊าม๊า, กซี ดี๊ แนว้ ฆวี๊ซุ้ ดี๊ ทอางกีล้าง เว๊ กุ้ เนงๆ, นอ ล้อ

²⁵ ดี๊ ซาโลโม โอ ดี๊ อ กซี พ้อง ลู่ง กซี, ดี๊ เลาะ ดึ้ซึ้ เท่อ อ ฌ่าง นอ ลี่ง ม๊า เช้า, ดี๊ ซึ้พู เทา กซี โอ ล ไซ คี๊ง ม๊า แฌ้ พี่ อ เกม๊า เว๊ อ โอคระ ลู่ง เว่ง เลาะ ดึ้ซึ้ เท่อ, ดี๊ โอ ดี๊ กจุ้แฆว้ ลู่ง เว่ง เยรูซเลง

²⁶ ดี๊ ซาโลโม โพะคอง กจุ้แฆว้ กุ้ แฌ้, ล โค๊ ลู่ง ที๊ง ยูเฟตี กล้อง, ลี้ ท้อง ลู่ง โพล้ง ฟีลีเตีย อ ที๊งล่างค่างพ้า, ดี๊ ท้อง ลู่ง อีไย้ะ อ ค่างช๊า

²⁷ ดี๊ จี้ ลู่ง เว่ง เยรูซเลง นอ, กจุ้แฆว้ แม้ เกก้ะ เว๊ บี่ซุ้ดี๊ โล่ง นอ ล้อ, ดี๊ ดึ้ เกม๊า ซย๊องซีดา โอ แอฌี่งแอฌ้อง, แบด้องซุ้ เซง กูงเย้ ลู่ง เชเฟลา พ้า

²⁸ ดี๊ โพล้ง แม้นี่ กซี ลู่ง ค่าง อีไย้ะ ดี๊ ลู่ง ฌางคู ล่าง พ้า กุ้ จอง เฌ๊ เทว๊ เอะ ซาโลโม

ซาโลโม ซี๊งไฆวะ เว๊

²⁹ ซาโลโม อ ทไพ้ะทแม้ อ แฌ้แพ, ล โค๊ ลู่ง อ คางไท้ะ ท้อง ลู่ง อ คี๊ง นอ, แบ ทกวิ้ล้าง-อ้ะ ลู่ง โม นาทาง อ ไละ ทกวิ้ไน พ้า, ดี๊ ลู่ง อาฮียา โพล้ง ชีโล อ ทไคล้คิ้ พ้า, ดี๊ ลู่ง อิ้โด โพล้ง โล้ เว้ เท่อ, แบฆ้ะ ดี๊ เนบ้ะ อ พู เยโรโบอาง อ ทแดเว้ พ้า นอ, ล เมะ แบ-อ้า?

³⁰ ซาโลโม โพะคอง โพล้ง อีซลาเอง ลู่ง เว่ง เยรูซเลง พ้า, เลาพะ นอ นี่ ลี่ง ชี๊ง เนง

³¹ ดี๊ ซาโลโม ไท้ โอ ดี๊ อ พี๊ง อ พู๊ง ลู่ง แย๊, ดี๊ โพล้ง เคิงล้างบ้า อ จู ลู่ง อ แพ่ เว่ง ดาเว พ้า, ดี๊ อ พูแคว๊ เรโฮโบอาง โพะคอง เท่อ เท่งก้ะ อ ล่าง นอ ล้อ