फिलिप्पी 4 - नोयरी नोवलू नियम

पौलुसोओ सलाह

¹ याआ कोअता ऐ माआ प्रिय पाहि ज्यामेहे माआ जिव लागाडित रोतलू, जो माहू खुशीई अने मुकुट होय ऐ प्रिय पाही प्रभु में एहल्यास प्रकारे स्थिर रोवा.

² आय युओदिया अने संतुखे याआ बेनुहू प्रोस्ताहीत कोअत्लू का तुमु प्रभू माय एक हारखे मोन बोणाडीत रो.

³ माआ प्रिय दोस्ता ताहु पण आय आग्रह कोअहो का याआ बोअयीही मदत कोओ क्लेमेंस तेहलूज माआ दिहरे सहकार्य सहित सुवार्ता प्रचार माय माआरी एकजूट होय तियाआ नावे जीवनाआ पुस्तकाम लेखिलो गोये होय.

कायम आनंदीत रो

⁴ प्रभू मेहे कायम आनंद मेहे रो आय ईजि कोहो आनंदीत रो.

⁵ ओ आय ईजि कोत्लू का आनंद कोईत रो तुमाआ सहनशील आत्माज ज्ञान आखे मांहुंमे रोअला आवे प्रभू जागेज होय.

⁶ कोडनीबि गोठीपो चिंता कोहू नाहा पोन हर एक परिस्थितीमेह धन्यवाद आपित प्रार्थना अने विनती कोईत आपाआ मागणी परमेश्वरा आगाडी कोआ.

⁷ याज परमेश्वारापो रोत मिलविनारो शांती जी समजीलो तिवोल होय तुमाआ मोनाहा अने तुमाआ बुद्धीला ख्रिस्त येशुमेहे सुरक्षित मेके.

या गुठ्या पोओ ध्यान लागाड़ा

⁸ ओ पाही तिया गोठीरी लक्ष्य लागाड जे खोरो होय जे वोडो होय, जे योग्य होय, जे पवित्र होय, जे खुशिमेरोत होय, जे श्रवणीय होय, किंवा किबी पण दिहरे गुण वा किबी प्रशंसा.

⁹ जे तुमु मापोरोत हिकल्ये होय, जुळाविते होय, होमल्यु होय किंवा जे किबी कोअता माहु तुमु पालील्यो होय तिया गोटीविषयी अभ्यास कोईत रो शांतीचा उगेहे स्थान जो परमेश्वर तुमाआरी होय.

दानो कोअता धन्यवाद

¹⁰ तुमु माआ निच्छित हाजाकोता विचार कोईत ओते परंतु ते देखाडल्या कोअता तुमामे वेल मिल्यू नाहा परंतु ओमे आखरी तुमामे माबद्दल फासी चिंता जाग्तली उवी होय ह्याआरी आय प्रभूमे आय जास्तीज खुस ओवयू होय.

¹¹ किबी आवश्यक होय कोईत कोयु आय नाहा काहाके आय ज्या पण परीस्थीतीम रोला होय आय तियाहा संतोष रोलो सिकाहू लेधलो होय.

¹² दैन्य व्यवस्थेत रोहिलो माहु होमजे होय अने ओ पण मालूमे होय का संपन्नतेत केहलो रोल्या जोवे केहली पोन वेल आवयी होय अने एहली पण परिस्थिती, जेबी पेट पाअये होय किंवा फुकल्यो होय, जेबी जागे जाखो किबी ओईला किंवा जेबी जागे किबी ने ओय आय याआ आखाम सुखी रोनाराआ भेद शिकायो होय.

¹³ जो माहु शक्ती आपत्लू तीयावाही आय आखे परिस्थिती आगाडी जाऊ शकतो.

¹⁴ किबी पोन होय तुमु माआ मेहनती मेहे आथे आपित हाजो काम कोयु होय

¹⁵ ऐ फिलपैकरांनो, तुमामे ताहा ठाऊकच होय सुवार्ता प्रचाराच्या पेल्लाठीच दिहोम जाहा आय मकिदुनिया सोडये ओते तेहलाम लेनदेन माय तुमाआ मंडली सोडीत दिहरा मंडळ्यानी माकोअता आथे मदत कोअयु ने ओतू.

¹⁶ आय जाहा थिस्सलुनीका माय ओतु तेहलाम माआ आवश्यकता पुरो कोइला कोअता तुमु तोज-तोज माहु मदत मोक्ल्यीत ओते.

¹⁷ एहलो नाहा का दानोओ अपेक्षा कोअत्लू परंतु आयताहा ओ अपेक्षा कोअत्लू का तुमाआ जमेची बाजू वाळविलोओ एहली इच्छा कोअत्लू.

¹⁸ तुमु इपफ्रुदितूस च्या ओतु कोईत दान मधुर गंध भेट माय मा आहने मोक्ल्यीत होय ते एक एहलो ग्रहण कोअला का योग्य बलिदान होय ज्याआपोरोत परमेश्वर प्रसन्न ओतू तियाअ दानांनी माआ गरजेदेखओ जाखो उवे होय माहु पुरो तर्हेने आप्लु होय ती वस्तु मधुर गंध रुपोमे भेटाने होय एहलो का ज्या भेटाने परमेश्वर खुश ओतू.

¹⁹ माआ परमेश्वर तुमाआ आखी गोरोज गौरव येशु ख्रिस्तमेहे तुमामे आपाआ धनाने पुरो कोअही.

²⁰ आमाहा बाह्हू परमेश्वरोओ कायम गौरव उवनारा रोहीजा आये.

नमस्कार अने आशीर्वाद

²¹ ख्रिस्त येशुउ हर एक पवित्र भोक्तोहो नमस्कार, माआरी जे पाही होय ते तुमामे नमस्कार कोईत होय.

²² तुमामे आखे पवित्र भक्त अने विशेष कोईत कैसर परिवाराआ मांहे नमस्कार कोईत होय.

²³ तुमामे आखापो आमाआ ख्रिस्त येशुउ कृपा तुमाआ आत्मा आरी रोय आमेन.