फिलिप्पी 2 - नोयरी नोवलू नियम

मसीही विनम्रता

¹ ओमे जर मसीह मेहे कीबी प्रोत्साहन अने प्रेम मेहे धाडस अने आत्माआ सहभागीता अने काही करुना अने दया होय,

² ताहा माहु पुरो तऱ्हेने आनंद को माहु लागेहे का तुमु ए मोन वाही रोवा को परस्पर एकुच प्रकारे प्रेम को आत्माम रोत एक ओन, अने एकुच साइटूमे लक्ष्य दया.

³ विरोध आने ठोगो बड़ाई कोअता कीज मा कोअहा पोन नम्र ओला अने दिहीराहा आपाआ पेक्षा उत्तम माना.

⁴ तुमा मेरयो हर एक माहू आपाज पालहू कायना ताहा दिहरा हाजाकोता बी विचार कोईलो.

मसीह दीनता अने माहानता

⁵ आपाआ स्वभाव एहलो मेका जीही ख्रिस्त येशुप रोत ओती,

⁶ जो आपाआ स्वरूपाने साक्षात परमेश्वर ओतू पोन तिये परमेश्वरा बरोबर आपाआ समानतेला केधी लाभ कोईत महांआ नाहा.

⁷ पोन तिये खुदोहो शुन्य कोईत दासाआ रुपोमे ग्रहण कोयु अने मांहो होस रोला.

⁸ ताहा तिये स्वतःहा नम्र कोईत रेवू आज्ञाकारी बोल्यू का तिये खुदोओ जीव सुद्धा क्रूस आप्यू.

⁹ त्याकोता परमेश्वराने बी तियाहा उचो जागापो उभे कोयु अने तियाहा ते नाव आप्लु, जे आखे नावापो रोत श्रेष्ठ होय,

¹⁰ याकोअता का आखे जोओ घुटने टेके तेहलाम नम्र उवे जेबी ते स्वर्गाआ होय का धरती होय किंवा धरती निसऱ्ये होय,

¹¹ अने हर एक जीभ परमेश्वरोओ बाह्हाआ गौरव कोअता ग्रहण कोईलो का येशु ख्रिस्त ओच प्रभू होय.

ज्योति होस सोमका

¹² याकोअता माआ प्रिय पाही, तुमु मापो आदेशाचे पालीत पहीले कोईत ओते जांहा आय तुमाआरी ओतू जर आय तुमाआरी नाहा तेहलाम तुमु जाखा लक्ष्य आपित तियाआ पालीत कोईलो परमेश्वरोओ प्रती पुरो आदर आप-आपाआ तारण पुरो उवे याकोअता काम कोईत रो,

¹³ काहाके तो परमेश्वरुज होय जो तिया कामा कोअता इच्छा अने ते काम पुरो कोईलाकाजे जे परमेश्वरोओ गोमतो ते तुमामे निर्माण कोईत ओते.

¹⁴ किबी तक्रार अने लोळाई न कोअता काम कोईत रो,

¹⁵ याकोअता का तुमु निर्दोष अने पवित्र बोनाळीलो तेहलूज तुमु याआ कुटील अने विपरीत पीडी निर्दोष अने निष्कलंक ओत देवाआ पोऱ्ये उवे तियामेहे तिया जगत मेहे तुमु तियाअ टायमोमें ज्योति बोणीत चमकावीलो

¹⁶ जाहा तुमु तियाहा जिव आपनारु संदेश मानत्लू तेहलाम तुमु एहलो कोईत रो याकोअता का ख्रिस्ताआ फासी आविलाआ दिहोम ओ पालीत का जीवनामे गुगधील व्यर्थ गोये नाहा पोन तुमापो गर्व कोअनारू.

¹⁷ तुमाआ विश्वास एक बलिदान अने सेवा होसे होय जर माआ रक्त तुमाआ जोरोपे द्राक्षरस ओतीत आप्यू तेबी तो माहु पोटल्यो होय तुमाआ प्रसंन्नते मेहे माआ पोन सहभाग होय.

¹⁸ त्याप्रमाणे तुमु बी प्रसन्न रो अने माआरी आनंद को.

तीमुथियुसोओ सराहना

¹⁹ प्रभू येशुउ मदतीवाही माहु तीमुथियुस तुमापोओ मोकलिलो आशा होय का याकोअता का तुमाआ सुवार्तेला माआ पोन उत्साह वोधाडीलो.

²⁰ काहाके दिहरु एहेलू माहहू नाहा का ज्याआ मनो मा सारखो होय अने जो तुमाआ हाजाकोअता खोरो मोनाकोईत चिंताम होय.

²¹ काहाके आखे आप आपाआ कामोमे व्यस्त होय येशु ख्रिस्ताआ कामोमे कोडूच व्यस्त नाहा.

²² तुमु तियाआ चरित्राला ओलखिल्यू का सुवार्ता प्रचारा मेहे माआरी तिये एहोलोच सेवा कोअयी होय जेहलो एक पोऱ्या आपाआ बाह्हा आरी कोअत्लू.

²³ जेहलो माहु जाहा मालुम उवे का माआरी किबी उवे होय आय तियाहा तुमापोओ मोकलिलो आशा राखनारो.

²⁴ अने माआ विश्वास होय का प्रभूउ मदतीवाही आयबी वेगुज आविही.

एपफ्रदितुसोहो सराहना

²⁵ पोन माहू आवश्यक लागेहे का एपफ्रुदितूस ला तुमापोओ मोकलित जो माआ पाही होय अने आरी काम कोअत्लू अने मदत कोअनारे होय तेहलूज माहु आवश्यक ओत्गोयो माआ सहाय्या काजे तुमाआ प्रतिनिधी रोला होय.

²⁶ काहाके तिया मन तुमा कोअता व्याकुल रोत ओतु अने ह्याआरी जास्तीज खिन्न ओतु का तुमु ए होमल्यु ओतु का तो मांदवाड्यू पोडीत ओतु.

²⁷ होय, तेहलाम तो मांदवाड्यू ओतू का तो मोईत जानारू ओतू परमेश्वराने तियापो कृपा कोअयी (त्यापोओ नाहा पोन मापो बी कृपा कोअयी) याकोअता का माहु दु:खाहून दु:ख न मिलुजोवे.

²⁸ त्याकोता आय तियाहा फासी वेगु मोकलित होय याकोअता का जाहा तुमु तियाहा पालनारू तेहलाम एकवा फासी प्रसन्न ओवे अने माआ बी दु:ख निहित जालो.

²⁹ याकोअता प्रभूमे वोडो आनंदावाही तियाआ स्वागत को अने एहलो माहुंहु अधिक जाखो आदर आपित रो,

³⁰ काहाके ख्रिस्ताच्या कामा कोअता तो लगभग मोईत गोल्यो ओतु याकोअता का ताआपो रोत कोअयी जाति रोईली माआ सेवामेह जे किबी कोम घटी रोली ओती तियाहा तो पुरो कोईओलो तीयाकोता तिये स्वताचा जीव बी आपुहू कोअयु.