Tklien 3 - V'nen P'as iv'i Turanien Trtarep' m'a Turanien M'dah

A pruvet irn istu, v'eti iv'ah a Mlin Eia

¹ Kana nv'i dui ntla sera der lil, La idan arna napilakt na nl reran ha.

² Itv'ev'a sera kana, kattp' sera kana a ti p'ev'el, V'eti iani ti nv'el al m'alk, aau, nut iaren.

³ Nvrdaui, itvav sera lm'an, a ti ipamlen kana. Iani dav'a dav'a, kahiris a napn.

⁴ Iten sarei ti p'akk, m'a nila p'akk arstu, inep'a ti nv'i m'ertarep'. Itrdus sarar suk.

⁵ Ithl sera m'ev' lil iamk asnk, a ti nkav'el kadav'a a vut kinkin. Itmlden sera kana m'a si haau, m'a sei iani ntakal.

⁶ Ittp' sera kana dav'a ti nlak arna nut m'alk, Kanep'a sarar m'ertu, la atvram'a sarei itauamu ha.

⁷ Itlu sera nai vtvtv asnk. Laha, avihih kana, a ti nkaruh kav'el. Iten sarei ti sen, la iuada kana ha, ima kahdv istudau.

⁸ Naran ntakal eia, kav'ana eia sp'n, Hin ip'leskar liu, a ti tamatak ikaiari.

⁹ Ittukar sera navanelak m'a nav'et atr sarei. Iten sarei ti navanelak avhapr.

¹⁰ Hin inep'a sera si dm iv'i pea asnk, aau, ilaksrah kana, Hin inep'a sera laiun iamk, itutuah, a ti ipahan kana.

¹¹ Itvav sera kana, a ti nkav'el arna navanel ml, katiapr sera p'akk. Iten sarei ti nlak mamk uaki.

¹² Itendedp' sera tenpauian, a ti ipalua kana, Aau, ip'a kana ihua, sena ti irn ti naluan iparp mamh kana.

¹³ Laha, iten sarei ti naluan, la avrater al naten na naluan ha, Atvva sera v'atk.

¹⁴ Kana ntama sarei kav'i sei arm'ertuak avsip'lani nakl - Avhai kavsip'len kana, m'etav'aran ier lihat.

¹⁵ Iten sarei ti nlini a si haau, Kattp' sera kana a ti p'em'nm'n a naui haau.

¹⁶ Itkapr sera luk m'er nav'et papa nakl, Kattavkar sera p'akk m'a tih nap'.

¹⁷ Nakm ktlev'la sera m'im'ilk, tamat iter v'iv'a au a kana. Kana ntvnapn sarei a nut nsilv' inap'ei, naran niak a sei istudau.

¹⁸ Laha, nv'ana, kavr ti a, “Nut huak ihei ml. Npasla ti ihua a ti p'ev'ah ti a Mlin Eia ipan si kinkin.”

¹⁹ Mlin Eia, pav'ahur kana arna der laha, kap'a kana sena ti nunanut uaki. Pav'ahur si haau nm'ni m'a m'erasin haau.

²⁰ Arna m'im'ilk, nv'ahuri uam, V'eti v'ahienak irs naran nv'ahuri inap'i lera.

²¹ V'eti si laha iv'i sei nv'ahuri nakl, Sena si lera nrndu ti p'ev'ah Atua uam.

²² Sena ti a Mlin Eia irn istu a natei, kani ti nvlak uam, ndavram'a uam. Sena ti Atua irn istu a m'ertu nakl, v'ahien p'as lera ikahrs naran kinkin.

²³ V'ahien lera inep'a ti iv'i v'ahien m'dah arna m'etav'aran udlani - Nakm, Mlin Eia, kviviln udlani.

²⁴ M'im'ilk iv'ana, kavr ti a, “A Mlin Eia iv'i nkak. !Sena si lera, nv'ahi nakl!”

²⁵ A Mlin Eia ien si p'as anr m'ertu avtrahi, Aau, ien si p'as a m'ertu itala ani.

²⁶ Ip'as a ti m'ertu ipalak ms, kav'ah Atua, Aau, ip'as a ti ipalaksrah naran na ti a Mlin Eia ipalev'lei arna si stu.

²⁷ Ip'as a ti dui ipam'akar katu triuauahan arna van, Naran iv'i malakal uam.

²⁸ Ipalak mamk, ikav'ana, Sena ti Atua ittu sera parei lera ani.

²⁹ Ipatu pnn al neiev' - Kav'ahur ti ipav'ah Atua uam.

³⁰ Ipavr ti m'ertu iparn ti ipusei, ipap'tir katu pla nahn ani uaki, Ipavr ti m'ertu ipalep'lei, v'eti ipap'as uaki.

³¹ Sena ti a Mlin Eia ikasran m'ertu Ikahiris naran.

³² Aau, ipavr ti ipani ti aparn ipastu ipatauamu, V'eti Hin iparn istu a m'ertu uam, ipaviviln a p'kln, sena ti Hin irn istu istudau a m'ertu nakl.

³³ Sena ti iarn ip'as a ti iparp m'ertu, Aau, iarn ti ipani ti arnet m'ertu apavrn istu nakl.

³⁴ A Mlin Eia iarn ip'as a ti ipapasr m'ertu a nadep', Aau, arm'ertu, la avp'resin arna nadep' ka ha.

³⁵ Arna naran na ti apav'ana hua m'a m'ertu, Atua iarni ip'as a ti ipavav sei, Sena ti iviviln a ti m'ertu ipalak a nv' v'nen hua, kap'tir arna nahn a Mlin Eia, la ilak eia ha.

³⁶ A Mlin Eia iarni ip'as a ti ipamlen m'ertu, Naran m'ertu lera irn ti ipan si ipamk.

³⁷ ?Hin ak irndu ti ipav'ana, sarei, kani ti sei ivri ipatu hin, Naran a Mlin Eia idavr ti ipatu hin?

³⁸ ?Karndu ti der lil, m'er si p'sp'as, Avdan arna pnn a Mlin Eia, la ilak eia ha?

³⁹ ?Iviviln a ti m'ertu, la isilv' ha, ipav'ana stu, v'aha ihei? ?Iviviln a ti dui ipav'ana stu, naran Atua itrp sarei sena si stuan?

⁴⁰ P'vv'ahur sei nvani nakl, aau, p'vv'ahur mamh si udlani nvani, Sarei kavm'alet asn a Mlin Eia.

⁴¹ P'vlmlm lm'am'em', m'a nlm'em', Asn Atua, la ilak arna nut eia ha.

⁴² Ntvan sera si stu, aau, ntvmlen sarei Atua. Mlin Eia, Nakm kdarn istu a kam'em' arna si stuam'em'.

⁴³ Kttavkar sarah m'a nl reram, sarei, kttkr an sera kam'em'. Aau, kttrpep'n sarar m'ertu, kdarn istu anr.

⁴⁴ Kttavkar sarah m'a p'knaran iamk, A ti tamatar m'ertu ikaiarh.

⁴⁵ Kten sarei ti nvrama kavv'i sei alev'lei al ssv'en, kavv'i tkv uaki, Arna nahr arm'ertu.

⁴⁶ Arm'ertu udlani, la avmlen kam'em' ha, Atviela sera pnr a ti apavmlen kam'em'.

⁴⁷ Nam'et iamk itier sera kam'em', laha, nvdedrn istudau. Nvlak mamk, atutakm sera si udlani uaki.

⁴⁸ M'atak ilini a ui m'eta natei, aau, inep'a sera naui lil naran irarev', Sena ti atutakm sarei a net tav'etan arm'ertuak.

⁴⁹ Ui m'atak irarev', aau, iahiris, Irarev' dav'a.

⁵⁰ Ipanap'i lera dav'a ti a Mlin Eia, la ilak eia ha, Ipap'a nut a nadep' ml, kala sei itu hin.

⁵¹ Naran nla sei m'a m'atak, iani ti nrn istu arna m'im'ilk, Sanar net tav'et udlani arna v'anu lilak.

⁵² Arm'ertu avmlen kana avtkr a kana inep'a nut atkr a m'anh inap'ei, V'eti iav'i sena si kinkin.

⁵³ Inep'a ti avkap'n kana al tah lil, Aau, avmhr kana m'a nav'et.

⁵⁴ Nauei irarev'kar ptk, Laha, nv'ana, kavr ti a, “!Nsarei kana p'am'a ra!”

⁵⁵ U Mlin Eia, nv'ara naham, Naran nlak arna tah lil, la iter auei dau ha.

⁵⁶ Nakm ktrn sera drlk, naran nv'ana, kavr ti a, “Matutuan drlnam asnk, a ti mkav'rn a kana naran nm'im'in ihua, naran nv'ara anh a ti pasr lm'ak.”

⁵⁷ Nakm kmima asnk arna napn nv'ara anh, Sarei kavr ti a, “!Madedrn!”

⁵⁸ U Mlin Eia, Nakm ktp'tir sarei kav'ana arna m'lna m'im'ilk, Aau, Nakm ktulla sera silv'ienak.

⁵⁹ U Mlin Eia, Nakm ktla sera nut arm'ertu avutakm a kana inap'ei. Pav'ana hua sanak.

⁶⁰ Nakm ktla sera ti avrn ti apavtum'alet a sei a kana. Aau, Nakm ktla sera ti atvv'ahur sera navanel a ti apavrp kana.

⁶¹ U Mlin Eia, Nakm ktrn sera v'nenar, la iv'iv'en ti avlep'la kana ha. Aau, ktla sera ti atvv'ahur sera navanel a ti apavrp kana.

⁶² Ktla sera pnr arm'ertu, la avmlen kana ha. Krndu ti avv'ana papa kavvrur kana, m'etav'aran ier lihat.

⁶³ Pap'ar naran apavlak arna nadep', v'aha naran apavp'tir - Sena ti kana nv'i npin stu iamk, la avhai ani ha.

⁶⁴ U Mlin Eia, patum'alet a sei anr, Ipaviviln a pari avani m'er lm'ar.

⁶⁵ !Pani ti apavrn istu arna nlr, Aau, nrn ti v'nen huam, la iv'iv'en nl reram ha, ipaiarr!

⁶⁶ Naran nlm iparer anr, patkr anr kakap'nr, Akavlak ml a nv' p'knaran, la iv'i nkan a Mlin Eia ha.