Tklien 2 - V'nen P'as iv'i Turanien Trtarep' m'a Turanien M'dah

Atua nln irer an a Serusalem

¹ !A Mlin Eia ittavkar sarei A natn tav'etan a Saiun m'a p'knaran iamk, sena ti nln irer! Itsran sera si p'sp'asan a Isrel a nadep', Aau, itsran sarei dan arna nut eia, laha, ier a nadep'. Arna napn na nl reran, Idav'ahur napl, la isran tln aranan ha.

² A Mlin Eia itdrlm' sarar nut udlani a Sikup ilak nakl, Aau, idarn istu ani ki. Arna nl reran, itkasr sarar nmah hua lililan A natn tav'etan a Suta. Itkasr sarar a nadep', Katutakm sarei a v'anu, m'er armlin na v'anu.

³ Ittrla sera nut huan a Isrel udlani, Sena ti nln irer istuduet, kahuet. Itlev'la sera m'ldu lm'an asn m'ertu imlani, A ti ikatukar a Isrel ml. Itv'i sera nep'v'en lil iamk, la iv'en kamlen a Sikup ha. Itu nap' a si udlani, kani ti si udlani imldani ihapu.

⁴ Ip'tir inep'a nut m'ertu imlen m'ertu uraur iani inap'ei. Ithuda sera nahau na tenpauian, a ti ipalulua sei. Ittrpep'n sarar arm'ertu, la iv'ahur ti avp'eset itauamu ha. Ithsran sera nl reran arna nmah kanuisan a natn tav'etan a Saiun, Nl reran lera inep'a sera nap'.

⁵ A Mlin Eia inep'a sera m'ertu imlen natei. Itdrlm' sarei a Isrel, Katdrlm' sarar nmahar mlin udlani. Itutakm sarei a nmah hua lilan. Iten sarei ti a natn tav'etan a Suta Irn istu istudau, katakal istudau.

⁶ Itutakm sarei a nmah kanuis na tamatan, Inep'a ti iv'i pitvet uaki iamk. Itutakm sarei a nut Hin ittu sarei a ti arm'ertu apavp'lt nakl. A Mlin Eia iten sarei ti arm'ertu a Saiun avvnapn a Tim'ah lilil, la ittu sarei ha, m'er Sapatan nakl. Sena ti nln irer istudau kanep'a sera nap' lil iamk, Hin itlep'la sarei a mlin, m'ei a pris, iarn ti ipalar ml.

⁷ A Mlin Eia itsran sera tiv' na sakrivaisan, Katruh sarei al nutetan, ialak atlera ml. Ittu sarar naml na nmahar mlin na v'anu Al lm'a m'ertu imlani. Atvan sera nadl lil iamk al nmah tamatan a Mlin Eia, Nadl nen inep'a sera naran avan tim'ah lil, la attu sarei a ti apavani ha.

⁸ A Mlin Eia itiak sarei a v'ahien iamk, a ti iputakm a Naml hua lilan a natn tav'etan a Saiun, kahiris ani. Ittina sera nut m'a nahau iamk, Ikalev'la lm'an, v'eti iparp sei uaki. Sena ti iten sarei ti nmah, la hatahat nen iak ha, m'a naml lil atrrn istu sarei. Nut huar iruh aranar iv'amk uaki.

⁹ Pn liu na v'anu atvrars sarei auei a nv' nadep'. Atua itutakm sarar nai p'arei, la aani a aian ha, katkapr sarar. Mlin na v'anu, m'er arm'ertu lililan Atvlak sarei asnr v'anudl. V'nen hua ihei ml, Sena ti arpruvet na nut lera ahavla si kinkin, la idan asn a Mlin Eia ha.

¹⁰ Arm'ertarep', la avv'i m'ertuan a natn tav'etan a Saiun ha, Avlak arna nadep' uaki, ahavv'ana ml. Avssran neiev' arna ptr, Kavtu selpak arna p'akr. Aruarav'aran a Serusalem apavsisihpu, Ptr apavier nadep'.

¹¹ M'atak istu sena ui m'atak, Aau, nrn istu a nlk. Sei nlui itars sarei arna nadep', Sena ti atutakm sarei anr a natn tav'etar arm'ertuak, Aau, sena ti armardel papa, m'er armardel avnunu uam Np'r itstu sarei, avrs arna navanel na v'anu lil.

¹² Avmiman anr a uniar, kavr ti a, “?Uit hini? ?Naui m'iel hin ip'i?” Avrars a nadep' inep'a nut m'ertu, la attr sarar m'a talei ha, avani inap'ei. Avrars arna navanel na v'anu lil, Naran silv'ienar iruh asnr, Naran avm'atr arna nunuar a uniar uaki.

¹³ ?P'ani ti nakm parn ipap'as ipanap'i? ?U, net tav'et a Serusalem, Kana p'evr ti knap'ei a hin ak? ?Aau, p'evr ti knap'ei a hin ak, a ti p'emhmah anh, U net tav'et a Saiun, la kv'i uarav'aran ha? Sena ti atssran sera tkv na v'anu dav'a, inep'a sera nata lil iamk. ?Hin ak ipani ti pama kap'as ml?

¹⁴ Arpruvetam'i avm'atr kavla sei sanam'i, V'eti sei avlei iv'i hap'ilien, avtutuan navanel uaki. Adavv'iv'en si stuam'i, A ti apavlev'm'alet anr arm'ertu, la atvp'resin sarei arna v'anu uraur ha. V'eti avm'atr kavla sei sanam'i, kavvrp'ep'ei, v'eti iv'i hap'ilien uaki, Kav'i sei irv' kam'i uaki a ti pavkasmn navanel.

¹⁵ Arm'ertu udlani, la avv'el kavv'siau asnm ha, Avusa lm'ar anh, Kavsusual kavvividen ptr. Avv'ana m'ei a natn tav'etan a Serusalem, kavvr ti a, “?V'anu lil laha iv'i v'anu arm'ertu avvruri nakl, kavvr ti a, ‘Nut lera ip'eset istudau, Kav'i nut arm'ertu udlani arna nadep' ka avrn ip'as ani istudau,’ v'aha inap'i?”

¹⁶ Arm'ertu udlani, la avlmanh ha, atviela sera pnr asnm. Laha, avsusual kavhaha lur. Avv'ana, kavvr ti a, “!Ntvdrlm' sarei! !Nvvrdaui, napn laha iv'i napn, la ntvlaksrah sarei ha! !Ntvpasla sera napn nen ra, Aau, ntvla sarei!”

¹⁷ A Mlin Eia iten sera sei, la itvr sarei a ti ipani ha. Iten sera si udlani v'nenan ivri, Aau, inep'a nut itvr sarei arna naran itauamu. Itkasr sera sei a nadep', idarn istu a sei, Iten sarei ti m'ertu, la imlanh ha, ip'tir, kavtma anh, Aau, iten sarei ti arm'ertu, la avlep'lah ha, avrama kavhua.

¹⁸ Avtakal eia asn a Mlin Eia arna nlr, kavvr ti a, “U, naml lilan a net tav'etan a Saiun, Pam'ahu a ti ui m'atam ipararev' Kanep'a sera naui lil iamk, ren m'a lihat. Mam'ahu a ti palak p'as, Aau, mam'ahu a ti m'atam apavlak ms uaki.

¹⁹ Pilaph, kav'ana eia lihat, Naran pap'tir a ti pap'aus nut. Pani ti nlm ipahsran hin kanep'a sera nauei Arna nahn a Mlin Eia. Palmlm lm'am asnn Sena silv'ienar armardel papam, La avrars arna nut navanel ihiris ha, Sena ti np'r istu, sena ti avrn nam'er istudau.

²⁰ !U, Mlin Eia, pap'a si laha, kav'ahuri! ?Kten sera si laha an a hin ak? ?Iviviln a ti artav'et apavhanr a natr, Armardelar, la atvrman sarar ha? ?Iviviln a ti aparpep'n pris m'a pruvet Al nutetan a Mlin Eia?

²¹ Armalakal m'er arm'ertarep' avm'atr arna nadep' Arna navanel nakl. Uarav'aranak m'er malakalak Atvrars sarei a nv' tali han. Nakm ktkap'n sarar arna napn na nl reram. Nakm kttrpep'n sarar, aau, kadarn istu anr.

²² Nakm ktv'ara sarei anr sei, la apadedrn ipastudau anr ha, avv'i sei avmlden kana, Aau, kten sarei inep'a nut aani inap'i, naran av'ara anr m'ertu arna napn na tim'ah lil. Arna napn na nl reran a Mlin Eia, Akapalsa m'ertu, la itruh sarei a ti ipatutuah ha, aau, m'ertu kinkin iasilv'. Arm'ertu avmlen kana atvutakm sarar a natk, La ntrman sarar, katv'iv'en sera sei anr ha. Laha, atvram'a sarei.”