SRAʔA FARAFƐƐ 2 - NYƐʔƐLƐ LI KÀYORO

¹ Nà hɛn wà bí tyâ sraʔa fara Bajegɔ Nyɛʔɛlɛ ma nyiŋi ga na, wi sraʔa wi po tyâ ga pe cɛli ge. Wi hunmu leʔe ni. Wi nudànʔa yraʔa wlele waʔa ni.

² Wi kɛriʔi ni sraʔa farafɛɛ bee Aaron najɛɛ pe deʔe na. Sraʔa farafɔlɔ wi ya kyɛ ki nyɛlɛ fara wa tyâ ni ga pe cɛli ge hunmu nì. Wi nudanʔa yraʔa kì bɛfu kpe, wi pi hògó wa sraʔa farahaʔa na ge, ki sraʔa yrɛbɛ pí nyɛ ladomo yraʔa gi. Kwɔʔɔ sraʔa wi, ki nuʔu kí na Bajegɔ Nyɛʔɛlɛ glanʔa le.

³ Tyâ sraʔa wi tɔ ŋa wi korí wi po Aaron nì wi najɛɛ ní pe woo, mɛjɛn akmaʔa ylɛʔɛ gi ga kí mà jɛ wa Bajegɔ Nyɛʔɛlɛ li kwɔ̀ʔɔ ni wa sraʔayee ni be.

⁴ Nà ma tyâ sraʔa fara ŋa pé na fwo wa furu kwɔʔɔ ni, kí ma yala poo hanri tyâ nì ga pe cɛli ge, poo hanri hunmu ajrɛʔɛgɛ wɛgɛ fún brupiʔi, ní nyɛ̀mu nì ŋa pé ma hanri hunmu nì ge.

⁵ Ma sraʔa yrɛbɛ nà pì po tyâ sraʔa ŋa pé bi gala wa aklaʔa na, poo hanri ajrɛʔɛgɛ wɛgɛ fun, tyâ ga nì pé ma cɛli ge, ye hunmu leʔe ni yeʔe wlele.

⁶ Moo konʔolo, ma hunmu wo wi na, moo hanri tyâ sraʔa.

⁷ Nàʔa po ma sraʔa wí nyɛ tyâ sraʔa wi ŋa pé na kala wa aklaʔa ní, moo hanri tyâ nì ga pé ma cɛli ge, ma hunmu wlele waʔa ni.

⁸ Tyâ sraʔa wi hranma kruʔu ma ki yrɛbɛ ní, ma pan wí ni Bajegɔ Nyɛʔɛlɛ kan le ma bɔɔ kan sraʔa farafɔlɔ ma, wi pan wí ni wa sraʔa farahaʔa na.

⁹ Sraʔa farafɔlɔ wi kà fara wa tyâ sraʔa ni wuu hògó wa sraʔa farahaʔa na ge, Nyɛʔɛlɛ li ladomo yraʔa gi. Kwɔʔɔ sraʔa wi, wi nuʔu kí na Bajegɔ Nyɛʔɛlɛ glanʔa le.

¹⁰ Sraʔa tyâ ki tɔ paʔa bo Aaron nì wi najɛɛ ní pee woʔo: Akmaylɛʔɛ gi ga kí ma jɛ wa Bajegɔ Nyɛʔɛlɛ sraʔayee ni bee kwɔʔɔ woo be.

¹¹ Ye na tyâ sraʔa yee bee fara Bajegɔ Nyɛʔɛlɛ ma le, ajrɛʔɛgɛ wɛgɛ wò gá bo wa wà ni. Yò gá ajrɛʔɛgɛ wɛgɛ gi yoo, ná kiì ban, hrɛnʔɛ hogo bìʔi fara sraʔa Bajegɔ Nyɛʔɛlɛ ma le.

¹² Pa ye gban bùu hanri akafonmo kplɛbɛ akanba ní yoo kan Bajegɔ Nyɛʔɛlɛ ma le di pò gɔɔ hogo wa sraʔa farahaʔa na, bùu hanri nudanʔa sraʔa.

¹³ Maa kɔ̀ ni wa ma tyâ sraʔayee pè bɛfu ni. Mò gaʔa ta ma tyâ sraʔa wà nigbe bí go kɔ fun.

¹⁴ Nà ma akafonmo pwɔkplɛlɛ li tyâ sraʔa fara Bajegɔ Nyɛʔɛlɛ ma, kí po ba pe kala kwɔʔɔ ní, akafonmo ba pé ma hanri tyâ ge.

¹⁵ Ma hunmu le waʔa ni, ma nundanʔa yraʔa wo wa ki yugu na. Kiì gi tyâ sraʔa we.

¹⁶ Sraʔa farafɔlɔ wi ki akaʔa pibi ba sungɔbɔ pà kpe hunmu nì wi nì wi nudanʔa yraʔa kì bɛfu kpe wi pi hògó pi krɛʔɛ ladomo yraʔa ki sraʔa wi kala na. Kwɔʔɔ sraʔa wi ŋa Bajegɔ Nyɛʔɛlɛ woo wi ge.