EFƐSE 2 - NYƐʔƐLƐ LI KÀYORO

Wó ma nyini kùʔù ni mà je nyuwyeʔe ni

¹ Fanfan ni, ye dá bo kuulu yè kakloʔolo ní yè kapere kala na le.

² Ki nyiŋi na ge, ye dáa danri banmɛ ge na yala ki drunya ŋa wi tanʔama ní me. Mɛjɛn ye dáa danri na yala tiflɛʔɛ fanŋa fɔlɔ ní. Ki nyìli la lí na tunŋu ko wa hɛɛn bee ni pé na ceʔe Nyɛʔɛlɛ ma le.

³ Fanfan ni, wòó fanna, wò bɛfu wo da blɛ́n na tanri pé ni na yala ga nì wò wre tí na ca ge. À wo na wò wre ní wò honriʔi nadanma hanri. Wo dá bo pomo ma na wò heme kala na le, wo dá yala Nyɛʔɛlɛ li nàʔà nì ge.

⁴ Di Nyɛʔɛlɛ li nyugara pa tí nyɛ kpangbanra, á wo li glan kmaʔa ceŋge ge.

⁵ Kiì ma kan li dá nyuwyeʔe kan wo ma teme na Krisi nì we, ali nàʔa ja bo wo dá bo kuulu wò kapere kala na le. Mɛjɛn lí ma wo syɔ li nadanma yraʔa kiì fanŋa ni.

⁶ Wa wò kpoʔolomo ni Jesu Krisi nì we li dá wo nyɛ̀ mà wo yrigi wí ni mà klɛnhara kan wò ma wa wi ní namuru ni de.

⁷ Li daʔá hanri mà yala ga nì lí nyɛ lagmama fɔlɔ wò namyɛlɛ na le, jango bìʔi tyɛʔɛ kpɛndo woolo na be pomo ma na li nadanma yraʔa kí ma kpɔʔɔ wo ma ceŋge ge wa wò kpoʔolomo ni Jesu Krisi nì we.

⁸ Mɛjɛn Nyɛʔɛlɛ li nadanma yraʔa kiì fanŋa ni yé ma syɔ yè pama kala na. Ye fandaʔa ban kí ma ye syɔ ge. Nyɛʔɛlɛ li nadanma akanʔa gi.

⁹ Ye kahranʔa tonro ban, nàʔa po ban, hɛn wà wò gáa wì kpɔʔɔ.

¹⁰ Mɛjɛn wó nyɛ Nyɛʔɛlɛ li ahranma bi wò nì. Lí ma wo fan wa wò kpoʔolomo ni Jesu Krisi nì we, jango wo da kakmaʔa hanri gee li da gón mâ yaʔa fan mâ yo wo da danri kee na ge.

Wó nyɛ kpoʔoloboo Krisi nì we

¹¹ Ki kala na, yèé bee yoò nyɛ Juwifiyee wre ti namyɛlɛ na le, bee pé ma lege hɛn kyɛʔɛ ni wre namyɛlɛ na le, á pe na ye yeri balegebee ge, ye honri ga na ye da glú mâ po pomo ma na ge.

¹² Ki nyiŋi na ge, ye dá bo Krisi fun mà po nabonmoo kpo. Ye ìn dà bo Israyɛli klo woolo. Yè tama ìn dà bo wa nofegee gee ni Nyɛʔɛlɛ li da gón li hɛɛn ma be. Ye dá bo naʔa drunya ni we honriʔi pahaʔa fun mà nì mà po Nyɛʔɛlɛ fun.

¹³ Di ŋaŋa ni ge wa yè kpoʔolomo ni Jesu Krisi nì we yèé bee ye dá bo leʔe ge, yé ma flo naʔa Krisi wi disyan fanŋa ni ge.

¹⁴ Mɛjɛn wiì wi wí ma nyimi kan wo ma mà Juwifiyee ní hɛɛn pe tɔɔ krɛʔɛ be nigbe. Wí ma wi wre kan de mà gunŋu can ga ki dáa pe konʔolo pè na ge mâ pe kân á pe na pè bɛnʔɛ ge.

¹⁵ Wi dá Juwifiyee pe furu kayoro ja de mà plɛn kaʔa kè bɛfu ní gee tí yo wo da hanri ge, jango bì wòó ní pee krɛʔɛ hɛnfonŋo nigbe wa wò kpoʔolomo ni wiì nì we. Nàʔa po ban, pa wo bo nyimi na.

¹⁶ Wi kùʔù wa tipraʔa na kiì fanŋa ni, Krisi wí ma wò bɛnʔɛmɛ mì bɛfu kɔ. Wi tipraʔa fanŋa ni, wí ma wòó hɛɛn syɛn kpoʔolo be wo po wre nigbe, wɔ̀ɔ tanma le wòó ní Nyɛʔɛlɛ ní wò kpafoʔo ni.

¹⁷ Ki tɔ na ge, wí ma pan mà bâ nyimi kayotanʔa yo yèé bee kan yé nyɛ klòʔo ke tɔɔ hɛɛn mâ po leʔe Nyɛʔɛlɛ ní le mà nì mà ti yo nɛ wòó bee kan wó nyɛ Juwifiyee mâ po lì tanla ge.

¹⁸ Mɛjɛn Krisi fanŋa ni, wò syɛnmu pa wo gban bì wò tyɛʔɛ To Nyɛʔɛlɛ na le Nyɛʔɛlɛ li Nyìli nigbe ni.

¹⁹ Ki kala na, yoò nyɛ nabonmoo adi, ná kiì ban, klo là woolo. Di yèé ní, Nyɛʔɛlɛ li hɛɛn ní yé nyɛ klotele woo bɛ ye nì mà nì mà po li heme woolo.

²⁰ Nyɛʔɛlɛ lí ma ye fan wa noʔoma ŋa na wí nyɛ li pitunbee ní li leyoo ní be. Jesu Krisi wiì tapolo wi wí nyɛ kololo ŋglɛngblɛʔɛ ge.

²¹ Wiì wi wí na go ki dere tì bɛfu kanʔa tí da draʔa tì na, jango go kí da gbɔʔɔ kí po sɛrigo kmaʔa wa wò fɔlɔ ni we.

²² Yèé fanna wa ye kpoʔolomo ni wiì nì we, pé na ye fanri wa wì na jango ye po Nyɛʔɛlɛ li korohaʔa Nyɛʔɛlɛ li Nyìli li fanŋa ni ge.