MARKUS 9 - ALLAH WENE FANO WENE

¹ Hweag-esasireg, “Hit ap homi suma welahep on anyo, at Nenakni Allah omamne humdeg ma, ap homi at apma feseik waharuk eleg kweleg, waramuhup fug, ulug, demdoho hweag-hisihi,” ulug, hweag-esasi.

Domman Yesus orohole amuroho hag atfag wene

² Hweag-esasireg, ai en, hup folfaligen noholug, at Yesus en at Petrus inim, Yohanes inim, Yakobus inim hondog-eneplug duk yaron fam lahausareg, it enemu etma wereg ma, inil hanim at orohole amuroho aham-atsi.

³ Orohole amuroho aham-atsireg, asum ambogbag kuron helag-felag angge disi. It enesum kuron ambogbag amag ulug horuruk hag ai fug. Ite, mun ambogbag amuroho hag kuron neg atsi mu,

⁴ at Elia Musa inim Yesus inim sebe ulug, enele matuk mu esausa.

⁵ Enele matuk mu esausareg, at Petrus anyo Yesus hweag-utuk kwit, “Nowe, yei. Nit suma welahe su, fano welahe ma, hit welamuhup en o sabo henahan wire henobahaul. Eke re hat, eke re Musa, ne, eke re Elia wiroho henobahaul,” ulug, hweag-itsi.

⁶ Iren at fahet, “Yehei u,” ulug, enakol hum atsi mu, keroho uk ulug, airoho isi.

⁷ Uswa ma, hena sal-enepsi mu, anggelegma etan ele uruk kwit, “An namloho nenda hundig su deg ma, at ele neg holduk kamek,” ulug, uruk mu holswa.

⁸ Uruk ale hole fousareg, enalukwe endenoho inil fu hauk men, it eleg kweleg, at Yesus amu neg wereg ma, inil hausa.

⁹ Domma etman wambik waharuk kwit, at Yesus en, “An Ap endag-atihik su waratlug lauk men owan noluk atlug inatuk eleg kweleg duruk mu, hinil neehep anyo ap homi mun hweag-esa fug.”

¹⁰ Hweag-esasi mu, duruk mu hausa anyo ap homi hweag-esausa fug famen, enemu wereg lit, “At waratlug lauk men, noluk aruhuk hweag-neseheik su, keroho eheik behep?” ulug,

¹¹ enele matswareg, at hweag-utuk kwit, “It ap Allah wene melaleg hwalduk on guru agama anyo en, Elia atam waruhu uruk su, nunggwelug uruk,” ulug, at Yesus hein wausa.

¹² Hein wausa ma, aren, “Elia atam waruhureg di deheg, su deheg, hwalik waruhu uruk ai, demdoho uruk famen, an Ap endag-atihik anyo nobam anggin-fanggindoho nobahakeg, siahap-biahapdoho nobahakeg, duhup ulug, Allah wene lisu balfag ai nunggwelug balfag behep?”

¹³ Hweag-esasireg, “At Elia mun nenesa wahasireg ninim wereg lit en famen, Allah wene lisu balfag anyo higitdoho ap homi en it enendan bolug at debeil noruk katswa, ulug, hweag-hesauk kahi,” ulug, hweag-esasi.

Omalik mungguat endama kwebag on Yesus en wilibe febag wene

¹⁴ Domman wene airoho il wambil waharuk mu, at ele wauk on foma feselug lahausa anyo inim, it ap Allah wene melaleg hwalduk on guru agama inim, ap homi humdoho kabogdeg kweleg, suahal uruk mu, inil esausa.

¹⁵ Esausa ma, it ap homi anyo at waharuk mu inil hausareg, “Yehei u,” ulug, enahayeg bousareg, buroho at akit dang-dik lausa ma,

¹⁶ at anyo en, “Hit ap su hinim nunggwangge wene fahet suahal uruk kahep?” ulug, hein og-enepsi.

¹⁷ Hein og-enepsi mu, ap homi humdoho kabogdeg anyo ap eke en at hweag-utuk kwit, “Nowe guru yei. An namloho mungguat endama kwisireg, ele eleg atsi mu, hat hakit walug wahi.

¹⁸ Mungguat doron anyo endama kwik waharuk halug, yinggoho watuk kwit, ambilikmu wasulahap langgireheg, aeg kilit-deheg duruk kwit, bingnoroho embeseruk mu, hat hele wauk on anyo mungguat lisoho wilibe foukwag ulug hweag-isihi famen, iren wilibe fouk fug alereg ma, isihi,” ulug, hweag-itsi.

¹⁹ Hweag-itsi mu, at Yesus en, “Hit ap homi ketia welahep henenda an nobam dip-nobahalug demdoho boruk kahep fug su, yaho yei! An nukoho nunggwenam ninim welatlug nobam lahuk famen? An nukoho nunggwenam hit hinim nangnoroho welaruhuk?” ulug, hweag-esasireg, “Omalik ai walug manik,” ulug, hweag-esasi.

²⁰ Hweag-esasi mu, omalik anyo at akit walug wahausa ma, mungguat at endama wereg anyo en Yesus hasireg, omalik anyo enggik eyog hwik-hauk duruk kwit, hamboko kwenangma yinggi fesireg, enden-fenden duruk kwit, ambilikmu wasulahap langgireheg, duruk katsi.

²¹ Ambilikmu wasulahap langgireheg, duruk mu, at Yesus en, “At airoho duruk kweleg, li nunggwe en welatsi?” Ulug, hein wasi mu, akni anyo en, “At omalik ebe dotdeg man eitog airoho neg duruk.

²² Mungguat anyo at obam atuk kwit, ware femin en nukoho eke fam indokma kwelabe feheg, nukoho eke fam ikma kwelabe feheg, duruk mu, hat di deheg, su deheg, dehen halereg halug, nenelaheg bolug, nenebin.”

²³ Hweag-itsi mu, at Yesus anyo en, “Hat dehen halereg halug ehen ai, ap homi Allah fam demdoho bolug dip-deberuk on anyo en di angge su angge duk alereg,” hweag-itsi.

²⁴ Hweag-itsi mu, nimi akni anyo en, “Nenda demdoho boruk kahi famen, ekenim demdoho bemin en let-nabin,” ulug, ele hum fam hweag-itsi.

²⁵ Hweag-itsi mu, ap homi kabog-dik waharuk anyo, at Yesus il esasireg, mungguat anyo bet-duruk kwit, “Mungguat hat enesanggo dahom debeseheg, morue debeseheg, duruk kahen su, wilibik lag. Wilibik lamihindeg, ai en, nikangge kwik watmihin mun ousa,” ulug, bet-disi.

²⁶ Ai ulug, bet-disi mu, mungguat anyo ngarisireg nimi anyo enggik eyog elek duruk kwit, wilibik lasi. Wilibik lauk kweleg, nimi anyo wareg hag wereg kweleg, it ap homi humdoho anyo en, “Waraha,” uswa.

²⁷ Uswa famen, at Yesus en enggik seneko unduhuk fesi mu, inatsi.

²⁸ Inatsi mu, at Yesus olma kwisireg wereg ma, at ele wauk on inim enemu wereg lit, “Nit nunggwelug mungguat lisoho wilibi fouk fug angge welatuhuk behen?”

²⁹ Uswa ma, at anyo en, “Mungguat ai on ai, we amu on fam duk fug alereg. Ite, somban uruk fam neg de wilibi fesouk alereg,” ulug, hweag-esasi.

At Yesus en, Nowaruhup, ulug, birenam fagdoho hweag-esebag wene

^30-31 O etman wilibik wahausareg, o Galilea kwik watlug noruk kwit, at Yesus en at ele wauk on hweag-esauk kwit, “An Ap endag-atihik anyo nowaruhup en, Allah en an nebe og-esahu mu, nowaruhup men, waratlug, hup biren noholug inaruhuk,” ulug, airoho hweag-eseheg, duruk katsi. At ele wauk on neg, airoho hweag-esamin ulug, duruk katsi mu, at o Galilea kwik wahasi ale it ap homi enoluk am nolug, erim boruk katsi.

³² Hweag-esasi anyo, it at ele wauk on wongdeg wereg lit en famen, hein wauk ale enakol en embeseswa.

Ap humon ai sa? ebag wene

³³ Ai ulug, fobik en, o Kapernaum wahausa. Wahausareg olma kwisireg, at Yesus en it hein og-enepuk kwit, “Hit kwe fam waharuk kwit nunggwe wene matil wahep?”

³⁴ Hein og-enepsi mu, it kwe fam waharuk kwit, “An along a, hat along a?” il wahausa ma, enele eleg angge bok atswa.

³⁵ Bok atswa ma, at anyo hweria atlug at ele wauk on nesanggoen anyo hwi-enepsireg wahausa ma, hweag-esauk kwit, “An ap humon welaruhuk boruk kahep halug, ap homi mundoho enapma wereg lit enamingming angge welamuhup.”

³⁶ Hweag-esasireg, omalik doron eke hamboko it enenggelegma feik watlug, mako bugdoho wasireg, it hweag-esauk kwit,

³⁷ “At omalik su hag an nunuk hunduko wauk halug, an og-napuk. Ne, an neg og-napuk fug. Ite, Allah an mon-nabik wahasi anyo inim wauk,” hweag-esasi.

Ninim minggirig eleg halug ai, niron, hweag-esebag wene

³⁸ Hweag-esasi mu, at Yohanes en, “Nowe guru, yei. Niren ap eke mungguat endama kwisi on hat hunuk yiko lisoho wilibi foruk mu, ninil hehereg, at ninim noruk eleg ma, Duk fug, ulug, hweag-erehe,” ulug, hweag-itsi.

³⁹ Hweag-itsi mu, at Yesus anyo en, “Duk fug ulug, hweag-om fug. An nunuk yiko duk fug on duruk halug, an siahap-napuk fug mu,

⁴⁰ it ninim minggirig eleg halug ai, niron.

⁴¹ It ap homi en, hit Kristus omaliki hesalug ik hwenanggeg og-hesauk halug ai, onggo hwela fug angge, welamuhup fug. Onggo hwelahup, ulug, demdoho hweag-hisihi,” ulug, hweag-esasi.

Siag duk ale henepuk halug duruk kamuhup wene

⁴² Hweag-itsireg, “It ap homi en it doron nobam demdoho dip-debelug boruk su, siag dukwag ulug enendama kwelapuk fam siag duruk halug, helep humon fam enenggolopma sabu liloho ik laut yenggelegma kwelap-eneplep man fano.

^43-44 Henenggik fam siag duk ale henepuk halug, foma kongdoho hwik-esakiek. Henenggik inim wereg kweleg, indok ambulbul ulog deheg neg durukmu, etma kwik lahup ai siag, ne, kongdoho hwik-esalug foma baleg kweleg, Allah inim heneluk welamuhupmu etma kwik lahup neg de fano.

^45-46 Heneyog fam siag duk ale henepuk halug, foma kongdoho hwik-esakiek. Heneyog inim wereg kweleg, indok ambulbul ulog neg durukmu, etma hwik-henebuhu ai siag. Ne, kongdoho hwik-esalug, foma baleg on hag wereg kweleg, Allah inim heneluk welamuhupmu etma kwik lahup neg de fano.

⁴⁷ Hinil fam siag duk ale henepuk halug, foma hwililoho feiyek. Hinil foma inim wereg kweleg, indok ambulbul ulog neg durukmu, etma hwik-henebuhu ai siag. Ne, hwililoho folug, foma neg at Allah apma kwik lahup neg fano.

⁴⁸ Sobon anggen lohomug deheg neg durukmu, indok waratuk elegma etma hwik-henebuhu ai siag.

⁴⁹ Allah obahet foruk on, mayu folduk kwit, Allah il hanim fanoe foruk hag, airoho Allah en ap homi mundoho enobam indok feseruk kwit, il hanim fanoe fesehu.

⁵⁰ Mayu fano famen, olok eleg atuk halug, keroho olok am alereg? Mayu olok on hag ap homi enenggelegma wereg lit, hinim sebereg welamek,” ulug, hweag-esasi.