MARKUS 2 - ALLAH WENE FANO WENE

Yesus en ap enggik eyog siroho on hilinggebag wene

¹ Etma dorangge welatsireg, o Kapernaum wahasi mu, “Obam wahasireg wereg,” uswa ma,

² ap homi humdoho kabog-dik wahausa anyo olma hopo isi mu, foma sokolma kabogdeg wereg kweleg, wene hweag-esauk katsi.

³ Wene hweag-esauk kwit wereg ma, ap enggik eyog sireg on eke, ap ohwan en bearulug at akit feik wahausa.

⁴ Bearulug feik wahausareg, olma etma Yesus anyo inim ap homi hoporeg ma, kwik la fug ale atsi mu, walug o dummu lahausareg, at Yesus weregma furoho onggwa saleg anyo meiyaloho folug, ap anyo ilit doaleg anyo fam, yinggig kweleg, abirangge belabe fousa.

⁵ Belabe fousa ma, at Yesus anyo en it enendaman at obam demdoho bolug walug wahausa enegdeg ma esasireg, ap enggik eyog siroho on anyo hweag-utuk kwit, “Namloho, yei! Hasiag anyo elehapdoho hobahaki,” ulug, hweag-itsi.

⁶ Hweag-itsi mu, it Allah wene melaleg hwalduk on guru agama anyo etma hwerieg lit enendaman boruk kwit,

⁷ “Ap su nunggwelug airoho eheik behep? Nit siag duruk kahe on elehapdoho nenobaharuk anyo at Allah en neg de duk alereg famen, Allah unuk siahap-biahapdoho foruk su re!” uswa.

⁸ Ulug, it enenda airoho boruk ale at Yesus endaman enegdeg ma esasireg, it hweag-esauk kwit, “Hit nunggwelug henenda airoho boruk kahep?

⁹ At ap enggik eyog siroho on su, Hat hasiag anyo elehapdoho hobahaki, hweag-irihi ha along a? Halit doaleg hwelalug lag, hweag-irihi ha ai along a? Hiren iek ahi!” ulug, hweag-esasi.

¹⁰ Hweag-esasireg, “An Ap endag-atihik anyo kwenangma wereg lit, henesiag elehapdoho henobaharuk on nonggwareg Allah en unduhuk nobahasi, henoluk amag ulug, hweag-irik,” ulug, hweag-esasireg,

¹¹ at ap enggik eyog siroho on anyo hweag-utuk kwit, “Inatlug, halit doaleg nohoruk kahen on hwelalug hobam lakin, ulug, hweag-hirihi!” ulug, hweag-itsi.

¹² Owan hweag-utuk kweleg, at anyo inatsireg, alit hwelalug it mundoho inil hanim dagma wilibik lasi mu, “Nit airoho duruk mu eke ninil hauk kahe fug on deheik su ambi! Yehei u!” ulug, at Allah leho foruk kwit, yanderuswa.

Yesus en ap Lewi hwirebag wene

¹³ Yanderuruk kweleg, Yesus o ai en wilibik lasireg, aren nukoho eke fam ik yenggeleg aegma lasi mu, ap homi humdoho at akit waheg neg duruk mu, Allah wene hweag-esauk katsi.

¹⁴ Wene hweag-esasireg, kwe fam lauk kwit, at Alfeus amloho Lewi anyo, it pemerintah enobahet pajak kabog-durukmu hwerieg wereg ma, il hasi. Il hasireg, “Nombolim ma,” hweag-itsi mu, inatsireg Yesus ombolim lasi.

¹⁵ Ai en, fobik en at Lewi obam etmano Yesus siburu nauk mu, it pemerintah enobahet pajak kabog-duruk on inim, it siag duruk on inim, enebe humdoho at Yesus ele waul ulug, inim lausa anyo inim seberoho siburu nausa.

¹⁶ Seberoho nauk mu, it ap Farisi on, Allah wene melaleg hwalduk on guru agama foma anyo en, it siag duruk on anyo inim, it pemerintah enobahet pajak kabog-duruk on anyo inim, Yesus inim siburu nauk mu inil esausareg, at ele wauk on anyo hweag-esauk kwit, “It pemerintah enobahet pajak kabog-duruk on inim, it siag duruk on inim, nunggwelug at Yesus inim seberoho siburu nauk?” ulug, hein og-enepswa.

¹⁷ Hein og-enepuk anyo, at Yesus esanggo holsireg, “Ouk eleg halug ai, hiling-enebukwag ulug dokter akit laul, boruk eleg. Ite, it ouk on halug neg de hilinggukwag ulug, dokter akit laul, boruk. Anyo hag, an den it ap Allah wene higitdoho duruk on enayonggo femin ulug waharihik fug. Ite, siag duruk halug neg enayonggo femin ulug waharihik,” ulug, hweag-esasi.

Siburu na fug angge enambilik hweang hag welamuhup wene

¹⁸ Nukoho misig fam etma wereg lit, it Yohanes ele wauk on inim, it Farisi on anyo inim, siburu na fug angge enambilik hweang hag welatswa. Wereg ma, it ap homi Yesus akit wahausareg, “It Yohanes ele wauk on inim, it Farisi on enele wauk on inim, siburu na fug angge enambilik hweang hag wereg famen, hat hele wauk on de nunggwelug airoho duruk fug?” ulug, hein og-hausa.

¹⁹ Hein og-hausa ma, at Yesus en, “Ap eke en hwe hwelauk mu owe aut inim soni esetuk kwit, enambilik hweang hag bok welam ale ai fano behep? Ai fug! Ahun inim wereg lit nahup fano famen,

²⁰ fobik owe aut wereg kweleg, ahun neg walug lahu sali horog aik waharuk kweleg, siburu na fug angge enambilik hweang hag welamuhup,” ulug, hweag-esasi.

²¹ Hweag-esasireg, “Sum keron kongdoho sum mining on dilipdeg fam dopnoroho seleben-duruk fug. Ket yihig on endam yihig on fam dopnoroho seleben-delep ha man, ket yihig on dopnoreg wereg anyo dopno atuk kwit, endam yihig on dopnoreg anyo humdoho hiyoroho wambelep,” ulug, hweag-esasi.

²² Hweag-esasireg, “E anggur anggen ahalue keron wam ahap buhundeg mining on deg ma, hwenangguruk halug, ahalue keron anyo en ikwag mining on sog-duruk kwit, e anggur ahalue inim, ikwag inim eleg atmisi. E anggur ahalue keron halug ai, ikwag wam ahap ket buhundeg halug hwenangguruk fano,” ulug, hweag-esasi.

Yahudi somban uruk salim gandum dahandil lebag wene

²³ Ai en, nukoho eke fam, it Yahudi somban uruk salim hari Sabat anyo fam, at Yesus at ele wauk on inim yabuk gandum yahoma kwe fam lauk kwit, at ele wauk on anyo en gandum dahandil lausa.

²⁴ Dahandil lauk mu, it Farisi on anyo en, “Yesus yei! Hil fu esakin! Nenewene melaleg airoho duk fug, ulug, wereg famen, it nunggwelug dil lauk?”

²⁵ Uswa ma, at Yesus anyo en, “At Daud autsi inim siburu eleg ma, siburu obok wereg lit debag anyo, Allah wene lisu baleg fam hinil furebouk fug angge en uruk kahep?

²⁶ At Daud anyo at Allah obam wirigmu kwebagdeg, at Abyatar imam agung anyo wereg kweleg, roti Allah fahet etma foruk on anyo it hesangge on nauk fug. Ite, it imam on neg nauk kamag, ebag famen, deg kweleg, at nebagdeg, it inim watfag on anyo og-esebag ma, it mundoho nebag, ulug, lisu baleg fam hinil furebouk fug angge en uruk kahep?” ulug, hweag-esasi.

²⁷ Hweag-esasireg, “Allah en ap homi wal-enepuk kwit, hari Sabat fam diroho wereg lamag ulug, wal-enepfag fug. Ite, it ap homi fano welamag ulug, hari Sabat eneko febag.

²⁸ Ai halug, somban uruk salim duruk ale hwalduk nahun de an Ap endag-atihik su,” ulug, hweag-esasi.