ESTER 9 - ALLAH WENE FANO WENE

Ap homi Yahudi enap en it enaselei on enalong elehapdoho folug duruk katfag wene

¹ Airoho duruk katfagdeg dil-dil de bigalem it enele fam de Adar uruk katfag, tanggal 13, nukoho at raja en it ap homi Yahudi on enowaruhup salim ulug momale febag salim anyo higit aik lebag. Ne, it ap homi Yahudi on sebel-enusug lit eneselei roho welatfag on etman de nukoho ai folo-folo aik lowag, ulug nangno hauk kwit welatfag. Famen de it ap Yahudi on en de it eneselei etmano enalong elehapdoho fesebag.

² O di kota su kota etmano fene ap homi Yahudi on enebe lohwalug de misig sebe ulug it eneselei on en it fam enolok ale enobam debesoul ulug duruk on etmano fam enowatuk katfag. Airoho durukmu re ap homi enunggul unuk enap wereg on etmano en de enakol neg atlug de ap misig en eke ambong seroho it enolohotma am fug ale atuk katfag.

³ O propinsi etma fam apma yain-kain welatfag on mel, bupati mel, ne ap hun raja apma wereg lit yabuk duruk katfag on en ohore hun Mordekhai fam enakol bolug de ap homi Yahudi on let-enepuk katfag.

⁴ Ap homi di kwe su kwe wereg on etmano en de hun Mordekhai aire hun raja obam etma aren duruk ale fahet unuk lauk katfag ahun. Airoho deg ma re at ebe along atil neg lauk katfag.

⁵ Airoho duruk kwit de ap homi Yahudi on en de it eneselei on etmano fam, iren dul boruk ale etmano neg duruk katfag. Ne, iren de ap eneselei on etmano wereg ma kwik lalug de enebe karog fam binggi enowatuk katfag.

⁶ Airoho enowatuk kwit de, o Susan o kwenang ai fahet kota indip welatfag ma etma neg de ap homi Yahudi on en de ap enebe 500 en enowatfag.

^7-10 Ne, it ap enowatfag on etma enesahalimu en de hun Haman at Hamadeta amloho ap homi Yahudi on eneselei hum ahun anyo omaliki enebe num en etano nim enowatfag. It waratfag on eta enebe re: Parsandata, Dalfon, Aspata, Porata, Adalya, Aridata, Parmasta, Arisai, Aridai, Waizata nim, enowatfag famen de ap homi Yahudi on en enangge deldebag fug.

¹¹ Airoho enowatfag ma re nukoho anyo salim neg ap homi en de ap enebe o Susan fam etman waratfag on etmano fahet hun raja fam olukap dik lebag.

¹² Airoho hweag-etfag ma hun raja anyo en hwe ratu Ester fam hweag-utuk kwit de, “O Susan fam neg famen ohore ap homi it Yahudi on enowarehesa on de enebe hun Haman omaliki etano et angge re 500 en ahesa. Ne, o propinsi amu kwe etmano re keroho ahesa e? It diroho dehesa ulug aire nit wong deg lahe ai. Anggere nunggwe on eke heng napmihin, hweag-nimin? Hweag-nitmihin halug de ebe demdoho hwelamihin lit deg!” ulug hweag-etfag.

¹³ Airoho ebag ma hwe Ester en onggo uruk kwit de, “Nakni haren hendama fano boruk kahen halug de, ap homi Yahudi on o Susan suma wereg on en de yoho dehesa ale ai higitdoho nikangge sono oho duhup en hweag-esakin. Ne, eke it hun Haman omaliki enebe wareg aire e ap wareg boruruk on fam bo-enebuhup,” ulug hweag-etfag.

¹⁴ Ai ebag ma re hwe Ester en heng ebag ale anyo dukwag ulug raja en ap homi hweag-esebag. Ne, o kota Susan ai fahet lisu baloho dukwag ulug wilibi feheg, ne hun Haman omaliki wareg enebe num en etano e fam borebeik laheg, debag.

¹⁵ Airoho debagdeg de it ap homi Yahudi on de bigalem unuk Adar anyo, tanggal 14 fam enebe o Susan kabog-dik watfagdeg ap o kota ai on enebe 300 en eke enowatfag. Airoho enowatfagdeg eta ai salim nim iren enangge di angge su angge del debag fug.

¹⁶ Ai duruk kweleg de it ap homi Yahudi on o propinsi amu kwe wereg on oho re enebe seberoho kabog-debagdeg de enebe inili og-dauk kwit de, ap it enerim enepuk on etmano enebe 75.000 en enowatfag. Famen de enangge del debag fug.

¹⁷ Wene aire bigalem Adar anyo tanggal 13 fam atfag. Ne, nukoho ombolim on tanggal 14 fam de iren ap homi eke enowaruk fug angge, debag ale anyo ebetuk kwit enahayegdoho duruk katfag.

¹⁸ Famen de ap homi Yahudi on o Susan welatfag on etman de ap eneselei on etmano tanggal 13 inim 14 inim fam enowatfagdeg tanggal 15 fam de bale febag ma atlug de iren tanggal 15 salim aire nukoho humon ulug ebetuk kwit welatfag.

¹⁹ Ai fam de ap homi Yahudi o kota dotdeg kwe welatfag on en de bigalem Adar fam tanggal 14 salim aire nukoho enahayeg duruk salim ulug soni pesta esetuk kwit nauk angge yohwan-yohwan atuk salim ulug ebetuk katfag.

Nukoho Purim anyo ebetuk katfag wene

²⁰ Anyo mundoho debagdeg de at Mordekhai en de atfag ale etmano mundoho lisu bale febagdeg de ap homi Yahudi on o Persia fam etman enebe yat kwe mel horog kwe mel wereg on fahet monde fesebag.

²¹ Lisu baloho mondotfag on ai fam baleg lit de, “Tahun hundig-hundig etma fam bigalem Adar ai tanggal 14 salim aire hundig ebetuk kamuhup,” ulug baleg latfag.

²² Aire nukoho ai salim neg iren ap homi eneselei on etmano enalong elehapdoho fesebag fam it enenda hesiloho ouk hauk kwit welatfag on anyo obalma re enahayeg hebag on ai fahet duruk kamuhup ebag. Ai fam nukoho eta fam de iren soni esereheg, ik siburu nakoho misig kabog deheg, nauk angge yohwan-yohwan aheg, ap homi enenggik eleg on fam enangge og-eseheg, duruk katfag.

²³ Ap homi Yahudi on en de at Mordekhai en duluhup ulug hweag-esebag ale anyo holoho debag ma re, iren ebetuk katfag ale aire eneitogdoho di tahun su tahun airoho duruk kwit neg welatfag.

Debag on obahal watfag wene

²⁴ At Haman hun Hamedata amloho, hun Agag ambiangma on, ap homi Yahudi on eneselei humon ai en de, ap homi Yahudi on mundoho elehap enebuhuk ulug wene ebagdeg de, aren de nukoho it enowaruhuk salim aire nunggwe salim higit aruhu ulug, eneg amag ulug de, eneg amag ulug wal-hauk katfag on unuk “Purim” ai wal debag.

²⁵ Famen de hwe Ester en hun raja wereg ma hweag-irik kwebag ma re, raja en wene melaleg baloho wilipfag fam de, at Haman onggwareg obam aik watfag ma, ai fam at ebe nim, it omaliki de e ap borebeseruk katfag angge wirig on fam waroho borebesebag ai.

²⁶ Airoho debag ai fam de nukoho log salim ulug ebetuk katfag on eta unuk de Purim soalfag. Surat hun Mordekhai en balfag on nim,

²⁷ di ale su ale ap homi Yahudi on en atuk mu hebag ale nim fam ambiangma en de, iren it enonggwareg fahet nim, it enambiangma on fahet nim, ap homi enunggul unuk amu on en enunggul unuk Yahudi on fam kwik wamuhup on fahet ulug nim en duruk kamuhup ale ulug bale febag. Wene melaleg bale febag on ai fam de nukoho hun Mordekhai en ene febag on biren eta fam de tahun hundig-hundig fam ap homi Yahudi on en embesouk fug angge ebetuk kwit neg welamuhup ulug baleg latfag.

²⁸ Ai en eke melale feseruk kwit de, “Nukoho Purim etare ap homi Yahudi on en ebereg wereg lit de ap Yahudi on enahain elekwe domog en ebereheg, ne ap homi eke waharuk, eke waharuk on en oho re o kota kwe mel, o propinsi kwe mel wereg on en ebereg lit duruk kamuhup,” ebag.

²⁹ Airoho ebagdeg surat hun Mordekhai en ai nim de, hwe ratu Ester at Abihail ahaloho anyo en de surat Mordekhai en balfag on anyo omamneroho ulug de surat bireneg on nukoho Purim ai fahet duruk kamuhup ale ulug balfag.

³⁰ Balfagdeg de lisu baleg anyo ap homi Yahudi on wereg kwe mundoho mondotfagdeg, baleg anyo kumu heg balfag on de o Persia kwenang ai fam en propinsi 127 en etano fene mundoho mondotfag. Surat ai fam de, “It ap homi Yahudi on enebe fanoroho neg wereg lit enakol eleg angge welamag,” ulug, baloho mondotfag.

³¹ Airoho mondotuk kwit de it ap homi Yahudi on nim it enambiangma on nim en de nukoho Purim ai li higit atuk on etano fam, iren enambilik hweang wereg lit nim, ne fongma wereg lit nim ebetuk hagdoho ebetuk kwit welamuhup, ulug hun Mordekhai mel, hwe ratu Ester mel en de surat airoho baloho mondotfag.

³² Ne, hwe Ester en nukoho Purim ai fahet duruk kamuhup ale ulug wene melaloho hweag-esebag ale etma re buku fam bale febag.