ESTER 8 - ALLAH WENE FANO WENE

Ap homi enunggul unuk Yahudi on enonggwareg en inili og-dauk kamuhup fano ulug hweag-esebag wene

¹ Airoho debagdeg de nukoho anyo salim de Raja Ahasyweros en de ap homi Yahudi on eneselei on Haman angge di angge su angge omano mundoho ratu Ester og-etfag. Ne, at Ester en raja fam de, “Mordekhai aire an nerek, nakni aut en ondoho on,” ulug hweag-etfag ma, etano li em en de at Mordekhai re, kwik wamag ulug wol duruk eleg kweleg bekit raja akit kuruk kamag ulug hweag-etfag.

² Ne, raja en enggik seheletman helep sehene Haman enggik seheletman nikangge hwelebag angge anyo Mordekhai og-etfag. Ne, hwe Ester en de at Mordekhai re Haman angge di angge su angge etmano akni atlug hwalduk kamag ulug unduhuk febag.

³ Airoho debebagdeg de hwe Ester anyo raja wereg ma kwik lebag. Kwik lebagdeg de hwe Ester anyo en, “Haman en ap homi Yahudi on enowaruhuk ulug weim abug balsi on ai elehapdoho fein,” ulug oba yako orohole belabeg sahaun uruk kwit heng debag.

⁴ Heng debag ma re raja en de domuk emas on anyo hwe Ester fam bil hebag ma, hwe Ester anyo inatfagdeg ele uruk kwit de,

⁵ “Nakni haren an henda nealug, hendama hahayeg nobam foruk kahen halug de, ne eke an den hweag-hitmin on ai fano bemihin halug, hun Haman en lisu baloho wilipuk kwit ap homi Yahudi on o kwenang su fam wereg on mundoho enowarukwag ulug balsi on ai nikangge lisoho elehap dukwag ulug nakni haren lisu baloho wilibin.

⁶ Ne, an hamingming angge nunggul unuk on mel, an nori nerekwi mel, mundoho wat-enepukmu etma keroho nil kwelap-enusug lahi ha alereg?” ulug hweag-etfag.

⁷ Airoho ebag ma re Raja Ahasyweros en Ratu Ester nim Mordekhai nim fam uruk kwit de, “Demdoho an den Haman ai en ap homi Yahudi on mundoho eleg ap enebikoho duruk ale ai en ebe waroho borebehireg angge di angge su angge re mundoho hwe Ester og-hirihi.

⁸ Famen de lisu hun raja unuk fam baloho raja en cap folug mondotsi on aire, niren nikangge lisoho wehe ha fug alereg. Famen de hiren de ap homi henunggul unuk Yahudi on deg lahep ale fahet mel, hiren su duk alereg ulug fanoreg boruk kahep ale mel, lisu mundoho baluhup en hweag-hesauk kahi. Surat aire an nunuk fam balug de o kerajaan au unuk fam eneg ale foruk on cap enggik sehelet fam sehene anyo dag debeiyug,” ulug hweag-esebag.

⁹ Ai ebag ma re nukoho anyo salim neg, aire bigalem henahaneg on unuk Siwan ai tanggal 23 wereg kweleg Mordekhai en de it ap raja obahet lisu balduk katfag enap etmano fam de, “Ap gubernur mel, bupati mel it ap yain-kain enebe o propinsi 127 en fam wereg on, o India fam en de Sudan huli fam etma wereg on etmano fam surat baloho wilibiek. Surat ai balduk kwit de it o propinsi etman enele deg ale mel, lisu balduk ale mel domog baliyug,” ulug hweag-esebag. Ne, aren de it ap homi Yahudi on enobahet it enele fam lisu baloho monde fesebag.

¹⁰ Surat balfag on etma re at Mordekhai en de Raja Ahasyweros unuk fam bale folug kerajaan ai unuk fam cap dag debebag. Airoho debebagdeg de at Mordekhai en de ap yonggo angge wam kuda hun raja en folo-folo lauk on fam lahalug de surat ai o kwenang ai fam abirangge yohwan dik lowag ulug mingming enepfag.

¹¹ Surat baleg anyo fam uruk kwit de, “Ap homi Yahudi on di kota su kota wereg lahep on etma henebe misig sebe ulug de henonggwareg fahet hinili og-dakiyug. Ne, hit lahe ap homi enunggul unuk amu kwe en oho ne kerajaan amu kwe en oho ap sehen seneg enap en enowatul ulug waharuk halug de, iren ap eneselei on etma inim inil dulug de it enebe mel enohwesi mel, enomaliki mel et mundoho enowaruhup fano; iren de ap eneselei on etma het-enebuhupdeg de enangge di angge su angge mundoho del dahup fano.

¹² Wene melaleg sure at Haman en nukoho ap homi Yahudi on enowaruhuk salim ulug, bigalem bireneg, it enele fam de bigalem Adar fam tanggal 13 fam wene melaleg sure o kerajaan Persia fam suma mundoho en duhup.

¹³ Surat baleg aire wene indip leho on ulug baloho wilibi folug de, nukoho ai dip aik waharuk halug it ap homi Yahudi on eneselei on enowaruhup on fahet fik-fouk deg welamag ulug de wene wilibuhup,” ulug baleg latfag.

¹⁴ Airoho balfag ma re raja en yonggo mon-enepfag on etmano folo-folo lakiek ulug ebag ma kuda raja en on fam lahabagdeg lebag. Ne, it airoho lauk kweleg de negara ai o kota indipmu o Susan ai fam oho bilinggebag.

¹⁵ Airoho debagdeg de at Mordekhai anyo raja ebe wereg ma etmano embeselug de sum ap raja en wandeg on il hwesik on mel, kuron mel, fam seleben deg angge anyo mel, sum jubah hekel lenan il sako on fam yihig angge anyo mel, mahkota emas on fam hilinggig angge il ebe on anyo mel wandoho wilibik watfag. Airoho wilibik laukmu re ap homi o kota etma wereg on mundoho enahayeg en de enamit-mitdoho enanggiluk duruk katfag.

¹⁶ Airoho debag ma re ap homi Yahudi on etmano re enenda mun yamuk eheg, enahayeg deheg, nenalong ahe beheg, debag.

¹⁷ Ai hagdoho re ap homi Yahudi on wereg kwe kota fam inim propinsi fam inim etman surat raja en baliyug ulug ebag aleroho bilinggebag kwe etmano ohore, enahayeg debagdeg de enanggilukdoho re soni esetfag. Airoho durukmu re ap homi o etma yug on ohore ap homi enunggul unuk Yahudi on ai fam enakol en de, it enunggul unuk Yahudi on amul ulug kwik lebag.