ESTER 7 - ALLAH WENE FANO WENE

¹ Ma re enenggik bireneg angge at Haman mel raja mel de hwe Ester en soni osohoma anyo ik mel, siburu mel, nebag.

² It etano seberoho anggur nauk kwit, at raja en hwe Ester fam hein og-hauk kwit de, “Hwe i, nohwe ratu, hat de nunggwangge henda? Hweag-nimin! O an den melal-enepuk kahimu oma bul kwe minggiroho og-nimin imihin famen oho demdoho og-hitmin,” ulug hweag-etfag.

³ Ai ebag ma raja ohwe ratu Ester anyo en onggo uruk kwit de, “Nakni, hat raja en fano boruk kahen halug de, an hamingming angge nim it an hamingming angge nunggul unuk on mel, nenoluk welamuhuk fano.

⁴ Ne, an hamingming angge mel, ne it an hamingming angge nunggul unuk on mel de binggi enowaruhuk ulug onggo bal-nenepswa ai fam ihi. Ne, nit we enamingming angge ap nenebukoho onggo hun-neneplepman de nenele eleg atlug nenakni hat nit hamingming angge en hele ying hapuk kahe ale au, airoho duruk kala fug. Famen de nit de mun elehapdoho nenobahaukoho durukmu welahe!” ulug hweag-etfag.

⁵ Ai ebag ma Raja Ahasyweros en ratu Ester fam hein og-hauk kwit de, “Aire ap san ambong seroho duk alereg? Ne, ap aire ebe kema wereg?” ulug hein og-hebag.

⁶ Ai ebag ma Ester en onggo uruk kwit de, “Hun Haman olok mun siag ahun aure nit neneselei on en deg lit, nit nenowatmin ulug duruk ahun!” ulug hweag-etfag. Ai ebag ma at Haman anyo en enda akol nim-nim hun raja nim ohwe raja nim fu esebag.

⁷ Airoho debag ma re hun raja anyo re olok humon atfagdeg e doaleg alukwema hwerieg latfag angge anyo feiyalug inatfagdeg de wilip atlug de oluluk wilibik lebag. Ne, at Haman en boruk kwit de, “Raja en de an nebe unggum og-nirikohoreg,” bebagdeg de at ebe wilibik la fug angge hwe Ester anyo nim hwerieg wereg lit de, nahap wendat nabin ulug heng uruk katfag.

⁸ Airoho duruk kwit de at Haman ebe enda mundoho wat-dauk kwit de onggwareg en hwe Ester yinggoho hwerieg latfag angge anyo emberimmu ying-atfagdeg de hwe Ester en unggum ai elehapdoho nobahaukwag ulug heng uruk katfag, famen at airoho duruk li em etano re raja obam oluluk en nikangge olma kwik lebag. Kwik lauk men de at Haman anyo airoho durukmu hebagdeg de raja en ele hwiruruk kwit de, “Nunggwangge? Aren de ambong si seroho etma an norohole kwe, nonggwareg nobam o ilonggoman nohwe inim seberimin ulug duruk a?” ulug ebag. At raja ele airoho ebagdeg duruk kweleg etano re it ap yabuk raja apma duruk enap etmano watfagdeg de Haman il salik watfag.

⁹ Airoho debelug, hun Harbona, it ap yabuk raja apma duruk on watfag on etmano misig eke en uruk kwit de, “Nakni, hun Haman obam o luluk etma re e ap bo-enepukmu wirig de lahabeg yatdoho 22 meter en deg angge eke wirig. E wirig aire at Haman en de hun Mordekhai nakni howatlep angge del hapsi ahun anyo waroho boruhukmu ulug unduhuk fesi on wereg,” ulug hweag-etfag. Ai ebag ma at raja en mingming-enepuk kwit de, “At Haman aire e wirig ai fam borebeik lakiek!” ulug hweag-esebag.

¹⁰ Ai ebag ma re iren hun Haman anyo e wirig hun Mordekhai waroho boruhukmu ulug witfag on anyo fam borebeik lebag. Airoho debag ma neg de raja ahummu olok welatfag on anyo lombuk atfag.