DANIEL 8 - ALLAH WENE FANO WENE

Daniel a fam hag hauk men domba yohombuk on eke nim kambing yohombuk on eke nim hebag wene

¹ Hun Belsyazar raja inatsireg melal-enepuk weregman neg de tahun henahaneg on wereg kweleg, an na hag fam bireneg on hauihik.

² An na og-hauk hag fam ai hauk men de an nebere o propinsi Elam fam en o Susan it Persia enap en enobam indipmu ibukota etma wereg latihik. Etman de an nebe re Ik Ulai lulukmu etma unduhuk wereg lit,

³ duruk men de ik anyo aegma re domba yohombuk on misig eke andimuk biren yarangge deg ma, andimuk etan misig eke neg de keron deg ma yit-yatdoho wilibig latsi.

⁴ Airoho deg ma hauihikmen de domba anyo en andimuk de barat fil nim utara fil nim selatan fil nim dalduk katsi. Airoho durukmu re it wam amu on de at alukwema am fugdoho ne at along apman de lil am fugdoho deg latsi. Aren de onggwareg enda boruk ale neg duruk kwit de mundoho awonog atuk katsi mu hauihik.

⁵ Airoho duruk on anyo an nil kwelabohoman de, kambing yohombuk on misig eke il barat fil en buroho waharuk kwit enam atuk mu re o kwenang au fene maseruruk katsi. At ebe re mun baleg ahan bururum durukmu re eyog en kwenang sen ha fug alereg latsi. Ne, no ai il biren angge sahalimu etare andimuk misig eke enameg deg latsi.

⁶ Airoho deg ma re kambing yohombuk on anyo en de domba yohombuk on ik aegma wereg ma hauihik on anyo horogma aik waharuk katsi. Airoho waharuk kwit de olok hasimeg housaloho waharuk katsi.

⁷ An nil kumu hauk men de aren de domba yohombuk on watuk katsi. At ebere mundoho olok liereg ma re domba yohombuk on anyo fam housaloho dag uruk kwit de andimuk biren angge etano sombo esaukmu re domba yohombuk anyo en diroho suroho duk fug ale atuk katsi. At ebere kwenang hamboko hwik-esauk kwit sobit-sabat esaukmu re ap delduk on eke welatswa fug.

⁸ Kambing yohombuk on anyo re ebe hum atuk katsi famen, at ebe along wereg on aik laharuk li em etano re at andimuk humon anyo somborisi. Mu re obale kwe anyo re andimuk ohwan angge enamoho wilipuk katsi. Wilipukmu re ebe domog de alukwe amu-amu deg latswa.

⁹ Andimuk etano sahalimu en de andimuk doron eke wilipsireg at ebe hum aheg, at along wereg ale re wiriloho selatan huli etma aik laheg, timur fil aik laheg, ne kwenang orohole fano on fil etma aik laheg, duruk katsi.

¹⁰ Andimuk anyo re ebe eke nim hum atuk kwit de omamne wereg atsireg de aren tentara boholma on ebe sohwalanggen omano inim weim yapuk kwit de, it etmano enesahalimu en de fomane o kwenangma hwik-esa wambik wahasireg eyog en sobit-sabat esauk katsi.

¹¹ Airoho disireg en de aren panglima tentara boholma on fam de an nalong deg lahi hweag-ereheg, iren di on su on panglima ai fahet folug nukoho hundig-hundig og-utuk on etmano eleho feheg, at ai obahet duruk kwit kabog-durukmu o wirig etmano meiyal-eseheg, duruk katsi.

¹² Airoho durukmu re ap homi etmano re iren di angge su angge folug og-utuk kamuk ulug wereg ale anyo sahaloho duruk fam de it siag duruk katswa. Ai fam de wene demdoho on kabog-duruk kwit duruk ale anyo re kwenangma hamboko hwik-esa wamburuk katsi. Airoho duruk katsi ai fam de andimuk anyo re aren duruk katsi ale etmano ambiangma fano atil neg lauk katsi.

¹³ Ai en an holduk men malaikat eke en eke fam uruk kwit, “A og-hauk hag fam hehe on etma re ke huli en abirangge enam aruhu? Ke huli siag humon ai en di angge su angge folug yalduk on anyo obale nahu? Ke huli it tentara bohol fam on nim ne iren wene kabog-duruk kwit duruk obam anyo nim sobit-sabat esauk karuhu no?” ulug uruk katsi.

¹⁴ An holduk men malaikat misig eke en onggo uruk kwit, “Aire nukoho 1.150 en welatlug aruhu. Eta airoho wereg li em de di on su on hubet mel, hupmu mel folug waroho yalduk on anyo re og-utuk kamuhup fug. Ai mundoho atil lauk em neg de o wene kabog-duruk kwit duruk obam ai buhun aruhu,” ulug uruk katsi.

A og-hauk hag fam hebag on anyo malaikat Gabriel ebe enamegdoho hweag-etfag on

¹⁵ Airoho durukmu hauihikdeg an den airoho keroho aruhu ale fahet hihi ahi, ebe furoho noluk alep aho, ulug duruk men de, fetagdoho etano neg an nalukwema etano ap hag angge eke unduhuk latsi.

¹⁶ Airoho unduhukmu an hol-hauk men de Ik Ulai foma fil etmano en ele hwiruruk kwit, “Aren a fam hag heheik on hat Gabriel en ebe diroho ulug enamoho hweag-imin” uruk katsi.

¹⁷ Airoho hweag-itsi mu re Gabriel an nalukwe fil unduhuk latsi on anyo an naluluk aik wahasi. Mu re an mun nakol en waroho ying-atihik. Famen Gabriel en an nobam uruk kwit de, “Hat ap hebe elamna on su, haren ha fam hag hehen on aire o ahae fotog salim aruhu ale fahet hehen” ulug hweag-nitsi.

¹⁸ Airoho aren an hweag-nutuk kweleg etano re an nebe nape moririhik. Famen aren an letdoho nenggik seneko unduhuk nobahasimu inatihik. Inatihik mu aren uruk kwit,

¹⁹ “An den de hat hobam Allah olok en fobik duhumu aruhu ale fahet hweag-hitmin. Aire haren hehen on aire o ahae fotog salim etma fil en aruhu aleroho hehen.

²⁰ Haren domba yohombuk andimuk biren wilibig angge hehen on aire kerajaan Media mel Persia mel fahet wal-hehegdoho hehen.

²¹ Kambing yohombuk on aire kerajaan Yunani fahet wal-hehegdoho hehen, ne il biren sahalimu andimuk enameg laha on aire raja keram inaruhu on fahet.

²² Andimuk keram on anyo somboroho lauk kweleg andimuk ohwan angge enam atuk kaha on etare, kerajaan Yunani ai fam minggit-manggat atuk kwit de kerajaan ebe ohwan aruhu ale fahet, famen de it ohwan etan de kerajaan keram on ai omamnereg laruhu hagdoho eke enomamne deg lamuhup fug.

²³ Kerajaan eta ambiangma obog aik lauk li em etare, it melal-enepuk kwit wereg ale mundoho enamegma aik laharuk li em de ap raja misig eke enda haro on deg lit sei ale lal-enepuk ale fahet mundoho oluk deg on eke enam aruhu.

²⁴ Airoho enam aruhureg de at ebe omamne aruhu famen at onggwareg omamne fam de fug. Aren de ap homi mundoho elehap enepuk on ename feik waruhu, ne aren di ale su ale duruk on etma re ambiangma am ale neg atuk karuhu. Aren de ap enanggiluk wereg on mel Allah omaliki mel elehap debeseruk karuhu.

²⁵ Aren amenggel deg lit durukmu re aren ele sei ale uruk on etma re ambiangma higit neg atuk karuhu. At ebe onggwareg en leho fahat-dauk kwit de aren keram enelugwe fouk eleg angge aren ap homi humdoho elehapdoho feseruk karuhu. Ai en aren de Raja Mun Humon anyo famen oho inim weim yapuk karuhu. Famen at ebere ap homi enomamne fam fug famen ebe mundoho luluhun esahup.

²⁶ Ne, di on su on waroho og-utuk ale fahet ha og-hauk hag fam dindiloho hweag-hutuk mu hehen on aire dik-demdoho aruhu ale fahet hehen. Famen abirangge etma re fobik li alukwema yatdoho welamuhuk li etma aruhu ale fahet hehen; anggere haren ap homi enobam dindiluk fug” ulug hweag-nitsi.

²⁷ Airoho hweag-nitsimen de an nebe nomamne eleg atihikdeg nobam ouk atsi mu nukoho nunggwe en hagdoho ouk wauk katihik. Airoho ouk wauk katihikdeg nebe inatlug nikangge yabuk raja obahet on dirihik. Famen an na hauk hag fam hauihik on etmano fahet meneni yatdoho wenggelduk kwit ebe furoho noluk am fug alereg latsi ale ai fahet nobam leleroho welatihik.