DANIEL 7 - ALLAH WENE FANO WENE

DANIEL EN A HAG FAM HEBAG ON DINDILFAG WENE 7:1–12:13 Singa hag angge mel, mene hag angge mel ohwan angge enam atuk mu Daniel en a hag fam hebag on

^1-2 Hun Belsyazar o Babel fam raja inatsireg wereg ma tahun keram on fam eta, hup eke salim an, Daniel na weheg, ne na og-hauk hag fam nil heheg dirihik. Airoho hauihik deg na wauihik ale anyo an den lisu baloho ferihik, ne an den hauihik ale aire ebe diroho: Hol o unggut-unggut mundoho en fi ha wahasimu, hol anyo en sielu ik laut ahum emberim fene watuk katsi.

³ Ai en ik anyo ahummu en de singa hag angge mel olomene hag angge mel enebe ohwan angge mun hum-ham angge enam atuk katswa.

⁴ Enam atuk mu re keram on aire ebe singa hag famen at ahwerabul de suwe ikwesahop ahwerabul deg latsi. Airoho deg ma an den fu hauk men de fetagdoho etano neg ahwerabul anyo sanogdoho oko lauk katsi; ai en de at ebe kwenangman lehelug inatsireg eyog biren etano emberimmu ap hagdoho inatsireg de at enda wenggelduk on og-utuk katsi.

⁵ Bireneg on aire no humon beruang obabe hag deg latsi. At ebere eyog fam unduhuk lit de aegma re obal owag henahan angge salukdoho welatsi. Airoho wereg ma an hol-hauk men de ele eke at fam uruk kwit, “Ino angge etma hat hambono aleroho humdoho nakin!” uruk katsi.

⁶ Airoho deg ale anyo fahet an den fik-furoho kumi deberuk men de amu on enam atuk katsi. Obabe re olomene humon macan tutul hag deg latsi, famen at ambolowag fam de suwe ahwerabul on ohwan angge welatsi, ne at unggul de ohwan deg latsi. Airoho deg ma at ebere along-balong deg latsi.

⁷ An nil kumuregman de ohwaneg on enam atuk katsi. At ebere omamne hum-hamdoho deg lit nik aleroho mun namelmel aleroho deg latsi. Aeg de humon deg ma no bosiemanggen wirik deg hag deg lit, aren de senggelduk angge etmano waroho sebele folug mun misiham biloho nauk katsi. Airoho nalug ando etmano re sobit-sabat esauk katsi. Mene hag angge keram enam atswa on etmano re amureg kweleg de ohwaneg on ai neg andimuk num en deg latsi.

⁸ Airoho deg ma an nil andimuk etmano kumuregman de, fetagdoho etano neg andimuk amu on eke nin etano sahalimu wilipuk katsi. Andimuk aire we doron, famen ai wilipuk kwit fihil-fahal esaukmu re andimuk atam on etano henahan angge heneko lauk katsi. Andimuk doron anyo re il de ap homi inil hag ne ambilik fam de awonog fam werahap hauk katsi.

Daniel a hauk hag fam At oluk mundoho-mundoho wereg on anyo hebag on

⁹ Airoho deg ma an nil kumureg lit neg weregman de takhta nunggwe en hagdoho foruk katsi. Airoho folug de At oluk mundoho-mundoho neg wereg on anyo re takhta etmano sahalimu en misig eke fam hweria atuk katsi. At ai asum mel, oruk mel de mun il kuron suwe bondol hag on deg latsi. Ne, takhta Aren on anyo mel eyog birim duruk angge hilinggig on etmano mel de indok ambulbul en yebelelang duruk katsi,

¹⁰ ne takhta anyo fam en de indok indip ulogdoho wilibik waharuk katsi. Ap homi enebe humdoho ribuan en At obahet duruk katswa, ne ap enebe jutaan on hum-hamdoho re At alukwema unduhuk latswa. Airoho unduhukmu re ap homi enebe ayo wiroho katukdoho balikoho re buku-buku etmano fisela debeil lauk katsi mu hauihik.

¹¹ An nil kumureg lit neg weregman de andimuk doron anyo re awonog fam werehap hauk katsi. Ai en olomene hag angge ohwaneg on anyo ware folug, at ebe wareg anyo re indok fam hwik-esaukmu re indok en mundoho naukmu hauihik.

¹² Olomene hag mel singa hag angge mel amu on etmano re it enalong wereg on anyo mundoho oko wasi, famen it enebe neg de enoluk weregman li it fahet ene fesi huli eta aik waruhu urukmu hauihik.

¹³ An den o hup anyo salim na hag fam haukmen de amu angge eke ebe ap hag angge eke waharuk katsi. At ebere hena en maseroho kwelaboho waharuk kwit de At oluk mundoho-mundoho neg wereg on anyo akit lalug at ebe horogdoho laukmu hauihik.

¹⁴ Airoho laukmu re at leho foruk kamag ulug alongap debeheg, raja wereg lit ap homi at enggikmu welamag ulug unduhuk feheg, durukmu hauihik. Airoho og-itsi mu re ap homi abirangge enunggul unuk domog, di unggul unuk su unggul unuk, enele domog, at apma wereg lit at obahet duruk katswa. Aren omamne fam sen-enusug wereg lit unuk bogdeg wereg ma it eke en sebeloho fouk fug aleroho mundoho-mundoho welam alereg ma hauihik.

Ena hauk hag fam hebag on etmano fahet ebe diroho aruhu ulug selegdoho bilinggebag wene

¹⁵ An na fam hag hauihik on ai fam nenda nong-hong uruk kwit nendama meneni yatdoho ebetuk katihik.

¹⁶ Airoho dirihikdeg an nebe ap eke eta unduhuk latsi on aluluk lauihikdeg abirangge hauihik on etmano fahet ebe enamoho hweag-nomag ulug heng dirihik. Mu re aren diroho aruhu ale fahet hauihin ulug hweag-nutuk kwit,

¹⁷ diroho isi: “Singa hag angge mel olomene hag angge mel ebe ohwan etare o kwenangma suma kerajaan ohwan on enam amuhup aleroho hauihin.

¹⁸ Famen, ap homi Allah Mun Leho on omaliki neg de, ap homi eke enenggikmu fesehumu sen-enusug wereg lit fobik mundoho eleg am fug angge sen-enusug lit welamuhup” ulug hweag-nitsi.

¹⁹ Airoho hweag-nitsi famen olomene hag angge ohwaneg on wilibik wahasi on, it henahan etano en de mun aham deg ma; mundoho namelmel deg lit mun luluhun eseheg, aren senggelduk anggere misiham enggiahap tembaga on mel aeg bosiemanggen on mel fam biloho nenggeg, ne ando re eyog en sobit-sabat eseheg duruk katsi on aire ebe keroho aruhu ale fahet duruk katsi e, noluk alep aho berihik.

²⁰ Ne, andimuk unggulowag fam num en angge etano fahet mel, ne it etano wilibigmu andimuk doron eke wilipuk kwit andimuk keram on henahan angge heneko wilipuk katsi ale anyo fahet mel, andimuk doron anyo en awonog atuk kwit ele en werehap hauk katsi ale mel, ne at aire andimuk amu on etare horog hareg kweleg at neg namelmel alereg latsi ale ai fahet mel, noluk alep ulug berihik.

²¹ Airoho berihikdeg nil obam louregman de andimuk doron anyo en de ap homi Allah onggwareg en omaliki etmano nim weim yapuk kwit enalong elehap debeseruk katsi.

²² Airoho debeselug weregman de At oluk mundoho-mundoho wereg on anyo en wahasireg it Allah Mun Leho wereg on omaliki etma re wene enobam eleg. Ne, iren melal-enepuk kwit wereg lamuhup li em horog aik waha ma re it enalongap debeseheik, urukmu hauihik.

²³ Airoho hauihikmen ebe furoho noluk alep berihik on anyo fahet enamoho hweag-nitsi on de su: “Singa hag angge ohwaneg on aire kerajaan ohwaneg on o kwenangma suma inaruhu mu re kerajaan amu on etma nim de aham deg laruhu. Kerajaan ai en de o kwenangma abirangge luluhun esahureg abirangge bil esahureg de ando re eyog en sobit-sabat esahu.

²⁴ Andimuk num en on etare ap raja enebe num en angge kerajaan ai fam melal-enepuk kamuhup on. Airoho melal-enepuk kamuhup men de raja amu on misig eke enam aruhu on aire; it raja atam welamuhup on etma nim en de aham deg laruhu, ne aren de raja enebe henahan angge enalong elehapdoho fesehu.

²⁵ Aren de Allah Mun Leho wereg on anyo ele sahale folug ele uruk kwit de Allah omalik on al bereloho feseruk karuhu. Aren de Allah wene melaleg etmano ahamdoho feheg, Allah mot-duruk kwit pesta duruk on mel, ahamdoho feheg, duruk kwit de it etma enebe tiga setengah tahun fam along apma sebel-enusug laruhu.

²⁶ Airoho sebel-unusug wereg ma it boholma on en wene kabog-dulug katukdoho at along wereg on anyo oko folug de at ebe luluhun esahupmu re mundoho eleg aruhu.

²⁷ Airoho debelug de o kwenangma kerajaan-kerajaan wereg ma enalong wereg ale nim enomamne wereg ale nim etma re it Allah Mun Leho wereg on anyo omaliki fam og-esahup. Mu re it enenggik fam wereg ma ap o kwenangma enenggikmu sen-enusug wereg on etma mel, enomamne wereg on etma mel abirangge it enapma wereg lit de, it enobahet duruk kwit enele holoho neg duruk kamuhup,” ulug urukmu hauihik.

²⁸ Airoho fahet hauihin ulug hweag-nitsi on fahet lisu baloho ferihik on de airoho. Famen at ai en airoho hweag-nitsi mu an norohole ua deberihik deg nenda fitihik, famen de an dirihik ale ai fahet de ap misig on fam ulug oho eke hweag-esauihik fug.