DANIEL 3 - ALLAH WENE FANO WENE

Raja Nebukadnezar kembu emas on witfagdeg ap homi kembu ai neg apne wauk kamag ulug wene melaleg wilipfag wene

¹ Airoho fesebagdeg wereg lit, nukoho eke salim de, Raja Nebukadnezar en kembu eke emas on ap homi enahut ilitdoho witfagdeg owag de 27 meter en ne obahare re 3 meter en am ale hagdoho on o propinsi Babel lei humon unuk Dura donggoma etma witfag.

² Wiri febagdeg de autsi wilayah domog fahet raja welatfag on mel, Bupati mel, gubernur mel, it ap kaindeg komo-enepuk on mel, unggum bilingguruk enap mel, wene katukdoho balduk enap mel, uang foroho enap mel, it camat hag welatfag enap mel, enebe mundoho re kembu wiroho febag on anyo obahet soni esetuk mu wamag ulug enayonggo fesebag.

³ Airoho enayonggo febag ma enebe abirangge watfagdeg enebe kembu anyo olohotma unduhuk wereg kweleg,

⁴ ap eke at raja en wene uruk ale walug hweag-esauk katfag on en ele omamneroho hweag-esauk kwit de, “Hit ap homi enunggul unuk domog en mel, inindip domog en mel, enele domog en mel, melal-enepuk kahep on wahep on etma nori neg. Ketiare hun raja en wene indip leho on wilibeheik on su henesanggo holiyug:

⁵ Hit ap homi henebe abirangge en de bohweap trompet ele mel, fili ele fololeg fam fururuk on mel, kecapi mel, binggong rebab mel, gambus mel, serdam mel, binggong ele amuroho uruk on mel, etma ele uruk halug de, an Raja Nebukadnezar en kembu ahut ilitdeg emas on fam wiri ferihik on ai henelenggen kwenang dimiroho sahaun ulug apne wakiyug.

⁶ Famen de it eke fomane en an nele ihi on ai holoho duhup fug halug de, enebe indok ambulbul kululung durukmu etma hwik-esahuk isi,” ulug hweag-esebag.

⁷ Airoho ebag ma enesanggo holfagdeg de it ap enunggul unuk domog, inindip domog, enele domog etmano en de binggong bohweap mel, di on su on etmano kong deheg, fureheg, duruk kweleg de iren enelenggen dimiroho kwenangma yaho folug sahaun uruk kwit kembu ahut ilitdeg emas on fam wirig angge anyo apne webag.

Daniel ori henahan etano raja ele sahalfag ma unggum og-esebag wene

⁸ Airoho ebag ma re, it Babel on fomane en de wene ai eiale aha man it ap Yahudi on enobam wene foul ulug bebag.

⁹ Airoho bebagdeg de iren Raja Nebukadnezar fam uruk kwit de, “Nenakni holuk mundoho welaruhun.

¹⁰ Haren wene indip leho on wilipuk kwit de, binggong ele fururuk on mel watuk on mel ele kong-duruk halug de ap homi kembu ahut emas on fam ilitdeg angge ai henelenggen dimiroho sahaun uruk kwit apne wakiyug,

¹¹ ne it ap homi fomane eke en wene melaleg ai holoho duhup fug on de indok ambulbul ulog kululung uruk on fam hwik-enebuhup irihin.

¹² Famen de it ap Yahudi on nenakni haren yabuk o propinsi Babel fam suma kain on welamag ulug unduhuk feserihin on etmano en de wene mun leho on haren wilipihin on anyo seramap debehesareg de holda-holda duruk. It ap etman de, nenakni haren hangge allah hagdoho apne wauk kahen on etmano apne wa fug angge wereg lit de, kembu emas on ahut ilitdeg haren witihin on anyo oho apne wauk fug,” ulug hweag-etfag.

¹³ Airoho hweag-etfag ma raja esanggo holfagdeg ahummu het-bet ebagdeg, de ap henahan etano og-eneplug at akit wamag ulug hweag-esebag.

¹⁴ Airoho ebag ma it etano og-eneplug watfag ma raja en hein og-esauk kwit de, “Sadrakh, Mesakh, Abednego mel, hiren an den kembu ilah apne wauk kahi on ai apne wa fug angge embeselug wereg lit kembu emas on ahut ilitdeg ai apne wauk fug uswa etma re demdoho a?

¹⁵ Demdoho halug de, ketia binggong ele fururuk on mel, watuk on mel etma ele uruk kweleg, an den kembu witihik on ai henelenggen dimiroho sahaun ulug apne waluhup a? Henerim a. Henerim halug de an den henebe indok ambulbul ulog kululung durukmu hwik henepminmu, re kembu nangginig on en an nenggikmu angge ai del-henebuk alereg? Mun eleg,” ulug hweag-esebag.

¹⁶ Airoho hweag-esebag ma it Sadrakh mel, Mesakh mel, Abednego mel uruk kwit de, “Raja Nebukadnezar nenakni. Nit nenebe nenonggwareg along bal dehe fug halereg.

¹⁷ Degma re haren nit nenebe indok ambulbul ulog duruk on ai fam kwelabe nenobahamihin halug de, nit nenakni Allah apne wauk kahe on ai en del-nenepmisi halug de, nenakni hat homamne fam indokma kwelabe nenobahamihin mu etman oho Aren demdoho del-nenepmisi.

¹⁸ Famen de Aren lahe nit del-nenepuk eleg halug de, haren kembu ilah apne wauk kahen on ai apne weheg, kembu emas on witihin on ai nenelenggen dimiroho sahaun ulug apne weheg, duhuk fug anggere hat holukdoho welamuk,” ulug hweag-etfag.

Sadrakh mel Mesakh, Abednego mel, unggun enobam fesebagdeg indok ambulbul fam kwelab-enepfag wene

¹⁹ Airoho ebag ma re raja olok it Sadrakh, Mesakh, Abednego mel fam fesebagdeg olohore ahe-fahet neg ebagdeg at autsi en de indok we dorangge neg yaldukmu indok ambulbul we dorangge nomor 1 uruk on eta huli re fug, ite we humdoho yaldukmu indok ahanhan de nomor 7 inim indok ahanhan humon eke yalukwag ulug hweag-esebag ma yalfag.

²⁰ Airoho debebag ma aren ap tentara omano en it enomamne humon neg en it Sadrakh mel, Mesakh mel, Abednego mel sabu het-debeselug de indok ambulbul yaleg on ai fam hwik-enebukwag ulug mingming enepfag.

²¹ Ai ebag ma re folo-folo etano neg it ap henahan etano enebe enasum abirangge, enebe sum mel, sum jubah mel topi mel, ne enesum amu on foma mel wandeg kweleg sabu il horoheg het enepfagdeg, indok ambulbul duruk angge fam anyo hwik-enepfag.

²² At raja diyug ulug melaloho wilipfag on aire mun omamneroho ebag ma atlug de indok yalfag on ai ohore mun nikaleroho yale febag ma re indok anyo ahanhan en de ap Sadrakh mel, Mesakh mel, Abednego mel hamboko indok horogma feseik lebag on etmano han yaloho waratfag.

²³ Airoho debesebag ma ap henahan angge sabu hetdeg etano indok ambulbul yaleg anyo fam wambebag.

²⁴ Wambebag ma durukmen fetagdoho etano Raja Nebukadnezar youk anggoloroho lebagdeg, at ebe folo-foloroho inatlug autsi pegawai fam ele hwiruruk kwit, “Niren de ap henahan etare sabu het-enebehereg indokma hwik-enebehe fug no a?” Ulug ebag ma, Iren onggo uruk kwit, “Nenakni, demdoho airoho deheman” ulug hweag-etfag.

²⁵ Airoho ebag ma raja en ele uruk kwit, “Famen de nunggwelug ap enebe ohwan on indok ambulbul sahali kwe etma lag-wag uruk no? It enebe ohore sabu hetdeg fug, ne diroho suroho mel deg fug ai. Ne, eke ohwaneg on aire obabut de dewa hag deg,” ulug ebag.

Ap henahan etano fiselaroho fesebagdeg eneyabuk lahabe fesebag wene

²⁶ Airoho ebagdeg Nebukadnezar ebe indok yaleg on anyo sokolma aik lebagdeg ele hwiruruk kwit, “Sadrakh, Mesakh, Abednego, Allah Mun Leho wereg on anyo amingming eta a! Indok ai fam en wilibik manik a!” ulug hwirebag ma it etano wilibik watfag.

²⁷ Wilibik waharukmu re it ap raja apma on mel gubernur-gubernur mel bupati mel ne pegawai amu on mel en it etano enebe walinggoho kwelabe fesebagdeg enesauk men de it enebe indok oho dem eke bal-esebag fug. Ne, it enoruk oho indok han nebag fug, it enesum oho wandeg ale neg deg latfag, ne indok ahesusuk amben famen oho it enobam wereg fug angge deg latfag.

²⁸ Airoho deg ma esebagdeg raja en uruk kwit, “Allah it Sadrakh, Mesakh, Abednego mel en apne wauk on ai neg motdeg welamag. Aren de amingming angge henahan At obam demdoho boruk on eiya del-enebukwag ulug malaikat Aren on mon-enebik waha. Iren an nawene melaleg anyo sahale fousareg en it de kembu dewa amu on fam apne wauk ale re nenerim we Allah nit nenakni ai fam neg apne wauk kamul ulug bousareg de waratuk ale aire nenenda bousa.

²⁹ Ai fam de an den nawene melaleg diroho uruk kahi ai, ‘Ap homi enebe domog unggul unuk en inim, unggul unuk-unggul unuk on en nim, enele amu-amu on en famen nim en Allah it Sadrakh mel, Mesakh mel, Abednego mel en apne wauk on ai fam siahapdeg hag aleroho uruk on de enebe king-kongdoho debeseheg, enobam moluluk eseheg dulug o olundoho meiyaleg kabog lahabeg laruhu. Aire indip Allah en deheik ale aire dewa en oho duk fug alereg on deheikma’ ” ulug ebag.

³⁰ Airoho ebagdeg de raja en it Sadrakh mel, Mesakh mel, Abednego mel, etano eneyabuk lehoma on ekenim lahabeg fesebag ma re it etano re o propinsi Babel fam etma ap yabuk lehoma seneg enap atfag.