DANIEL 2 - ALLAH WENE FANO WENE

Raja Nebukadnezar en a og-hebag

¹ Nebukadnezar raja inatfagdeg weregman neg de tahun misig debagdeg bireneg angge wereg lit, hup eke salim de a og-hebag. Airoho hebagdeg aren a og-hebag on ai fahet de, ‘Ebe nangginoho fahet hauihik?’ Ulug furoho nohouk fug angge meneni ebetuk kwit neg welatfag.

² Ai fam de raja en de ap wene fobik aruhu ale fahet ulug hweag-esauk on mel, ap hwal ahun di ale su ale oluk on mel, hein og-angge mel, di wene su wene enoluk on mel, en de, “Ha og-hauihin on aire ebe diroho aruhu on fahet hauihin,” ulug hweag-nirik wamag ulug yonggo fesebag ma watfag.

³ Watfagdeg enebe raja olohotma unduhuk wereg kweleg, raja en uruk kwit de, “An na og-hihi famen de ebe diroho aruhu on fahet hihi ulug noluk am on famen de, napeleg en de nenda kolo kwe yaroho welahi,” ulug hweag-esebag.

⁴ Airoho hweag-esebag ma iren ap homi Aram en enele fam onggo uruk kwit de, “Nenakni raja hebe holuk mundoho welaruhun. Famen nenakni haren ha og-hehen on ai fahet de, ebe diroho aruhu on fahet hauihin, ulug hweag-humul en, ha og-hauihin on ai dindiloho hweag-nesakin?” ulug hweag-etfag.

⁵ Ai ebag ma raja en uruk kwit de, “An den duhuk ulug nendama mundoho wenggelihi on de su hweag-hesa. Hiren lahe an na og-hauihik on ai dindiloho hweag-nereheg, ebe diroho aruhu ale fahet hauihin ulug hweag-nereheg, duk on famen, hweag-nutuk eleg halug de, henebe welelenggendoho henowatlug de henobam wirig inim moluluk-malalakdoho henowaruhuk.

⁶ Famen de hiren lahe na og-hauihik on ai bilinggoho hweag-nereheg, ebe diroho aruhu on fahet hauihin ulug hweag-nereheg, duluhup halug de an den onggo mun fano on og-heseheg, mun alongdoho leho henobahakeg, duhuk. Anggere an na og-hauihik on ai, ebe diroho aruhu ale fahet ha og-hauihin mu ulug hweag-nereheg diek,” ulug hweag-esebag.

⁷ Airoho ebag ma iren de, “Ha wauihin on ai dag dindiloho hweag-nesamihin mu, niren ebe diroho aruhu on fahet hauihin ulug hweag-humul,” ulug hweag-etfag.

^8-9 Airoho ebag ma raja esanggo holfagdeg aren uruk kwit de, “An den de na wauihik on ai dindiloho hweag-nutuk eleg halug de unggum misig ale on eke henobam fohuk, ulug ihi ai en, an den ihi on ai suhwi amag ulug henele sei ale hweag-numluhup on henambilik fam mundoho eneg deg ma hisihi. Mu re hiren an na og-hauihik on ai bilinggoho hweag-nutuk kwit, a wauihin aire ebe diroho aruhu ale fahet hauihin mu ulug higitdoho hweag-nutuk bohuk” ulug hweag-esebag.

¹⁰ Ai ebag ma it ap di wene su wene enoluk enap omano en de, “O di obam su obam mundoho ap enebe en di wene su wene haren hweag-nomag ulug ehen on ai hag uruk on de eke wereg fug. Ne, ap eke raja eneg wereg ma mot-duruk on en autsi wene fobik aruhu ale ulug hweag-esauk on mel, ap hwal ahun nik ale duruk on mel, di wene su wene awene enoluk deg on mel, et obam olma wereg on en ohore wene haren, niren onggo hweag-nomag ulug ehen on etma hagdoho uk on de eke wereg fug.

¹¹ Nenakni haren de wene onggo mundoho uk fug alereg on ehen. Nit ap homi on de it eke en airoho ulug hweag-hom on eke wereg fug. We kembu dewa en neg de higitdoho uk alereg famen de, ebe nit ap homi nenesahalimu wereg fug,” ulug ebag.

¹² Airoho ulug hweag-etfag ma holfagdeg raja ahummu humdoho het-bet ebagdeg de, ap homi o Babel fam etma di o su on wereg on etmano en enenda kahaleg lit di wene su wene enoluk on etmano mundoho enowarukwag ulug ebag.

¹³ Ai ebag ma re wene ai fahet ap homi di kwe su kwe mundoho hweag-esebag. Hweag-esebag ma, ap enenda kahaleg enap di wene su wene enoluk deg enap etmano enowatul ulug duruk kwit de, Daniel ori nim oho enowatul ulug hera-enepfag.

Allah en de raja en a webag on anyo mel ebe fobik aruhu ale ulug mel Daniel hweag-etfag wene

¹⁴ Airoho durukmu re hun raja autsi fahat-enusug welatfag ahun enowe unuk Ariokh anyo en de ap enenda kahaleg lit di wene su wene enoluk deg on etmano mundoho enowatmin ulug durukmu, Daniel at akit lebag. Lauk kwit de wene hweag-itmin on ulug wene fik-foukdoho walug lebagdeg hweag-utuk kwit de,

¹⁵ “Hun raja en wene melaleg omamne on wilibeheik aire nunggwelug?” Ulug hweag-etfag ma at Ariokh en uruk kwit de, wene ebe diroho atsi mu ulug Daniel oluk-ap debebag.

¹⁶ Airebag ma at Daniel ebe folo-folo raja akit lebagdeg hweag-utuk kwit de, “Nakni haren ha og-hehen on ai fahet de ebe diroho fahet hehen ulug an den hweag-hitmin en de il misig hambuk hakin,” ulug hweag-etfag.

¹⁷ Airoho hweag-etfag ma raja en uruk kwit de, “Fano,” ulug hweag-etfag ma, at Daniel sombandoho obam watfagdeg wene anyo fahet ori nimi Hananya mel, Misael mel, Azarya mel etmano hweag-esa watfag.

¹⁸ Airoho hweag-esauk kwit de. “It ap fomane enenda kahaleg lit di wene su wene enoluk deg on o Babel fam wereg on etma enowatuk kwit, hit nori ninim nenowaruk no re, Allah boholma along wereg on en nenebe enda nenebeheg, at raja en a heraho ale heheik on ai ebe dipdoho hweag-neseheg, dukwag ulug de heng uruk kwit somban uruk kamuk,” ulug hweag-esebag.

¹⁹ Ai ebagdeg hup nohoruk men de, raja a heraho ale hebag on anyo Allah en Daniel a hauk hag fam hweag-etfag. Airoho hweag-etfag ma Daniel en Allah boholma along wereg on anyo mot-debag.

²⁰ Mot-duruk kwit de diroho ebag, “Allah bohol fam along wereg on ai en de enenda kahaleg wereg ale mel, enomamne humon wereg ale ai mel indip wereg, ai fam de mundoho-mundoho mot-duruk kamul!

²¹ Haren de di wene su wene atuk fam amag ulug mel, di salim amag ulug mel de haren neg deberuk kahen. Haren ap raja welamag ulug unduhuk feseheg, sebele feseheg, duruk kahen. Haren ap homi enenda kahaleg on halug di wene su wene fureberuk kamag ulug debeseheg, enape wong deg on fam halug fureboukwag ulug mamul-enebeheg duruk kahen.

²² Haren neg di wene su wene mun ilonggoma heraho ale ebe diroho aruhu ulug enamoho hweag-eseheg, duruk kahen. Hat hebe o seleg ombagbag fam hwililip hesugmu wereg lit di ale su ale mum fam atuk on aire hat mundoho holuk deg lahen.

²³ Allah an nombasi en mot-hapuk katswa on nakni. Niren at raja en nit nenobam dimin ulug duruk ale ai fahet hayonggo fehema, nenele hesanggo holug an nenda kahale nobahakeg, nomamne og-nereheg, dirihindeg wene heraho ale ai ebe raja hweag-utuk on fahet hweag-nerehen, ai en de mot-habeheg, leho hobahakeg, duruk kahi, nakni,” ulug somban ebag.

Daniel en de raja a webag on anyo fahet hweag-ereheg, ebe diroho aruhu ale fahet hauihin ulug hweag-ereheg debag wene

²⁴ Airoho somban ebagdeg de at Daniel ebe re raja ap enenda wereg enap mel, di wene su wene enoluk deg on nim, o Babel etman di kwe su kwe wereg on mundoho enowarukwag ulug enggikmu febag on hun Ariokh anyo akit lebagdeg hweag-utuk kwit de, “Haren de ap enenda wenggeleg enap mel ne di wene su wene enoluk deg on mel etma enowaruhun hayog. Ite an den at raja en a hauk hag fam hasi on etma ebe diroho aruhu ale fahet hauihin ulug an den hweag-itmin en de, an hondog naplug at raja ebe wereg ma dam lakin,” ulug hweag-etfag.

²⁵ Airoho hweag-etfag ma re at Ariokh en de Daniel ebe folo-folo hondoholug de raja akit lebagdeg hweag-utuk kwit de, “Nakni. An de ap homi Yehuda on enenggik hetdoho og-eneplug waharuhuk on omano misig eke en hat ha hag fam hauihin ale anyo, ebe diroho aruhu ale fahet hauihin ulug higitdoho hweag-hom alereg on hweahakireg hakit hondoholug wahi,” ulug hweag-etfag.

²⁶ Ai ebag ma raja en de at Daniel unuk eke Beltsazar uruk katfag on anyo fam uruk kwit de, “Haren an na hag fam hauihik ale ai higitdoho hweag-nereheg, ebe diroho aruhu ale fahet hauihin ulug de katogdoho hweag-nerehen halereg a?” ulug hein og-hebag.

²⁷ Airoho ebag ma at Daniel en de, “Nakni ap enenda wenggeleg lit di wene su wene enoluk deg on mel, ap hwal ahun di ale su ale nik ale duruk on mel, ne ap wene fobik aruhu ale ulug hweag-esauk on mel, it ap sohwalanggen awene enoluk deg on mel, en hat ha hag fam amuroho hauihin on ai fahet, ebe diroho aruhu ale fahet hauihin ulug hweag-hom fug alereg.

²⁸ Famen de At Allah boholma along wereg on en neg de di wene su wene aheraho wene enamoho hweag-esa alereg. Degma re hweag-hirik.

²⁹ Hat hebe nohoruk kahenma wereg lit, wene o fobik eta wereg lit aruhu ale fahet hauihin. Allah en di wene su wene enamoho hweag-esa alereg ai en de, wene fobik aruhu ale fahet hauihin on aire haren fu howag ulug unug-hasimu fu hauihin.

³⁰ An den hat ha hauihin on fobik aruhu ale fahet aheraho ale hauihin on ai fahet Allah en enamoho hweag-nitsi mu hweag-hitmin on aire, ap enenda mun wenggeleg neg deg enap etman duk fug alereg famen de, an de nenda mundoho hebeleg lit di wene su wene noluk deg en hweag-hitmin fug. We hat ha hauk hag fam hauihin on ai fahet, ebe diroho aruhu ale fahet hauihin ulug hweag-hutuk mu, furebelug duhun en de Allah en hweag-nitsi mu hweag-hitmin.

³¹ Nakni hat ha hauk hag fam hauihin on aire ebe diroho fahet boruk kahi. Hat holohotma ap ahut ilitdeg angge misig eke wereg ma fu hauihin on aire ebe humon famen de orohole fam de helag-felag angge duruk kwit mun namelmeldoho deg ma hauihin.

³² Ahut ilitdeg ai unggul owag de emas ebe on fam ilitdeg latsi, ne enggik inim amig inim de perak on fam ilitdeg latsi, obahare inim ahabi inim de tembaga on fam deg latsi.

³³ Aireg ma re aho mel ahain anggen mel de bosiemanggen on fam deg latsi, ne ahoman eyog angguli fam de bosiemanggen on fam ne angguli fam en eyog sehelet fam de kwenang dangge on fam ilit deg latsi ai.

³⁴ Airoho deg ma nakni haren hil furegman de helep humon misig eke ap homi elel ha fugmen de dom ilmu en imbiloho wambik waharuk kwit ap ahut ilitdeg anyo owag bosiemanggen fam en mel ne kwenang dangge on fam en mel fam ilitdeg on anyo lilibugdoho fesimu dukom durukmu hauihin ai.

³⁵ Airoho atuk kwit de etano li em neg de ap ahut ilitdeg bosiemanggen on mel, kwenang dangge mel, tembaga on mel, perak on mel, emas on mel, etmano luluhun-lalahandoho kabog uruk kwit de, o hebi li em ap homi en gandum anggen loldukmu ahe wilipukmu hol en firoho walug lauk ai hag walug laukmu obalma etano wereg fug mu hauihin ai. Famen de helep ap ahut ilitdeg on warik wahasi on anyo re ebe humon dom hagdoho laharuk kwit de di obam su obam sebeleg wereg ma hauihin ai.

³⁶ Hat ha og-hauihin alere airoho ai. Ne, ketiare an hamingming angge en ha og-hauihin on ai fahet ebe diroho aruhu ale fahet ha og-hauihin ulug hweag-hitmin.

³⁷ Hunuk bogdeg welahen on nakni. Hat hebe re ap homi di obam su obam enowesi raja wereg on etmano enobahet enowe raja welahen. Airoho welahen ale aire Allah at ebe boholma along wereg on en hat hebe raja welaheg, halong on welaheg, homamne on welaheg, ap homi en hanggiluk boruk kamag ulug hobahakeg disimu welahen.

³⁸ Ne, At Allah en de nakni hat hobam ap homi enebe wereg kwe mel, suwe bak di angge su angge amu on wereg kwe mel, etma sebel-enusug lamag ulug og-hitsi ai. Ne, ap ahut ilitdeg ai en unggul owag emas on ilitdeg aire nakni hat hebe at.

³⁹ Famen de haren melal-enepuk kwit welahen on ai eleg atuk kweleg de ap raja eke hat halong welahen eta hag de fug we along dot deg on inaruhureg welaruhu. Ne, hit henebe biren raja welamuhupdeg eleg atuk kweleg de ap ahut ilitdeg obahare tembaga on aire ap raja eke inaruhu. Airoho inaruhureg wereg ma ap homi kwenangma di obam su obam at along apma welamuhup.

⁴⁰ Ap raja enebe henahan eta unduhuk latlug eleg atuk kweleg fobik enombolim de ap eke raja mun omamne on bosiemanggen hag on eke inaruhu. Airoho inaruhureg bosiemanggen en di on su on sereleheg, sahaleheg, duruk ai hag de ap raja ohwaneg on inaruhu on ai en de it ap atam melal-enepuk kwit welamuhup on etma lilibug-lalabagdoho fesehu.

⁴¹ Hat de ap ahut ilitdeg ai eyog mel, eyog sehelet mel, bosiemanggen on mel, kwenang dangge on mel, seberoho fam ilitdeg ma hauihin on aire, ap henahan raja welatlug eleg atuk kweleg fobik wereg lit melal-enepuk karuhu men fobik en enebe minggit amuhup. Famen de haren ap ahut ilitdeg on eyog ai bosiemanggen omamne on mel kwenang dangge haro on mel fam seberoho fam ilit deg ma hauihin on ai en melal-enepuk karuhu on aire omamnereg welaruhu.

⁴² Ne, haren ap ahut ilitdeg on eyog sehelet foma fil bosiemanggen on fam mel, ne foma fil kwenang dangge on fam mel, fam ilitdeg ma hauihin on aire, ap raja misig on en melal-enepuk kwit weregman fobik minggit amuhup on aire eke bosiemanggen omamne on hag welamuhup. Ne, ekere kwenang dangge on hagdoho enomamne elegdoho welamuhup.

⁴³ Bosiemanggen on mel kwenang dangge on mel seberoho ilitdeg ma hauihin on aire it ep raja etman enalong wereg on amul ulug homi hesangge-besangge og-enepuk kamuhup. Famen de bosiemanggen on mel kwenang dangge on mel misigmu seberuk fug alereg ai hag de ap raja etman airoho duhup famen de we alemaroho neg duhup.

⁴⁴ Aireg famen de it ap raja atlug ap homi sen-enusug lamuhup li em etare Allah boholma along wereg on en ap eke raja mundoho-mundoho welaruhu on unduhuk fohu. Airoho unduhuk fohumu re ap homi At apma wereg ma re, ap homi enunggul unuk eke en at along elehap debelug raja ai obalma inaheg duhup fug. Airoho unduhuk wereg lit de aren ap eke raja inatlug wereg lit ap homi enapma fahat enusug lamuhup on etma mun lilibugdoho elehap debesehu.

⁴⁵ Nakni. Haren helep misig eke ap homi en elel ha fugmen helep ilmu en amu imbiloho wambik waharuk kwit ap ahut ilitdeg ai bosiemanggen mel, tembaga mel, kwenang dangge mel, perak on mel, emas on mel, fam ilitdeg angge ai sebelik wambik waharuk kwit luluhundoho forukmu hauihin fug ulug a? Airoho durukmu hauihin ai. At Allah omamne humon ai en wene ebe fobik aruhu ale fahet hat hil fu howag ulug unug-heasimu hil fu hauihin nakni. Hat ha og-hauihin aire demdoho hauihin mu re, an den de ebe fobik aruhu ale ai fahet hweag-hirihi angge re hat hendaman demdoho ulug beiyug,” ulug hweag-etfag.

Raja en Daniel onggo og-etfag wene

⁴⁶ Airoho hweag-etfag ma re hun Raja Nebukadnezar anyo Daniel apma elenggen kwenangma dimirebelug orohole belabeg sahaun uruk kwit mot-debagdeg aren it autsi etmano hweag-esauk kwit de, “Daniel mot-deberuk kwit wam domba eke waroho foruk kwit de di angge su angge amben fano angge mel yaluhup,” ulug hweag-esebag.

⁴⁷ Airoho hweag-esebagdeg Daniel hweag-utuk kwit de, “Daniel ao, ap homi we elalin on fahet ilah ulug apne wauk on aire we alemaroho. Famen de hat hakni Allah ai neg de mun leho on wereg. Ap raja-raja en ap homi enapma fahat enusug wereg on etma re At apma neg wereg. Haren de wene heraho ale ai fahet ebe diroho aruhu ale fahet hauihin ulug enamoho hweag-nerehen ai fam de Allah en di obam su obam wene heraho on ohore enamoho hweag-esauk ulug furebehi,” ulug hweag-etfag.

⁴⁸ Airoho hweag-etfagdeg Daniel ebe ap kain on unduhuk welamag ulug febag. Unduhuk febagdeg di angge su angge fano on humdoho og-ereheg, it ap enenda wenggeleg on at raja obam welatfag on etmano enobahet enowe welamag ulug unduhuk feheg, o propinsi Babel etma fam gubernur welamag ulug unduhuk feheg, debag.

⁴⁹ Famen de at Daniel en raja fam diroho ulug heng ebag aleroho re ap homi o Babel fam etma di kwe su kwe welatfag on fahet enowesi welamag ulug de at Zadrak mel, Mesakh mel, Abednego mel, unduhuk fesebagdeg de at Daniel neg de raja obam ebe wereg ma etma welamag ulug hweag-etfag.