DANIEL 11 - ALLAH WENE FANO WENE

¹ “At ai en de at Darius o Media on ai melal-enepuk li em tahun keram on ai fam an let-nabeheg, nalong bal-nabeheg duruk katsi on.

² Ne, an den uruk kahi on etma re demdoho on neg uruk kahi,” isi. Airoho isireg Malaikat anyo en uruk kwit, “Raja amu on enebe henahan on en o Persia fam etma melal-enepuk kamuhupmen de it enombolim de raja ohwaneg on aire it eta hareg kweleg at neg enggik dungon deg laruhu. Airoho deg lit de at ebe along omamne atil laheg, dung aheg, dil lauk karuhureg ambiangma en de kerajaan Yunani on nim enomamne wal-wal amuhup.

Kerajaan Mesir inim kerajaan Siria nim aruhu ale ulug ebag on

³ Airoho duhupmen de raja mun neben-heben on eke enam aik waruhureg de aren kerajaan humon fam melal-enepuk kwit at enda bolug neg duruk karuhu.

⁴ Famen at along wereg ale anyo hum atuk kwit etare kerajaan aren on anyo minggit atuk kwit yohwandoho ohwan aruhu. Airoho aruhu mu re raja at ahain elekwe on fugmen amu on en at obalma melal-enepuk kamuhup famen it de at omamne welaruhu eta hag deg lamuhup fug.

⁵ Raja o selatan fil on aire mundoho omamne on aruhu. Famen at autsi sehen foroho on enowe panglima misig eke neg de at omamne maben deg kweleg omamne on aruhureg aren kerajaan mun humon eke melal-enepuk karuhu.

⁶ Airoho welaruhumen tahun nunggwe en hagdoho welatlug raja o selatan fil melal-enepuk karuhu on aire raja o utara fil melal-enepuk karuhu on nim seberuhupdeg at ahaloho anyo re hun raja utara on fam lomborebehu. Famen it enebe misig seberuhup on aire anunuroho welaruhu fug, ne hwele ai oho ebe waruhup, ne ahun mel omalik mel oho enowaruhup neg, ai en amingming angge at hondoko feik lahup on oho enowaruhup neg.

⁷ Eta airoho duhupdeg il eke welatlug ap hwele anyo ahain elekwe on misig eke raja inaruhu. At inaruhureg de tentara o utara fil wereg on anyo fam dog sinalik kweheg, ai en helep huhulowag wirig on houwag eseheg, dulug enalong elehapdoho fohu.

⁸ Eta li em de at ebe sombandoho o Mesir lauk kwit, aren it aselei on enanggembu dewa ahut ilitdeg mel, iren dewa fam enangge emas, perak on fam hilinggig angge og-utswa on mel hwelalug lahu. Airoho lahureg de tahun nunggwe en hagdoho eta fam de aren raja o utara fil wereg on ai nim weim yabuhu fug.

⁹ Ai en raja it utara fil on fahet welaruhu on ai en de selatan fil on fahet welaruhu on anyo fam bin kwik waruhu famen de at ebe yeik waroho mon-hahupmu re onggwareg anggwenang on fam nikangge lahu.

¹⁰ Airoho duhumu re it raja utara fil on fahet wereg on anyo omaliki weim yapul en ulug fik-fouk duhupdeg tentara esan humon lohwaluhup. Airoho duhupdeg iron eta ap misig eke aire ik fu waharuk kwit duruk hagdoho kwik waruhu. Airoho kwik waharuk kwit de biren angge bin kuruk kwit it aselei on en enobam hembit angge helep huhulowag wirig on etmano meiyalik waruhu.

¹¹ Airoho duhumu re raja o selatan fil fahet wereg on anyo olok aruhureg, aren weim aegma aik lalug raja utara fil on nim dog abuhu. Airoho duruk kwit aren it utara fil tentara humdoho raja en lit-enebuhu on etmano enalong elehapdoho fesehu.

¹² Airoho debehureg at onggwareg en de an naselei on humdoho enowareheg, enalong elehap debeseheg dihi ulug awonog aruhu, famen at ebe along wereg lit neg welaruhu fug.

¹³ Ai en enggik bireneg angge raja utara fil on anyo en ap sehen foroho on esan humon, atam on horog maben hag famen we mun humon lohwale fesehu. Airoho debesehureg li higit aik waharuk halug de aren tentara esan humon anyo mel it enalili angge humdoho etmano nim wamuhup.

¹⁴ Mu re ap homi humdoho en raja selatan fil fahet wereg on nim ning-ning amuhup. Ne, hat Daniel hunggul unuk on fomane enolok on en ohore iren ena og-hauk hag fam hahupdeg ning-ning ale uhup. Famen iren ambiangma higitdoho duhup fug.

¹⁵ Ai en raja utara fil on anyo en de o helep wiroho kwelabeg on eke maserik lahureg delik kuhu. Ne, tentara selatan fil en hambuk halug kahaluk fuk aleroho aruhu, ne ap sehen seneg enap mun memereg enap en ohore inim weim yabuk fug ale aruhu.

¹⁶ Raja o utara fil on ai en de ap inim weim yabuk fug aleroho we at enda bolug ale neg duruk karuhu. Aren de kwenang orohole fano on fam omano sebelik kuhureg de at along apma sebeloho welaruhu.

¹⁷ Airoho dulug raja utara fil on anyo en o selatan fil bin kwimin ulug autsi tentara fik-fouk debesehureg, aren it aselei on enanggwenang fam etma mundoho sebelmin ulug de aren at eke ahaloho inim lomborebehu on anyo nim de raja Mesir on anyo nim enele seberoho maruhup; famen aren duhuk ale ulug maruhu on aire ambiangma higit aruhu fug.

¹⁸ Airoho duhureg de aren it enunggul unuk ik laut elan kwe wereg on etma fam dog sinalik lahureg enebe humdoho enalong elehap debesehu. Famen de ap o dagma on melal-enepuk on eke en, ap en al belesimdoho fohu on ai bale fohu, ne aren belesim ware fesehu on ai ambiangma airoho debesehu

¹⁹ Raja utara fil on anyo re sombandoho onggwareg en obam helep huhulowag wiroho kwelabegma etmano waruhu, famen at ebe along elehapdoho fohupmu at ebe abug eke uhup fug.

²⁰ At obalma re raja misig eke autsi pegawai fam de ele omamneroho kerajaan ai fam di angge su angge wereg neg deg lamag ulug pajak enele omamne fam kabog-dukwag ulug hweag-esakiek uruk karuhu. Airoho duruk karuhumen de il dorangge welatlug raja ai ebe enameg mel fug ne weim ambiangman oho fugmen ebe ling-long waruhup,” isi.

Raja utara fil on fahet mun olok on inaruhu ebag on

²¹ Malaikat anyo en nikangge ele uruk kwit, “Raja ombolim on utara fil etma fahet inaruhureg welal-enepuk karuhu on aire mun sebeleg on raja am fug on inaruhu. Famen de at ebe wenggeleg elegman fetagdoho waruhureg ele en laloho raja welatmin ulug inaruhu.

²² Tentara enebe humdoho en mel, ne Imam Agung en mel at along elehapdoho foul ulug duhup on etma re aren mun felelengdoho elehap debehu.

²³ Aren de sali it enunggul unuk amu on mel horog ket waruhup on etmano dahan debehu. Ne, aren de kerajaan doron fam melal-enepuk karuhu famen de at omamne wereg on atuk karuhu.

²⁴ Ne, hwena fam de ap homi etma wereg on enakol elegdoho wereg kweleg it enanggwenang mun hesilig kwe etmano huhul kuruk karuhu. Aren de it ombasi en oho duruk katswa fug on etmano duruk karuhu. Airoho duruk kwit de at enggik leko duruk on etmano fam de di angge su angge weim ambiangman huhul wauk on etmano yohwandoho og-esauk karuhu. Aren de o helep huhulowag wirig kwe etmano dog sinalik kwimin ulug meneni ebetuk kwit duruk karuhu, famen at melal-enepuk kwit wereg ale fahet li mundoho eleg aik lahu.

²⁵ Ai en de at ambong si-seroho tentara esan humon kabog-duhureg, at raja selatan fil wereg on anyo autsi tentara esan humdoho mun enomamne on nim en at nim weim yabik laul ulug fik-fouk debeseruk kweleg dog sinalik kuhu. Famen de raja selatan fil fahet on aire at yomaroho duhumu re at ebe hambuk hahu fug.

²⁶ It ap wene komoroho hweag-utuk on at ebe nim horogdoho wereg on en de at yoma-debehup. Ne, at autsi tentara enebe humdoho enowareheg, mun feleleng debeseheg, duhup.

²⁷ Airoho debelug de it raja birenet e doaleg misig on alukwema hweriatlug nauk kamuhup, famen it enendama re weim abug foroho lit lal-lal atuk kwit duhup. Famen de li horog aik waharuk fug mu re iren dul ulug duhup on aire we suhwi aruhu.

²⁸ Airoho dulug de raja utara fil fahet wereg on anyo re angge huhul angge hwelahu on etmano hohouk dalug de obam indipmu lahu. Aren de wene it Allah omaliki en wauk on anyo elehapdoho femin ulug duruk karuhu. Aren de enda boruk ale neg duruk kwit de obam indipmu nikangge lahu.

²⁹ Airoho lahureg il eke welatlug, aren nikangge o selatan fil anyo fam dog sinalik lahu. Famen airoho duhu on ai ambiangma re keram on fam duhu hagdoho re fug mun amuroho duhu.

³⁰ Aire it ap Roma enap de enangge kapal fam o Siprus en watlug at ebe nim dog yabik wamuhupmu at ebe akol neg aruhureg duhu. Airoho duhureg de at ebe ahummu olok fam sombandoho obam lahureg aren de it Allah omaliki en Allah mot-duruk ale ai elehapdoho femin ulug duruk karuhu. At de it ap fomane Allah mot-duruk ale ai fam en sombandoho wilibik lausa on etmano en komoroho hweag-utuk ale omano holug duruk karuhu.

³¹ Airoho duruk kwit de aren ap sehen seneg enap esan o Tuhan Obam wirig on anyo emere foukwag ulug mon-enebik lauk karuhu. Airoho mon-enepukmu re iren de wam di angge su angge nukoho hundig-hundig waroho og-utuk on anyo elehap debelug de mun namelmel on unuk mun siag on nalduk on uruk on ai duruk kamek ulug unduhuk foruk karuhu.

³² Airoho durukmu re raja anyo amenggel fam de it ap Allah mot-duruk on anyo embeselug wilibuhup on etmano at let-duruk kamag ulug enendama kwelapuk karuhu. Famen it Allah fam ele holoho duruk on de at ele sahale folug duruk kamuhup.

³³ Ap enenda wenggeleg on en ap homi melal-enepuk on en ap homi humdoho en furebelug dukwag ulug duruk kamuhup. Famen il eke fam de it eta enesahalimu en de foma indok fam ane, ite dog ambiangman ane enowaruhup, ne fomane eke re sen-enebuhup deg sabu het eneplug lahup.

³⁴ Airoho duruk kweleg ap enowatuk ale aire enowatuk kwit neg welamuhup, ne it Allah omaliki on de dorangge eke let-enebuhup, famen de ap homi humdoho re it enonggwareg enamu fahet-dauk on etmano fahet de ininim seberuruk kamuhup.

³⁵ Ne, it foma enenda wenggeleg on etmano enowaruhupmu waramuhup, famen aire ap homi Allah omaliki fahet enabut bal-enepuk hag aruhu mu re it enebe demdoho on anyo enam aruhu. Airoho neg duruk men de o ahae fotog ik lahu, aire nukoho At Allah en momaloho fesi salim anyo aruhu.

³⁶ Raja utara fil on anyo en de at endama boruk ale neg duruk karuhu. Airoho duruk kwit awonog fam aren uruk kwit, ‘Dewa amu on oho wereg famen, ne Allah Mun Leho on ai wereg famen, an neg de mun humon welahi,’ uruk karuhu. Aren de airoho neg uruk kwit weregman de Allah en olok anyo mundoho ahaebog aik lahu. Aire Allah en duhuk ulug foukdoho fesi on aire mundoho aik lahumen duhu.

³⁷ Raja en de it ombasi en dewa apne wauk katswa on fam ulug oho, ne dewa it homi en on fam ulug oho holoho duruk karuhu fug. At onggwareg en boruk kwit, at neg de humon ne it maben deg boruk kwit de dewa etma fahet fubi debeseruk karuhu fug.

³⁸ Aren ahamdoho re dewa it ombasi en oho apne wauk katswa fug on, dewa ahelep lehet along baloho wereg on anyo apne wauk karuhu. Airoho duruk kwit de aren emas, perak, permata mel ne foruk angge amu on mel, dewa it ombasi en oho apne wauk katswa fug on ai fam obahet folug og-utuk karuhu.

³⁹ Aren de ap dewa bohon fam apne wauk on omano momal-eneplug de helep huhulowag omamneroho oho on etmano luluhun dik lowag ulug duruk karuhu. Ne, ap sa en dewa ai demdoho ulug fak duruk halug, onggore enalong bolug leho feseheg, yabuk lehoma on og-eseheg, ne onggo ulug kwenang og-eseheg, duhu.

⁴⁰ Airoho duruk karuhumen raja utara fil fahet wereg on anyo at along wereg ale mundoho ambiangma aik waharuk li em etare, at raja selatan fil fahet wereg on en dog sinalik lahu. Airoho duhumu re raja utara fil fahet wereg on anyo en oho onggo dog sinalik waruhu mu re weim aire mun nik aleroho yabuhup. Aren de kereta dog yabik lauk on mel, kuda mel, kapal mel lit esalug, aren de ik fu waharuk kwit duruk hagdoho kuruk kwit de o kwenang humdoho fene sebeldil lahu.

⁴¹ Ne, kwenang orohole fanoma famen ohore bin kuruk kwit ap enebe humdoho deng biren henahan ribu en hagdoho enowaruhu. Famen de kerajaan Edom mel Moab mel, ne kerajaan Amon fam il mun leho fil etma mel de enahap wendat-amuhup.

⁴² At ai en kerajaan eta fene huratil lauk li em de kerajaan Mesir oho lil aruhu fug.

⁴³ Aren de it Mesir on enangge emas, perak mel ne enangge onggo along angge fomane mel, del dahu. Airoho durukmu re at de ap o Libia on mel Sudan on mel en let-duhup.

⁴⁴ Airoho duhupmen de wene timur fil en mel utara fil en mel de at youk wilibuhup. Mu re aren weim oroholanggen siagdoho yabuhureg ap humdoho enowatil lahu.

⁴⁵ Airoho dulug aren de kerajaan ai fam o sabo kemah re ik laut dulug dom o Tuhan Obam wirig dulug etma saluhu. Famen fobik en at ebe wararuhu mu ap homi misig en oho eke at let-duhup fug,” isi.