Israelfɔ Ɩlʋ 9 - Bulu Ntam Pɔpwɛ mʋ́a Israel Ɩlʋ

Nana Bulu Gyi Ɔtanʋkpa Yile

Dawid kanfʋ-ɩlʋ ha ɩlʋ osunapʋ. Bɔ́pʋ obi-lowu ɔmɛ wa mʋ́.

¹ Nana Bulu, nɛ́kanfʋ fʋ tsu mɩ ɩklʋntɔ. Nɛ́bla aha ofula akpɔnkpɔntɩá fabwɛ fɛ́ɛ́.

² Fʋ sʋ ansɩ bɛ́hɩɛ gyi mɩ. Ɔsʋsʋʋsʋ Mʋ Wie, nɔ́wa ɩlʋ kanfʋ fʋ ɩda.

³ Mɩ alupʋ bowun fʋ bʋteyinki ɔma, dɩda wu,

⁴ tsufɛ asʋn ogyipʋ ɔnɔkwalɩpʋ fʋgyi. Fatsia fʋ obiasʋ, gyi mɩ asʋn wanklaan ha mɩ.

⁵ Bulu, fawa ɩyɩn wa ɔmá ánɩ́ bʋmeyin fʋ. Faha lalahɛ abwɛpʋ bata, tsitsi amʋ́ ada lɛ ɩnʋ plɩplɩplɩ.

⁶ Anɩ alupʋ klɛtɔ lata fɛ́ɛ́. Fabwie amʋ́ awulu fɛ́ɛ́. Bʋmɛ́ɛtra tɩ amʋ́ ada ɛkɛkɛɛkɛ.

⁷ Tamɛ Nana Bulu tsie brɛ fɛ́ɛ́. Alayaɩ mʋ obia ha asʋngyi.

⁸ Obégyi ɔyɩtɔ aha fɛ́ɛ́ asʋn mʋ́ ɔkpasʋ. Obégyi ɔmá fɛ́ɛ́sʋ ɔnɔkwalɩsʋ.

⁹ Nana Bulu gyi ɔtanʋkpa kinkin ha aha ánɩ́ bʋdɛ amʋ́ hɩɛ. Ɔtanʋkpa kinkin ogyi ha aha ánɩ́ bawie ɩkplantɔ.

¹⁰ Oo Nana Bulu, aha ánɩ́ bʋyin fʋ ɩda bʋtɔpʋ ansɩ dɩnka fʋsʋ, tsufɛ fʋtamatswɛ fʋ adunkapʋ kpʋkpʋ.

¹¹ Mlɩwa ɩlʋ kanfʋ Nana Buluá otsie Sion! Mlɩda mʋ atɔ bwɛhɛ fɛ́ɛ́ ɔkan ɔmágyiɔmátɔ.

¹² Tsufɛ mʋtɛka ɔha ánɩ́ alawa ɩbɩ obugyatɔ ɩkɔ. Ɔtamakina ipian awunpʋ isu nu.

¹³ Oo Nana Bulu, wun mɩ nwɛ! Kɩ alɩá mɩ alupʋ bʋdɛ mɩ ipiantɔ wa! Fʋtɛlɛ mɩ tsu lowu ɔbɔnɔ,

¹⁴ mɛnɩ nɛ́kanfʋ fʋ Sionfɔ ofiakpa. Ansɩ bégyi mɩ, tsufɛ fahɔ mɩ nkpa.

¹⁵ Ɔmá-ɔmá bakpawie amʋ́ ɔbɔ kwihɛtɔ. Amʋ́ onuto ayibi fɩnɩhɛ lalɛ amʋ́.

¹⁶ Nana Bulu lalɛ ɩwɩ suna tsʋn mʋ asʋnbua ɔnɔkwalɩtɔ. Aha lalahɛ amʋ onuto ɩbɩ ɔnɔ gyumagyihɛ lalɛ amʋ́. Mlɩfʋlɩ ɩkpɛ amʋ kʋklʋ. Ɩya.

¹⁷ Afulitɔ ɩda gyo ɔmá lalahɛ pʋ́ Bulu akisipʋ fɛ́ɛ́.

¹⁸ Tsufɛ fʋmɛ́ɛtan ahianfɔsʋ brɛ fɛ́ɛ́. Ipian awunpʋ ɔkpakɩ ɛ ɩmɔ́ɔbwɛ kpalɩ ɛkɛkɛɛkɛ.

¹⁹ Oo Nana Bulu, kʋsʋ! Máha nyankpʋsa ɔwa ɔkpayi fʋ ansɩtɔ ɔbɛɛ, magyi ɩsʋ. Ɔmá-ɔmá bʋgyi ɩpɔn fʋ ansɩtɔ!

²⁰ Oo Nana Bulu, pʋ ifu wa amʋ́tɔ, abʋbɩá anyankpʋsa kɛkɛ bʋgyi. Ɩya.