Filipifɔ 3 - Bulu Ntam Pɔpwɛ mʋ́a Israel Ɩlʋ

Yesu Lowu Hɔ Anɩ Nkpa

¹ Ɩtrahɛ a, mɩ apio, anɩ Wie sʋ mlɩnya ansigyi. Ɩmɔkʋkpɔn mɩá nɛ́tra wanlɩn asʋn kuakʋlɛ anfɩ sɩsɩ mlɩ. Igyi asʋn ánɩ́ ɩbɛ́kpa mlɩ ɛ.

² Mlɩkɩ aha lalahɛ anfɩ bʋgyi fɛ akɩaɩ anfɩ wanklaan. Lalahɛ abwɛpʋ bʋgyi, bʋdɛ aha han bɛɛ, bʋtɩn kete kpaalɩ.

³ Tsufɛ anɩ aha amʋʋ anɩtɔpʋ Ɔŋɛ Wankɩhɛ sum Bulu amʋ gyi kete atɩnpʋ onuto nɩ. Mʋ́ sʋ abɛ́talɩ tsu ɩwɩ ɩtɔ amʋʋ Kristo Yesu labwɛ ha anɩ amʋ sʋ. Anɩtamapʋ ansɩ dɩnka tɔá nyankpʋsa lapʋ ɩbɩ bwɛsʋ.

⁴ Mɩ onuto o mbʋ ɔkpa pʋ ansɩ dɩnka mʋ́ anásʋ. Nɩ ɔkʋ ɔbɛɛ, mʋbʋ ɔkpa pʋ ansɩ dɩnka mʋ́sʋ a, mɩ mboun bʋ ɔkpa pʋ ansɩ dɩnka mʋ́sʋ dʋn.

⁵ Tsufɛ bɔkwɩɩ mɩ, tɩn mɩ kete ɛkɛ kwesɩ. Israelyin ngyi. Benyamin abusuantɔ notsu. Mʋ́ sʋ Hebriyin onutonuto ngyi. Mose mbla amʋsʋ gyi ɔkpasʋ ɛ a, Farisiyin ngyi.

⁶ Nɛhɩɛ wa nsi, dɩnka Kristo ɔpasua amʋsʋ. Negyi Mose mbla amʋsʋ wanklaan, ɔlala metsia mɩ ɩwɩ.

⁷ Tamɛ ntobi anfɩ brɛ amʋ ntɛkɩá ɩbʋ mɩ labi anfɩ fɛ́ɛ́ a, Kristo sʋ ndɛ ɩtra megyi mɩ tɔtɔ.

⁸ Mʋ́á ɩdʋn mʋ́ kʋraa gyi, nɩ nɔpʋkɩ alɩá nɔpʋbɩ mɩ Wie Kristo Yesu a, nawun ánɩ́ ɩbʋ labi dʋn togyitɔ. Nawun ánɩ́ nahʋlɩ ntobi anfɩ ntɛkɩá ɩbʋ mɩ labi anfɩ fɛ́ɛ́, alɩá Kristo ɔbɛ́da mɩ ɩbɩ sʋ.

⁹ Ɩnɩ sʋ ɩnɩá mbʋ mʋ wa sʋ a, megyi Mose mbla amʋsʋ gyi ɔbɛ́ha négyi asʋ Bulu ansɩtɔ. Kristo hogyi mboun ɔbɛ́ha négyi asʋ Bulu ansɩtɔ.

¹⁰ Mɩ agywɩɩn gyi, ndekleá nɛ́bɩ Kristo pʋ́ tumi amʋʋ Bulu lɔpʋkʋsʋa mʋ tsu afulitɔ amʋ tsɩa. Ndekleá nówun ipian fɛ alɩá Kristo lowun ipian wu,

¹¹ mɛnɩ ɔkpagyiɔkpasʋ a, mɩ ɛ Bulu ɔbɔ́kʋsʋa mɩ tsu afulitɔ!

Srɩ Buo Kristo

¹² Mmɛdɛblɩ mbɛɛ, mɩ ɩbɩ lada ntobi anfɩ fɛ́ɛ́ ntɛ Bulu labwɛ mɩ nafʋn. Ntra ndɛ nsi wa alɩá ɩbɔ́bwɛ mɩ ɩbɩ bɛ́da tɔ amʋ sʋ amʋʋ Kristo Yesu ɩbɩ lada mɩ amʋ.

^13-14 Mɩ apio, mmɛdɛblɩ mbɛɛ, mɩ ɩbɩ lada mʋ́. Ndɛ mʋ́ amʋʋ ɩdɛtsʋn amʋsʋ tan. Mʋ́á ɩda mɩ ansɩtɔ ɔkpa ngya. Mɩ ansɩ lapɛ, mɛnɩ nénya siadɩɛ amʋʋ Bulu ɔbɔ́tsʋn Kristo Yesusʋ tɩ mɩ nɔ́yɛhɔ mʋ wa ɔsʋsʋ amʋ.

¹⁵ Ilehian ánɩ́ anɩ aha amʋʋ anɩladan hogyitɔ amʋ fɛ́ɛ́ abɔ́hɔ alɩ asʋn anfɩ. Nɩ ɩkʋ mɔwankɩ mlɩ a, Bulu ɔbɔ́wankɩ mʋ́tɔ suna mlɩ.

¹⁶ Tamɛ mlɩha akɩta ɔnɔkwalɩ amʋʋ Bulu lasuna anɩ amʋtɔ.

¹⁷ Mɩ apio, mlɩkasɩ mɩ tsiatɔ. Mlɩkasɩ atɔ tsu aha amʋʋ bakasɩ anɩ tsiatɔ amʋ wa.

¹⁸ Tsufɛ ntetsia bla mlɩ asʋn anfɩ. Napʋ ntsú ntra ndɛ mlɩ bla mbɛɛ, aha tsɔtsɔɔtsɔ tsiatɔ losuna ánɩ́ Kristo oyikpalihɛsʋ lowu amʋ alupʋ bʋgyi.

¹⁹ Aha anfɩ bɛ́hɩ. Amʋ́ apu gyi amʋ́ Bulu. Amʋ́ numnyam ɛ gyi pɛlɩ. Ɔsʋlʋsʋ atɔ ɩwɩ pɛ bʋtosusu.

²⁰ Tamɛ anɩ mʋ́ a, ɔsʋsʋ gyi anɩ otsiakpa. Ɔtɩnɛ amʋʋ anɩdɛ anɩ Ɔhɔpʋ, ogyi anɩ Wie Yesu Kristo ɔkpa kɩá obótsu ba amʋ.

²¹ Mʋbʋ tumi, otegyi togyitɔsʋ. Mʋ ɔbɛ́ba bɛtsɛ anɩ ɔyʋlʋ wuhɛ anfɩ, bwɛ mʋ́ fɛ mʋ numnyam ɔyʋlʋ amʋ.