Marko 8 - Bulu Ntam Pɔpwɛ mʋ́a Israel Ɩlʋ

Aha Mpɩm-na Atogyihɛ Ha

¹ Nkɛ amʋtɔ a, ɔdɔm kpɔnkpɔɔnkpɔntɩ bɛtra befia Yesu wa. Amʋ́ atogyihɛ lɛta. Mʋ́ sʋ Yesu lɛtɩ mʋ akasɩpʋ, bla amʋ́ ɔbɛɛ,

² “Aha anfɩ asʋn dɛ mɩ nwɛ wa. Ndɛ ɛkɛ sasɩ ɔpá bʋbuo mɩ. Bʋtra bʋma tɔtɔá bégyi.

³ Nɩ nɛ́ha amʋ́ bɔpʋ akʋn natɩ bɔyɔ woyi a, ansɩtɔ béyebi amʋ́ ɔkpatɔ, tsufɛ amʋ́tɔ akʋ ɔkpa bʋ ɩfɔ.”

⁴ Mʋʋ akasɩpʋ amʋ bɛfɩtɛ mʋ bɛɛ, “Nkʋnʋ abénya atogyihɛ ha aha anfɩ fɛ́ɛ́ bégyi mwɛ ɔsʋlʋkpan anfɩsʋ.”

⁵ Yesu lɛfɩtɛ amʋ́ ɔbɛɛ, “Bodobodo afɩnɩ mlɩbʋ?” Bɛlɛ mʋ́ ɔnɔ bɛɛ, “Asienɔ.”

⁶ Yesu lɛha ɔdɔm amʋ betsia ɔsʋlʋtɔ. Mʋʋ olotsu bodobodo asienɔ amʋ, da Bulu ɩpan, olebiabia mʋ́tɔ ha akasɩpʋ amʋ beye mʋ́ ha amʋ́.

⁷ Bʋbʋ ntsutso iye bwahɛ kpalobi kʋ ɛ. Yesu loyula mʋ́sʋ, ɔlɔpʋ mʋ́ ɛ ha akasɩpʋ amʋ beye ha amʋ́.

⁸ Amʋ́ fɛ́ɛ́ begyi mwɛ. Akasɩpʋ amʋ bɔtɔsɩ isianhɛ bʋla alakpa yile asienɔ.

⁹ Aha amʋ bɔ́bwɛ fɛ mpɩm-na (4,000), Yesu lesi amʋ́ ɔkpa.

¹⁰ Ɩnʋnʋ mʋa mʋ akasɩpʋ bɔdʋ wie ɔklʋntɔ ba Dalmanutafɔ ɔsʋlʋsʋ.

Farisifɔ Bodunka Ofula

¹¹ Farisifɔ bonuá Yesu laba ɩnʋ, bɛba bʋdɛ mʋ asʋn fɩtɛ. Bɛbla mʋ bɛɛ, ɔbwɛ osuna pʋsuna amʋ́ ánɩ́ lɛlɛ otsu Bulu wa.

¹² Yesu lɔlʋn ɔŋɛ fʋ. Mʋʋ ɔlɛfɩtɛ amʋ́ ɔbɛɛ, “Ntogyi sʋ mlɩ ndɛmba-abi mlɩdɛ osuna dunka amlɩwun? Mbla mlɩ ɔnɔkwalɩ. Mmɔ́ɔbwɛ osuna kʋkʋ suna mlɩ!”

¹³ Ɩnʋ ɔlɛnatɩ si amʋ́ yɔ dʋ wie ɔklʋntɔ, fa ɔpʋ amʋ yɔ mʋ́ ɔbɩn.

Farisifɔ Pʋ́ Owie Herode Bodobodotu-afa

¹⁴ Yesu akasɩpʋ amʋ bʋmɛkaɩn tsu bodobodo kɩta. Ipin kʋlɛ pɛ bʋ ɔklʋn amʋtɔ.

¹⁵ Brɛá bʋdɩn ntsu amʋsʋ bɔyɔ a, Yesu lɛda amʋ́ ɔla ɔbɛɛ, “Mlɩkɩ wanklaan Farisifɔ pʋ́ ɔmásʋ ogyipʋ Herode bodobodotu-afasʋ.”

¹⁶ Akasɩpʋ amʋ bɛfɩtɛ aba bɛɛ, “Bodobodo amʋʋ anɩmɛdɛ amʋ sʋ ɔdɛ asʋn anfɩ blɩ loo?”

¹⁷ Yesu lonu asʋn ánɩ́ bʋdɛblɩ. Mʋʋ ɔlɛfɩtɛ amʋ́ ɔbɛɛ, “Ntogyi sʋ mlɩdɛblɩ mlɩaa, mlɩmɛdɛ bodobodo? Mʋ́ sʋ ɩklʋntɔ bʋ mlɩ odwin mlɩ ɛ?

¹⁸ Mlɩ ansibi tamawun atɔ, mlɩ asʋ ɛ tamanu asʋn? Mlɩtamakaɩn asʋnsʋ?

¹⁹ Brɛá neye bodobodo apin anu ha aha mpɩm-nu (5,000) a, isianhɛ alakpa afɩnɩ mlɩlɔtɔsɩ?” Bɛlɛ mʋ́ ɔnɔ bɛɛ, “Duanyɔ.”

²⁰ “Bodobodo apin asienɔ amʋʋ neye ha aha mpɩm-na amʋ ɛ mɛ, isianhɛ alakpa yile afɩnɩ mlɩlɔtɔsɩ?” Bɛlɛ mʋ́ ɔnɔ bɛɛ, “Asienɔ.”

²¹ Ɩnʋ Yesu lɛfɩtɛ amʋ́ ɔbɛɛ, “Ɩmɔkʋwankɩ mlɩ kɩ?”

Ansibi Obwiepʋ Ɔkʋ Ansibi Bwii

²² Yesu mʋa mʋ akasɩpʋ bɛba Betsaida wulutɔ. Aha akʋ bɛkpa ansibi obwiepʋ ɔkʋ ba. Bobwii ɩpa ha mʋ bɛɛ, ɔpʋ ɩbɩ da mʋ, ɔtsa mʋ ɩlɔ.

²³ Yesu lɛkɩta ansibi obwiepʋ amʋ ɩbɩ, kpa mʋ dalɩ wulu amʋtɔ. Ɩnʋ olotu atsʋnɔ dɩnka oyin amʋ ansibisʋ, pʋ ɩbɩ dɩnka mʋsʋ. Mʋʋ ɔlɛfɩtɛ mʋ ɔbɛɛ, “Fʋdɛ atɔ wun?”

²⁴ Ansibi obwiepʋ amʋ lotsu nwun fʋa kɩ, ɔlɛblɩ ɔbɛɛ, “Ndɛ anyankpʋsa wun, tamɛ bʋgyi fɛ nyi bʋna.”

²⁵ Ɩnʋ Yesu lɛtra pʋ ɩbɩ dɩnka mʋ ansibisʋ. Oyin amʋ lobwii ansibi kɩ a, mʋ ansibi lawa alɛ, ɔdɛ togyitɔ wun wanklaan ngya.

²⁶ Yesu leyinkia mʋ sɩsɩ woyitɔ ɔbɛɛ, “Natɩ laa yɔ woyi. Mátepi wie wulu amʋtɔ kʋraa.”

Ɔha Ánɩ́ Yesu Gyi

²⁷ Yesu mʋa mʋ akasɩpʋ amʋ bɛnatɩ ɩnʋ bɔyɔ Kaesarea Filipi awulusʋ. Brɛá bʋna ɔkpatɔ a, ɔlɛfɩtɛ amʋ́ ɔbɛɛ, “Ma aha bɛɛ ngyi?”

²⁸ Bɛlɛ mʋ́ ɔnɔ bɛɛ, “Akʋ bɛɛ, fʋgyi Asu Ɔbɔpʋ Yohane. Akʋ bɛɛ, Bulu ɔnɔsʋ ɔtɔɩpʋ Elia. Akʋ ɛ bɛɛ, Bulu ɔnɔsʋ atɔɩpʋ amʋtɔ ɔkʋ.”

²⁹ Mʋʋ ɔlɛfɩtɛ amʋ́ ɔbɛɛ, “Mlɩ ɛ mɛ? Mlɩaa, mɩgyi ma?” Petro lɛlɛ mʋ́ ɔnɔ ɔbɛɛ, “Fʋgyi Kristo, (ɔha amʋʋ Bulu lada mʋ ofuli amʋ) nɩ.”

³⁰ Ɩnʋ ɔlɛda amʋ́ ɔla ɔbɛɛ, “Mlɩmábla ɔhaa mɩ ɩwɩ asʋn anfɩ.”

Yesu Ɩwɩɔsɩn Pʋ́ Mʋ Lowu Ɩwɩ Asʋn Blɩ

³¹ Ɩnʋ Yesu lefi asɩ ɔdɛ asʋntɔ lɛ suna amʋ́ ɔbɛɛ, “Ilehian ánɩ́ mɩ, Nyankpʋsa-Mʋ-Bi anfɩ nɛhɩɛ wun ɩwɩɔsɩn tsɔtsɔɔtsɔ. Yudafɔ ahandɛ, Bulu igyi ahapʋ dɛhɛn pʋ́ Mose mbla asunapʋ fɛ́ɛ́ békina mɩ bɛɛ, megyi mɩgyi Kristo amʋ. Bɔ́mɔ mɩ, tamɛ Bulu ɔbɛ́lakʋsʋa mɩ tsu afulitɔ nkɛnsa ɔma.”

³² Ɔmɔpʋ asʋn anfɩ ŋain amʋ́. Mʋ́ sʋ Petro lɛtɩ mʋ ya ɩtsɛtɔ yɛka mʋ itin ɔbɛɛ, ɔmátra blɩ alɩ.

³³ Ɩnʋ ɔlɛdamli kɩ akasɩpʋ amʋ, ɔlɔkplʋn wa Petro ɔbɛɛ, “Satan, natɩ tɛɩ mɩsʋ! Megyi tɔá Bulu dɛgywɩɩn fʋdɛgywɩɩn, anyankpʋsa klɛ fʋdɛgywɩɩn.”

³⁴ Ɩnʋ ɔlɛtɩ ɔdɔm amʋ pʋ́ mʋ akasɩpʋ ba mʋ ɩwɩ wa. Mʋʋ ɔlɛbla amʋ́ ɔbɛɛ, “Nɩ ɔkʋ dekleá obóbuo mɩ a, osi tɔá otekle bwɛ, otsu mʋ oyikpalihɛ bobuo mɩ.

³⁵ Tsufɛ nɩ ɔkʋ lɛprɩ mʋ nkpa a, ɔbɔ́hʋlɩ mʋ́. Nɩ ɔkʋ ɛ lɔhʋlɩ mʋ nkpa mɩa Bulu asʋn wanklaan amʋsʋ a, Bulu ɔbɔ́hɔ mʋ nkpa.

³⁶ Nɩ ɔkʋ onya ɔyɩtɔ atɔ fɛ́ɛ́, tamɛ ɔhʋlɩ mʋ ɔkla a, labi mɔmʋ ɩlɔwa ha mʋ?

³⁷ Ntɛ ntɔ ɔha ɔbɛ́talɩ pʋtsɛ mʋ nkpa?

³⁸ Tsufɛ nɩ ɔkʋ onya mɩa mɩ atosunahɛ pɛlɩ ndɛmba-abi lalahɛá badamli ɔma ha Bulu ansɩtɔ a, mɩ, Nyankpʋsa-Mʋ-Bi anfɩ ɛ nénya mʋ pɛlɩ brɛá mɩa Bulu-abɔpʋ wankɩhɛ amʋ anɩna mɩ Sɩ numnyamtɔ aba.”