तीतस 2 - साःरो बाचा

परमेस्‍वरए ओपाँस खैन्‍या य़ेन

¹ नँ भन्‍या थ॰रिउ पाँलाई ओज़्‍यास्‍ज़्‍याव मितावनी पैव ताके।

² सेरो मिँर माचावदा माङ़मोर, यामान नैद्यान्‍या स्‍यासोर, यातहस ल्‍योर, परमेस्‍वरए ओपाँत थ॰रिउर, नैं मेंए ल्‍योदा युँ थू जैद प़ाइँ सहिन्‍या ताव परिके लिद यासम्जैयो।

³ हो मिताव ज़ जूचासोर ब यादोज़्‍याव य़ेन भरित याधर्म रैंःवर ओतारक। अर्काए उछींनी मापाँन्‍यार, मद छोकोरात माङ़मोर, छुतलाई चाव य़ेन सिऊधुन्‍यार ओतारक।

⁴ नोराए भर्ज़ाकाव मेंमारालाई ब यारेरास खैन्‍या, याज़ारालाई पाथस नैन्‍या ओरासिऊरक।

⁵ हो वाज़ माःक, नो धामें मेंमार यातहस ल्‍योर, यारेराए सतत ल्‍योर, याझ़िम चावस चलैन्‍यार, यायुँ गराँवर, यारेराए पाँ धूँल ल्‍योर ओतारक। हो ताकिन ची परमेस्‍वरए ओपाँत पाँःच्‍या हुन्‍या माले।

⁶ हिताव ज़ भर्ज़ाकाव खेपार ब प़ाइँत ज़ यातहस ल्‍योर ओतारक।

⁷ नँ फरी नोराए याङ़ाक चाव य़ेन दान्‍यात सतैंद नैसिउ मिताव तानी। परमेस्‍वरए ओपाँलाई बरे·सी ऩिन्‍या माजैद, माबिरैद ज़ लाँव ताके।

⁸ नपाँ भरी थ॰रिउ, कान्‍त ज़ ओखत माल्‍यो ओताक। हो ताकिन ची गेकिन तँदाङावराए गेक्‍याँत काता खत ज़ मादैद याज़ थाम थुम तान्‍या लेर।

⁹ फरी नँ नो बाँदा लिज़्‍यावरालाई है यादोयो, नोर यासाहुराए पाँ धूँल लिद मारूम्‍रूमैद यासाहुराए युँलाव मिताव य़ेन दान्‍या ओतारक।

¹⁰ यासाहुराए मीं काता ज़ माछाप्‍द यादोज़्याव भरित सतस दान्‍यार ओरैंःरक। निताव याय़ेनए गेलाई बाँचैज़्याव परमेस्‍वरए ओपाँए ओसोभा हाइद्यान्‍या लेर।

परमेस्‍वरए ओअसिक

¹¹ परमेस्‍वरए गेल्‍योदा उयुँ गराँद अजम्‍बरी जुनील बान्‍या प़ाइँ मिँराए गेजूँनी रैंःद ले।

¹² परमेस्‍वरए निताव ओअसिक गेक्‍याँत उहुवए गे परमेस्‍वरकिन तँदाङाव गेमन लागिउ य़ेन भरी ऱास्‍द, आव पापी जुकल तहस लिद परमेस्‍वरए उयुँलाव मिताव चाव य़ेन दान्‍यादा गेयुँ थू जैद गेसिऊसिज़्‍या।

¹³ स़ोनो माहान गेपरमेस्‍वर, गेलाई बाँचैज़्याव येसु ख्रीसए ओज़गै मगैस ओमाहुवा पै आस दाद ओयेम चिऊव ज़ गेनैज़्‍या।

¹⁴ नो गेप्रभु येसु ख्रीसए गेलाई पापनी हाइद ओल छैंव उमींर स़ोनो ओय़ेनत युँ थू जैन्‍यार जैन्‍याए जूँनी उजिउ झाःद्यासिक्यो।

¹⁵ नँ आव है ङादींव पाँर पैद परमेस्‍वरए ल्‍योनी नदैव हकनी ख्वारालाई यासम्‍जैयो, ख्वारालाई यासिङार्‍यो। सुए ज़ नपाँ सज़िम्‍द ताईंरक।