फिलिप्पी 2 - साःरो बाचातयुँ जैद खैद लिन्या 1 जे ख्रीसस तोबो ताद जेयुँर झेंःद उलिकिन, जेल्योदा उयुँ ओझाःज़्यावनी जेस॰र होलाँ ओताव ताकिन, जेस छैंव पुरूस उलिज़्याव जेदार्सिउ ताकिन, जे जेल युँ नान्या उलिकिन, 2 जे जेल तोबो युँ तोबो क्याँ जैद प़ाइँए ज़ तोबो य़ेनत जेयुँ थू जैव ताके। हो ताकिन ची ङा मनी ङारेंतए ङायुँर होलाँ तान्या ले। 3 जे स॰द क्याँलाई वाज़ तान्या य़ेनर काता ज़ तादोच्यो। बुरू सज़िम्सिद क्याँकिन छुतलाई ओमान नैद्याव ताके। 4 क्याँए तिर वाज़ दान्या माःक, प़ाइँलाई तान्या य़ेन दाव ताके। ख्रीस उसज़िम्सिउ 5 जे प़ाइँए जेयुँ येसु ख्रीसए उयुँ मिताव ओताक। 6 नो भाःकिन ज़ परमेस्वरस तोबो ज़ निलिज़्याव। ओहक परमेस्वरस तोबो ज़ उलिदी ब नो हकलाई माकमैद, 7 ओहकलाई ऱास्द, रितो ज़ जैसिद, मिँ मिन्सिद, परमेस्वरए ओसेवा दान्या जैसिके। 8 मिँ उमिन्सिउत झन ज़ सज़िम्सिद, सिन्याक पै परमेस्वरए ओपाँ भरी दोक्यो। बनै दुखस क्रुसत सिन्या ब सहिक्यो। 9 है जैद परमेस्वरए नोलाई सोचोइद, स्वर्गताव प़ाइँरानी ओमान ल्यो पोल नैक्यो। मिन भरिरानी प़ाइँरानी घ्योःव मिन नैदिक्यो। 10 है जैद स्वर्गतावर, आव नामलावर, तल्ना नामलावर प़ाइँ ज़ येसुए उमिनत याघूँदानी फुलुप्सिद, 11 येसु ख्रीसलाई प़ाइँए ज़ ‘प्रभु’ है दोरिज़्यार। ननी ज़ परमेस्वर ओबाबुए उमिन ब घ्योःन्या ले। ज़गै जैज़्याव सोरो मितावर जेलिज़्या 12 जे ङायुँलाव ङानैं ङामेंर, ङा जेस ङालिज़्याकाव जेदोज़्याव मिताव, ङा ङामालिक मनी झन ज़ नो दैद जेनैज़्याव साःरो जुनीलाई जेयुँ थू जैद सुदुमो ताके। 13 जेलाई उयुँलाव मिताव य़ेन दाव परींज़्याव ब ओल परमेस्वरए ज़, धामा दान्या युँ जैद्याद सुदुमो परींज़्याव ब ओल परमेस्वरए ज़। 14 है जैद जेदोज़्याव य़ेन भरित मारूम्रूमैद माइ़सिद चावस दोच्यो। 15 हो ताकिन ची जे परमेस्वरए ओज़ार जेखत माल्यो छैंवर थ॰रिन्या जेले। आव मानुवाताव यायुँ बिप्यादा ता·सिउराए खार्ल ब जेलाई सुए ज़ जेपाँःच्या पले·द्याधुन्या मालेर। बुरू नितावराए खार्ल चुम चुमोलाई ज़गै जैज़्याव सोरो मितावर रैंःन्या जेले। 16 जीवनलाव पाँलाई पक्कास क्योःद जेनैकिन ख्रीस फरी उहुव छ्याम जेक्याँताव ङादोव य़ेन भरी अऩाकलाव ओमाताव ओल्यो लिद ङासुनी च्याँःसिरिज़्या। 17 ङालाई यासैःनादी ब ङाजुनी अऩाकलाव तान्या माले। जेजूँनी ङादोव भरित परमेस्वरलाई ङाजिउ ङाचरैःव मिताव ज़ तान्या ले। ननी ज़ ङा खुसी ताद जेस ङारेंज़्या। 18 हिताव ज़ जे मनी आव पाँरात खुसी ताद, ङा किताव ङारेंज़्या, जे मनी ङास रेंचिके। जेल्योदा तिमोथीलाई ङापरींज़्या 19 प्रभु येसुए उयुँ ओताकिन ङा तिमोथीलाई जेल्योदा चाँदो ज़ परींव ङापैंज़्या। जेस दैसिद जेथा ओरैकिन ङायुँ होलाँ तान्या ले। 20 जेल्योदा साचो उयुँ थू जैज़्याव तिमोथी स्यासो छुतर ङास सु ज़ मालेर। 21 उपुर्कावर ते येसु ख्रीसए ओय़ेनकिन याय़ेन वाज़ चिऊज़्यार। 22 तिमोथी ते उगुनर रैंःव, थ॰रिउ उलिज़्याव, जे ज़ जेसैंज़्या। ङास परमेस्वरए चाव ओथा सथैन्यात ज़ा बाबु स्यासो ज़ गिन्लिज़्या। 23 है जैद ङा आव क्योःसिद ङालिज़्यावल ‘ङालाई अइ तारिज़्या’ लिन्या ङासैंवत जेल्योदा हतप्त ज़ ङापरींरिज़्या। 24 प्रभुए उयुँ ओताकिन जेल्योदा चाँदो ज़ हुन्या ङाले लिन्या आस ब लिज़्या। इपाफ्रोदितसलाई रेंद सुमो ताके 25 आव है ङालिज़्याव भरी ओमाताद ज़ इपाफ्रोदितसलाई जेल्योदा ङापरींज़्या। नो ङालाई चिऊना जेपरींव मिँ ङाभाइ स्यासो ब लिज़्या, परमेस्वरए ओय़ेनत ङानैं ब लिज़्या, ख्रीसए उधूँल ङास तोबो सिपाईं मिताव ब गिन्लिज़्या। 26 खाली नोए जेजूँनी ‘किताव लिज़्यार’ लिद उयुँ थू जैज़्याव। स़ोनो, जे ‘ओजोरो हुज़्या दी’ लिन्या जेथैवए ‘ङासोगोत लिज़्याखेरहो’ लिद आतिज़्या। 27 नो जेथैव मिताव ओजोरो ते उहुव ज़। नो ओजोरोए कोज़ाइ ज़ सिके। हाःत ज़ परमेस्वरए उयुँ नाद बाँचैक्यो। ओललाई वाज़ माःक, परमेस्वरए ङालाई मनी उयुँ नाके। नो उसिउ ताकिन ङालाई सोगोए तर्त सोगो तान्या ओल्यो। 28 है जैद ‘नोलाई रँःद जेयुँर होलाँ घताक’ लिद हतप्त ज़ जेल्योदा ङापरींज़्या। हो ताकिन ङा ङायुँ ब होलाँ तान्या ले। 29 नो मिँ प्रभुए उमिनताव ओतावए जेल्योङ उहुवत रेंद सुम्च्यो। आव मिताव मिँरालाई यामान नैद्याव ज़ परिए। 30 काराव ल्यो ताकिन जे ङाजूँनी दाव जेपैंज़्याव य़ेन सयो·द्यान्याए जूँनी नो मिँ उजिउए मया मादाद ख्रीसए ओय़ेनत कोज़ाइ म़ानी सिके। |
© 2015, Wycliffe Bible Translators, Inc. All rights reserved.
Wycliffe Bible Translators, Inc.