२ थेसलोनिकी 2 - साःरो बाचा

परमेस्‍वरकिन तँदा जैसिज़्‍याव

¹ अ गेनैं गेमेंर, गेप्रभु येसु ख्रीस फरी उहुक गे ओलस दुप्‍सिद सिप गेतारिज़्‍यावए जूँनी तोबो पाँ है गेदाचिज़्‍या।

² ख्वा ख्वाराए, ‘गेप्रभु येसु ख्रीस उहुन्‍या छ्याम ताधुके’ है लिज़्‍यार। नितावराए गे गेमिन कुद इताव चिथीर यापरींकिन स़ोनो जेल्‍योक हुद, ‘इताव पाँर परमेस्‍वरए उपुरूसनी ज़ गेदैके,’ है यालिदी ब नोराए यापाँ पतिद जेयुँ आँचा पाँचा ताजैच्‍यो।

³ सुवाराए ल्‍योनी ब ताझुकिच्यो। मानुवा भरी परमेस्‍वरकिन तँदा जैसिद परमेस्‍वरए ओकानुन माभैंःज़्याव ऩुल्‍या मिँ ओमासरैंःसिवा पै नोकिन ङ़ादा गेप्रभु हुन्‍या माले।

⁴ नो तँदा जैसिज़्यावए मानुवाताव मिँराए यामानिज़्‍याव देवताराकिन ओल ज़ सघ्योःसिद, परमेस्‍वरकिन ब स॰द ध्‍यान झ़िमल च़ुसिद, ‘परमेस्‍वर ङा ज़’ है लिन्‍या ले।

⁵ जे जेमामेंःज़्‍याखेहो, आव पाँ भरी जेस ङालिज़्‍याक है दाव ज़ ङानैचिज़्‍याव।

⁶ नो मिँ ओसरैंःसिन्‍या बेला ओमातावा पै नोलाई वैंद नैज़्‍याव ‘आवए ज़’ लिन्‍या ब जेसैंज़्‍या।

⁷ खाली नो वैंज़्‍यावए येम ओमाऱासा पै नो मिँ माहुधुइ। परमेस्‍वरकिन तँदाङाव य़ेन ते आज्‍याल ब उजींल उजींल ताव ज़ लिज़्‍या।

⁸ येम ओऱासोत वाज़ बल्‍ल नो परमेस्‍वरए ओकानुन माभैंःद तँदा जैसिज़्याव मिँ रैंःन्‍या ले। नोलाई गेप्रभु येसु ओज़गैस ओसरैंःसिहुक उस॰ ह्‍वास ओजैव प़ाइँना ज़ नो मिँ होक ज़ सिद उमिन ज़ म़ान्‍या ले।

⁹ नो मिँए ओय़ेन भरी सैताननिकाव ओतावए सैतानए ओसक्ती रैद अचम्‍बलाव य़ेनर चेतकर ब सतैंहुरिज़्‍याव।

¹⁰ नर्गलाव येमदा बाज़्‍यावराए परमेस्‍वरए साचो ओपाँलाई माभैंःद बाँचैन्‍या येमलाई यासोवए नो मिँए ओछलनी प़ाइँ किसिमलाव धुतर पले·द याझुकैरिज़्‍याव।

¹¹ है जैद परमेस्‍वरए मनी ‘निताव धुत पाँलाई ज़ घपतिज़्‍यारक ते’ लिद मुन्‍दुक्‍यासो तान्‍या सराप ब याएरिज़्‍याव।

¹² साचो पाँलाई यायुँ माहुप्‍द मादान्‍या य़ेनदा यायुँ थू जैज़्‍याव भरी ननी ज़ परमेस्‍वरए ओसजाल परिन्‍या लेर।

परमेस्‍वरए ल्‍योदा बान्‍या छाँतिसिउर

¹³ अ प्रभुए उयुँलाव मिताव गेनैं गेमेंर, जेजूँनी गे एकतार परमेस्‍वरलाई धन्‍याबाद चरैःव परिज़्या, काराव ल्‍यो ताकिन परमेस्‍वरए साचो ओपाँत जेयुँ जेसुहुप्‍ज़्याव स़ोनो छैंव पुरूसए जेलाई छैंवर ओजैचिउनी जेलाई ङ़ादाकिन ज़ अजम्‍बरी जुनी ओलस ज़ दैन्‍या छाँतिद नैचिउ।

¹⁴ हो येमल बान्‍याए जूँनी ज़ गे गेसथैचिज़्‍याव चाव थानी परमेस्‍वरए जेलाई खुल्‍द नैचिउ। ननी ज़ गेप्रभु येसु ख्रीसए ओज़गै जे ब जेदैरिज़्‍या।

¹⁵ है जैद गेनैं गेमेंर, जे गेल्‍योनी जेपैसिउ भरी, गेयाःनी तादी ब, सर्सिउ चिथीनी तादी ब जात्त ज़ माऱास्‍द नत ज़ थ॰रिद लिच्‍यो।

^16-17 गेप्रभु येसु ख्रीस स़ोनो गेबाबु परमेस्‍वरए जेलाई चाव जेय़ेन, चाव जेपाँ भरिल जेयुँर होलाँ जैद्याद थ॰रिउ युँ ब जैद ओयाचिउक। गेबाबुए गेल्‍योदा उयुँ थू जैद उयुँ ओगराँवनी ज़ गेलाई अजम्‍बरी जुनीए आस याद गेयुँ सझेंःद्यासिक्‍यो।