MARK 7 - DVRWQ PVVB

Kacbo Pagoqkam Tomswrnam

¹ Parisi ngvla Pvvb tomswrbo nyi tulungv Jerusalem hoqgv haalayil Jisug ogumho pumkumnum.

² Bulv Jisug buu tulungv alaq losuq maab kacbo alaqngv dvnam mam kaapa tvl, Parisi tulungv benam hvb nyima.

³ Hoggab Parisi tulungv ho Juhudi nyi asaqkv bulug ab apa hoqgv bvvl ignam nyicwngam nyidwn, bulug alaqngam hind jaqb losuq maalo bulv vcin dvma dvn,

⁴ ho kwm-kor haty hoqgv bvanam hog mwlwngam otuqcob iss lvgab hwrxaq maady deedib bulv ham dvma dvn. Bulv soq svk nyicwngam ab apa tulu galoqkv kaapanam sam vigo bugil swwdwn; hoq tuluhv pvtaqngam hindib xaaxaqnam, pwcwngam deexaqnam, tama pwcw-uddu tulu ngamla kartaqngam hwrxaqnam.

⁵ Hoqgab Parisi ngvla Pvvb tomswrbo tulungv Jisun toxnum, “Hoggab noqg buu tulungv ngulug ab apa toloqgv bvvlwl ignam nyicwngam nyimab, losuq maab kacbo alaqngv dvdwn?”

⁶ Jisu bulam birwqnum, “Nyiqry kaanbo Aijaya nulam bepa! Kaaga-tagab nyinbo pagoqkam hind alwb nyiqry kaalinl bel apnamv doodwn mwv ham xeqnum, “Soq nyi tulu si ngam bulug agamv xitwqdvn, hvbmabde bulug hangv ngoqg galoqkv aado dvn.

⁷ Bulv ngam vm yab sulak xumdwn, hoggab bulv nyi tulug pvvb mvnam mam ngoqg pvvb jaq hvb tomswr dvn!”

⁸ “Nulv Pwnbog gamlam apaqpel nyi tulug tomswrnam mam bugil swwdwn.”

⁹ Jisu hvraqb benum, “Nulv surjaqb nyinv Pwnbog gamlam tama dvn, hvbmabde nulug atwg tomswrnam mam gvbwl doogdvn.

¹⁰ Hoggab Mojes gaml jinum, “No noqg ab annam bugil swwto, hoo hiyv akgon atwg ab annam almab bec bedwn, mwam sito.”

¹¹ Hvbmabde nulv bedwn, nyi ak mwwg ab annam bebaloqkam, hognvkv xeq nulv ngoqg galoqkv niqtuq lengpa kun hv Korban, (hvgdvn si Pwnbon jipa kun),

¹² ho nulv mwam mwwg ab annam tulungam svka kaam dvb jima dvn,

¹³ Soq sib nyinv nulug ab apa tulug gonam nyi tulungam tomswr banv Pwnbog puiyam ceqpaqdvn. hoo soq sib nulv vigo asaq hoq nyis maaiyam nyinamv nyil doodwn.”

Nyiam Kacdvb Mvnbo Hoolu

¹⁴ Jisu lokta nyi tulungam mwwg ogum goqal bulam benum, “Nul mwlwngv ngoqg benam sam tagabto, hoo tacinto.

¹⁵ Aga hoqgv nyi urab haanbov nyiam hog gokam kacdvb mvnbo dooma dvn. Hvbmabde hognvkv nyi ura hoqgv agab lengn bo hv nyiam kacdvb mvdwn.”

¹⁶ Hiyv nyuru gvdwn, sam tagabto.

¹⁷ Kokw so Jisu nyi tulungam apaqpel nam urab haadwk ho, mwwg buu tulungv mwwg soq benam niqtuqkam bekin tvbwk hvl mwam benum.

¹⁸ Jisu bulam benum, “Nulv hwdgo tacin maab paca dvn i? Aga hoqgv urab haanbo hoolungv nyiam jvqtw jaqb kacdvb mvma dvn.

¹⁹ Hoggab aga hoqgv urab haanbov hang urab haamab ayeqb haadwn hoq kokwb hv agab lengpaq dukun.?” (Jisu soq sam benam si hog mwlw dvnam sam dvdwb nyidwn.)

²⁰ Kokw so mwv hvraqb benum, “Ura hoqgv lengn bo hv sulak nyi akam kacdvb mvdwn.

²¹ Hoggab ura hoqgv lengn bo hv nyi akwg hang ura hoqgv lengdwn, ho almanbo mwwnamv, yocu-yabio nyinamv, dvco conamv, nyi mengnamv, bwwxinamv,

²² kaabil kaaneqnamv, nyic-nyia nyinamv, xaalyonamv, xumt dvb nyinamv, kaabynamv, bec-beyanamv, larnamv, nyiidamnamv, soq torab si lengdwn.

²³ Soq mwlw almanbo torab si nyi akwg hang ura hoqgv lengdwn hoo mwam kacdvb mvdwn.”

Nyem Akwg Mwwjwnam

²⁴ Jisu hoqgv wknv Sidon la Taiyar nampam ogum ditaqho wnum. Mwv nam golo urab haanum hoo mwam hiyv nvkam mwv hoqho doodwn hvl cengm dvb mwwmanum, hvbmabde mwv kvsil hoqho doonyi kumanum.

²⁵ Nyem dvn ak, mwwg ko nyem mam almanbo yalv nootunam hoq annv, Jisug puiyam tapa tvl mwwg dookub nyiory alwb haalayil mwwg lvpia lwkw hv xuml benum.

²⁶ Hoq nyem akv Gwrik nyiib nyinum ho mwn Ponisiya gvdag Siriya nyookho ko bwwnamv. Dvn akv Jisun mwnwg nyem ko hoqgv almanbo yalam ruqlin tvbwk hvl xuml benum.

²⁷ Hvbmabde Jisu birwqnum, “Ngulv ko tulungam dvdwb jico tuj. Ko tulug dvsam naareql ikiam jinamv almadwn.”

²⁸ Dvn akv birwqnum, “Tomswrbo, iky tulungv ko tulug agam hoqgv cingngar yoql bo tebol niikumb holboam dvdwn!”

²⁹ Kokw so Jisu dvn akam benum, “Soq sam no birwqko gab no nammwb wkur nuku, ho alo noqg nyem ko urag almanbo yalv lengknam mam kaapa tayin.”

³⁰ Dvn akv namhv wcwl kaaknamv mwnwg nyem ko hoqgv yal almanbo lengt kul nyem kov karl doonam mam kaapa kunum.

Jisu Ruutar-bengaqbo Nyi Ak Mwpnum

³¹ Kokw so Taiyar gvda diis-paap hoqgv wknv Sidon gvdab ipeql Galili swnyiq Dekapolis bopam pvmyw gvdab innum.

³² Nyi tulungv mwwg dookub ruutarbo hoo bengaqbo nyi ak boal Jisun hoq nyi aoho alaq idaq tvbwk hvl mvnyi-moiyul benum.

³³ Kokw so Jisu hoq nyi akam nyi tulug pengko hoqgv vpwb boogin banv mwwg lvqcwngv hoq nyi akwg nyuru runyiam idaqtvl tacorv curxab tvl mwwg lyolam idaqnum.

³⁴ ho Jisu ao gvdab koodul soqsul nyi akam benum, “Eppatta” hvgdvn si “Mvko tuku!”

³⁵ Hvl bedakalam nyi akv tapa kunum ho mwwg bengaq ngvkam niiknum, hoo mwv hog betup bemab doomab beknum.

³⁶ Kokw so Jisu nyi tulungam hoq bvrwqngam hiyv nvkam bekin maabwk hvl yvtw panum. Hvbmabde mwv bema bvk hvl bulam beya yaiya, ham laabo yaab bulv hoq pagoqkam benum.

³⁷ Ho sam tanbo tulungv tatwl lomnum. Bulv lomngaq banv loml benum, “Mwv hog mwlwngam aljaqb nyipa! Mwv ruutar boam tapa dvb hoo paca boam kam goolaq dvb ator jito!”